വീടിന് മുന്നിലെ ചെടിച്ചട്ടിയിൽ കഞ്ചാവുചെടികൾ നട്ടുവളർത്തിയ യുവാവിനെയാണ് എക്സൈസ് സംഘം പിടിക്കൂടിയത്. ഇരുപതോളം തൈ ചെടികളാണ് ഇവിടെനിന്നും കണ്ടെത്തിയത്.
കൊച്ചുചേലച്ചുവട് പുതുശേരിക്കുന്നേൽ ആദിൽ മുഹമ്മദാണ് ( 21 ) ഇടുക്കി നാർക്കോട്ടിക് സ്ക്വാഡിന്റെ പിടിയിലായത്. എക്സൈസ് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ സുരേഷ് കുമാറിന് കിട്ടിയ രഹസ്യ വിവരത്തെ തുടർന്നാണ് പരിശോധന. ഇരുപത് ദിവസം പ്രായമായമുള്ള കഞ്ചാവ് ചെടികളാണ് ഇയാൾ വളർത്തിയതെന്നാണ് പരിശോധനയിൽ വ്യക്തമാകുന്നത്. ഇതേതുടർന്ന് പ്രതിയെ കസ്റ്റഡിയിൽ എടുത്ത് ചോദ്യംചെയ്യലിനു ശേഷം കോടതിയിൽ ഹാജരാക്കി. കഞ്ഞിക്കുഴി പൊലീസ് സ്റ്റേഷന്റെ നൂറുമീറ്റർ പരിധിയിലാണ് സംഭവം. വർഷങ്ങളായി കഞ്ചാവ് ഉപയോഗിക്കുകയും നട്ടുവളർത്താൻ മുൻപ് ശ്രമിച്ചിട്ടുണ്ടെന്നും ചോദ്യം ചെയ്യലിൽ പ്രതി സമ്മതിച്ചിട്ടുണ്ട്. എന്നാൽ കൂടുതൽ വിശദമായ ചോദ്യംചെയ്യലിനു പ്രതിയെ കസ്റ്റഡിയിൽ വാങ്ങിക്കുമെന്ന് എക്സൈസ് ഇൻസ്പെക്ടർ അറിയിച്ചു.
