പ്രധാനപ്പെട്ട വാർത്തകൾ ഒറ്റനോട്ടത്തിൽ
തക്ക പ്രതിഫലം കിട്ടിയാല്‍ ലോകയുക്ത ആര്‍ക്കെതിരെയും എന്തു കടുംകൈയും ചെയ്യുമെന്ന് മുന്‍മന്ത്രി കെ.ടി. ജലീല്‍. യുഡിഎഫ് നേതാവിനെ പ്രമാദമായ കേസില്‍നിന്നു രക്ഷിക്കാന്‍ സഹോദര ഭാര്യക്ക് എംജി സര്‍വകലാശാല വൈസ് ചാന്‍സലര്‍ പദവി വിലപേശി വാങ്ങിയ ഏമാനാണ് ലോകായുക്ത. പിണറായി സര്‍ക്കാരിനെ പിന്നില്‍നിന്നു കുത്താന്‍ യുഡിഎഫ് കണ്ടെത്തിയ കത്തിയാണെന്നും ജലീല്‍ ഫേസ്ബുക്കില്‍ വിമര്‍ശിച്ചു. ലോകായുക്ത ജസ്റ്റിസ് സിറിയക് ജോസഫിന്റെ പേരു പറയാതെയാണു വിമര്‍ശനം. ഐസ്‌ക്രീം കേസില്‍ പികെ കുഞ്ഞാലിക്കുട്ടിയെ വെറുതേവിട്ട ഹൈക്കോടതി ഡിവിഷന്‍ ബെഞ്ചില്‍ ജസ്റ്റിസ് സിറിയക് ജോസഫുമുണ്ടായിരുന്നു. നേരത്തെ വിസിയായിരുന്ന സഹോദര ഭാര്യ ജാന്‍സി ജെയിംസിനെ എംജി യൂണിവേഴ്സിറ്റി വൈസ് ചാന്‍സലറായി നിയമിച്ചതിനെയാണ് ജലീല്‍ തക്ക പ്രതിഫലമായി പരിഹസിച്ചത്. ജസ്റ്റിസ് സിറിയക് ജോസഫിനെ ലോകായുക്തയായി നിയമിച്ചത് ഒന്നാം പിണറായി സര്‍ക്കാരാണെന്ന കാര്യം മറച്ചുവച്ചുകൊണ്ടാണു ജലീലിന്റെ പോസ്റ്റ്.
ജുഡീഷ്യറിയോടുള്ള ഭരണകൂടത്തിന്റെ പരസ്യവെല്ലുവിളിയാണു കെ.ടി. ജലീലിന്റെ അധിക്ഷേപമെന്ന് പ്രതിപക്ഷ നേതാവ് വി.ഡി. സതീശന്‍. സര്‍ക്കാറിന്റെ ചാവേറായ ജലീലിന് ലോകായുക്തയുടെ അടി കൊണ്ടതാണ് വീര്യം കൂടാന്‍ കാരണമെന്നും വിഡി സതീശന്‍ വിമര്‍ശിച്ചു.
ലോകായുക്ത ഓര്‍ഡിനന്‍സ് മന്ത്രിസഭ അംഗീകരിച്ച വിവരം പാര്‍ട്ടിയെ അറിയിക്കാത്തതില്‍ സിപിഐ സംസ്ഥാന സെക്രട്ടറി കാനം രാജേന്ദ്രന്‍ സിപിഐ മന്ത്രിമാരെ അതൃപ്തി അറിയിച്ചു. അടുത്ത സിപിഐ നിര്‍വാഹക സമിതി യോഗം വിഷയം ചര്‍ച്ച ചെയ്യും. ഓര്‍ഡിനന്‍സ് കാര്യമായ ചര്‍ച്ചയില്ലാതെയാണ് മന്ത്രിസഭായോഗം അംഗീകരിച്ചത്. എല്‍ഡിഎഫിലും ചര്‍ച്ച ചെയ്തില്ലെന്നു കാനം കഴിഞ്ഞ ദിവസം ആരോപിച്ചിരുന്നു.
സിപിഐ മന്ത്രിമാര്‍ക്ക് മുഖ്യമന്ത്രിയെ ഭയമാണെന്ന് കോണ്‍ഗ്രസ് നേതാവ് രമേശ് ചെന്നിത്തല. സിപിഐ മന്ത്രിമാരെ കാര്യങ്ങള്‍ അറിയിക്കുന്നില്ല. ലോകായുക്ത വിഷയത്തില്‍ മുഖ്യമന്ത്രി നിലപാട് വ്യക്തമാക്കണം. ഓര്‍ഡിനന്‍സ് നിയമസഭയോടുള്ള അവഹേളനമാണ്. ലോകായുക്ത കേസില്‍ കുടുങ്ങിയ മുഖ്യമന്ത്രിയേയും ഉന്നത വിദ്യാഭ്യാസ മന്ത്രിയെയും രക്ഷിക്കാനാണ് നിയമഭേദഗതിയെന്നും ചെന്നിത്തല.
ലോക് ഡൗണിനു സമാനമായ നിയന്ത്രണങ്ങളുള്ള ഇന്നു തെരുവിലിറങ്ങാതെ ജനം. വാഹനങ്ങളും നിരത്തിലിറങ്ങിയില്ല. റോഡില്‍ പോലീസ് പരിശോധന വ്യാപകമായിരുന്നു. ഇടുക്കി, പാലക്കാട് ജില്ലകളുടെ സംസ്ഥാന അതിര്‍ത്തികളിലുള്ള ചെക്ക് പോസ്റ്റുകളിലും കര്‍ശന പരിശോധന. ഇടുക്കി ജില്ലയിലെ കുമളി, കമ്പംമെട്ട്, ബോഡിമെട്ട്, ചിന്നാര്‍ എന്നിവിടങ്ങളിലും പാലക്കാട് ജില്ലയിലെ വാളയാറിലുമാണ് പരിശോധന.
ഇന്ത്യയില്‍ ആദ്യ കൊവിഡ് കേസ് റിപ്പോര്‍ട്ട് ചെയ്തതിന്റെ രണ്ടാം വാര്‍ഷികമാണിന്ന്. തൃശൂര്‍ ജില്ലയിലെ പൂല്ലൂറ്റിലെ വിദ്യാര്‍ഥിനിക്കാണ് ഇന്ത്യയില്‍ ആദ്യമായി കോവിഡ് സ്ഥിരീകരിച്ചത്. ചൈനയിലെ വുഹാനില്‍ എംബിബിഎസ് വിദ്യാര്‍ഥിനിയായിരുന്നു. വുഹാനില്‍ രോഗം പരന്നതോടെ നാട്ടിലെത്തിയപ്പോഴാണ് രോഗബാധിതയാണെന്നു കണ്ടത്. തൃശൂര്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു പത്തു ദിവസത്തിനകം സുഖം പ്രാപിച്ചിരുന്നു.
അട്ടപ്പാടിയില്‍ ആദിവാസി യുവാവ് മധു കൊല്ലപ്പെട്ട കേസ് വൈകിപ്പിച്ചതു പോലീസാണെന്ന് സ്പെഷല്‍ പ്രോസിക്യൂട്ടര്‍ വി.ടി രഘുനാഥ്. സിസിടിവി ദൃശ്യങ്ങള്‍ അടക്കമുളള ഡിജിറ്റല്‍ തെളിവുകള്‍ പ്രതികള്‍ക്ക് കൈമാറാന്‍ പൊലീസ് കാലതാമസം വരുത്തിയതാണ് വിചാരണ വൈകാന്‍ കാരണം. തനിക്കെതിരെ സംശയമുയര്‍ന്ന സാഹചര്യത്തില്‍ സ്പെഷല്‍ പ്രോസിക്യൂട്ടറായി തുടരുന്നതില്‍ താല്‍പര്യമില്ലെന്നും അദ്ദേഹം പറഞ്ഞു.
നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ കൊല്ലാന്‍ ശ്രമിച്ചെന്ന കേസില്‍ നടന്‍ ദിലീപ് എറണാകുളം എംജി റോഡിലെ മേത്തര്‍ ഹോംസിന്റെ ഫ്ളാറ്റില്‍ മറ്റുപ്രതികളുമായി ഒത്തുകൂടി ഗൂഡാലോചന നടത്തിയെന്ന് ക്രൈംബ്രാഞ്ച്. തെളിവെടുപ്പിന്റെ ഭാഗമായി പോലീസ് ദിലീപിന്റെ മുന്‍ഭാര്യ മഞ്ജുവാര്യരുടെ മൊഴിയെടുത്തു. തന്റെ ഒരു മൊബൈല്‍ ഫോണില്‍ മഞ്ജു വാര്യരുമായുളള സ്വകാര്യ സംഭാഷണമുണ്ടെന്ന ദിലീപിന്റെ വാദത്തെപ്പറ്റിയുള്ള വിവരങ്ങളും തിരക്കി.
അന്വേഷണ ഉദ്യോഗസ്ഥരെ കൊല്ലാന്‍ ശ്രമിച്ചെന്ന കേസില്‍ പ്രധാന തെളിവുകളെന്നു പോലീസ് പറയുന്ന ദിലീപിന്റെ ഫോണുകള്‍ ഇന്നു വൈകുന്നേരം മുംബൈയില്‍നിന്ന് കൊച്ചിയിലെത്തും. ദിലീപിന്റെ രണ്ട് ഫോണുകളാണ് മുബൈയിലുള്ളത്. ഫോണുകള്‍ നാളെ രാവിലെ അഭിഭാഷകര്‍ കോടതിയില്‍ ഹാജരാക്കും. ദിലീപിന്റെ മൂന്ന് ഫോണുകളും സഹോദരന്‍ അനൂപിന്റെ രണ്ട് ഫോണുകളും ബന്ധു അപ്പുവിന്റെ ഫോണും കൈമാറാനാണ് അന്വേഷണ സംഘം ആവശ്യപ്പെട്ടിട്ടുള്ളത്.
മാനനഷ്ടക്കേസ് വിധിക്കെതിരെ അപ്പീല്‍ പോകുന്നത് വി.എസ് അച്യുതാനന്ദന്റെ അവകാശമാണെന്ന് മുന്‍ മുഖ്യമന്ത്രി ഉമ്മന്‍ചാണ്ടി. സോളാര്‍ കേസില്‍ വന്ന വിധികളെല്ലാം തനിക്ക് അനുകൂലമാണ്. മൂന്ന് കമ്മീഷന്‍ റിപ്പോര്‍ട്ടിലും കുറ്റക്കാരനെന്ന പരാമര്‍ശം ഇല്ലെന്നും ഉമ്മന്‍ചാണ്ടി പറഞ്ഞു.
മലപ്പുറം മമ്പാട് തേനീച്ചയുടെ കുത്തേറ്റ കര്‍ഷകന്‍ മരിച്ചു. പുളളിപ്പാടം ഇല്ലിക്കല്‍ കരീം എന്ന അറുപത്തേഴുകാരനാണ് മരിച്ചത്. അടക്കാക്കുണ്ടില്‍ കാട് വെട്ടുന്നതിനിടെയാണു തേനീച്ചയുടെ ആക്രമണമുണ്ടായത്. ഗുരുതരമായി പരിക്കേറ്റ കരീമിനെ ആശുപത്രിയില്‍ പ്രവേശിപ്പിച്ചെങ്കിലും ഫലമുണ്ടായില്ല.
കണ്ണൂരില്‍ ആര്‍എസ്എസ് പ്രവര്‍ത്തകന്റെ വീട്ടില്‍ സ്ഫോടനം. ധനരാജ് വധക്കേസ് പ്രതി ആലക്കാട്ട് ബിജുവിന്റെ വീട്ടിലാണ് സ്ഫോടനം നടന്നത്. വീട്ടില്‍ സൂക്ഷിച്ച ബോംബ് പൊട്ടിത്തെറിച്ചെന്നാണ് സംശയം. പരിക്കേറ്റ ബിജു കോഴിക്കോട് സ്വകാര്യ ആശുപത്രിയില്‍ ചികിത്സയിലാണ്.
നടിയെ ആക്രമിച്ച സംഭവത്തില്‍ കേരളത്തിലെ രാഷ്ട്രീയ നേതൃത്വം മൗനം പാലിച്ചെന്ന് കോണ്‍ഗ്രസ് നേതാവ് മുല്ലപ്പള്ളി രാമചന്ദ്രന്‍. പി.ടി. തോമസ് ഒഴികെ ഒരു നേതാവും സംഭവത്തെ അപലപിച്ചില്ല. സംഭവത്തില്‍ ഇരയ്‌ക്കൊപ്പം നില്‍ക്കേണ്ടതായിരുന്നെന്നും മുല്ലപ്പളളി.
ഹയര്‍സെക്കണ്ടറി ഇംപ്രൂവ്മെന്റ് പരീക്ഷ നാളെ മുതല്‍. 1955 കേന്ദ്രങ്ങളിലാണു പരീക്ഷ. കൊവിഡ് പോസിറ്റീവായ കുട്ടികള്‍ക്ക് പ്രത്യേക മുറികള്‍ ഏര്‍പ്പെടുത്തും.
ഫോക്കസ് ഏരിയ മാനദണ്ഡത്തെ എതിര്‍ക്കുന്ന അധ്യാപകര്‍ ശരിയായി ജോലി ചെയ്യട്ടെയെന്ന് വിദ്യാഭ്യാസ മന്ത്രി കെ. ശിവന്‍കുട്ടി. അധ്യാപകരുടെ ജോലി പഠിപ്പിക്കലാണ്. അവര്‍ ആ ചുമതല നിര്‍വഹിച്ചാല്‍ മതി. എല്ലാവരും ചേര്‍ന്നുകൊണ്ട് ഒരു ചുമതല നിര്‍വഹിക്കണ്ടെന്നും മന്ത്രി പറഞ്ഞു.
ഏറ്റുമാനൂരില്‍ എടിഎം കുത്തിത്തുറന്ന സംഭവത്തില്‍ അതിഥി തൊഴിലാളി കസ്റ്റഡിയില്‍. ഇന്നു പുലര്‍ച്ചെ പേരൂര്‍ പുളിമൂട് കവലയിലെ എസ്ബിഐ എടിഎമ്മിലായിരുന്നു കവര്‍ച്ചാശ്രമം. കമ്പിപ്പാര ഉപയോഗിച്ച് കുത്തിപ്പൊളിച്ചു കവര്‍ച്ച നടത്താനുള്ള ശ്രമത്തിനിടെയാണ് ഇയാള്‍ പിടിയിലായത്.
ഭാര്യയെ കഴുത്തില്‍ ഷാള്‍ മുറുക്കി കൊല്ലാന്‍ ശ്രമിച്ചെന്ന പരാതിയില്‍ ഭര്‍ത്താവിനെതിരെ പൊലീസ് കേസെടുത്തു. കയ്പമംഗലം ചളിങ്ങാട് സ്വദേശി പുഴങ്കരയില്ലത്ത് മുഹമ്മദ് അശ്വിനെതിരെയാണ് കയ്പമംഗലം പൊലീസ് വധശ്രമത്തിന് കേസെടുത്തത്. ചളിങ്ങാട് സ്വദേശി ചമ്മിണിയില്‍ മാലിക്കിന്റെ മകള്‍ റീമയുടെ പരാതിയിലാണ് കേസ്. അഞ്ചു വര്‍ഷം മുന്പ് വിവാഹിതരായ റീമയും അശ്വിനും ഒരു വര്‍ഷമായി അകന്ന് കഴിയുകയാണ്.
ചില്‍ഡ്രന്‍സ് ഹോമില്‍നിന്ന് ഒളിച്ചോടിയശേഷം കണ്ടെത്തിയ കുട്ടികളില്‍ ഒരാളുടെ രക്ഷിതാക്കള്‍ തന്റെ മകളെ തിരിച്ചു തരണമെന്നാവശ്യപ്പെട്ട് രംഗത്തെത്തി. കുട്ടിയെ വിട്ടുതരില്ലെന്ന നിലപാടിലാണ് ചില്‍ഡ്രന്‍സ് ഹോം അധികൃതര്‍. രക്ഷിതാക്കള്‍ ജില്ലാ കളക്ടര്‍ക്കും സിഡബ്ലൂസിക്കും പൊലീസിലും പരാതി നല്‍കി.
പെണ്ണുകാണാന്‍ വന്ന ചെറുക്കന്‍ വീട്ടുകാര്‍ മുറിയടച്ചിട്ട് 'ഇന്റര്‍വ്യൂ' ചെയ്തപ്പോള്‍ യുവതി അവശയായി ആശുപത്രിയിലായി. കോഴിക്കോട് നാദാപുരം ഭൂമിവാതുക്കല്‍ അങ്ങാടിക്കടുത്താണ് സംഭവം. ചെറുക്കന്‍ വന്നു പെണ്ണുകണ്ട് ഇഷ്ടപ്പെട്ടതായിരുന്നു. പിന്നീട് ചെറുക്കന്റെ വീട്ടില്‍നിന്ന് 25 സ്ത്രീകളടങ്ങുന്ന സംഘം പെണ്‍വീട്ടിലെത്തി ഒരു മണിക്കൂറോളം ഇന്റര്‍വ്യൂ ചെയ്തതോടെ പെണ്‍കുട്ടി അവശയായി വീണു. പിന്നീട് അറിയിക്കാമെന്നു പറഞ്ഞ് സ്ഥലംവിടാന്‍ ശ്രമിച്ച ചെറുക്കന്റെ വീട്ടുകാരെ പെണ്‍കുട്ടിയുടെ വീട്ടുകാര്‍ തടഞ്ഞുവച്ചു. ഇതോടെ ചെറുക്കന്റെ വീട്ടുകാര്‍ മാപ്പ് പറയുകയും നഷ്ടപരിഹാരം നല്‍കാമെന്ന് സമ്മതിക്കുകയും ചെയ്തു.
കൊവിഡിന്റെ മൂന്നാം തരംഗത്തോടു രാജ്യം വിജയകരമായി പൊരുതുകയാണെന്നു പ്രധാനമന്ത്രി നരേന്ദ്രമോദി മന്‍ കി ബാത്തില്‍. കൊവിഡ് കേസുകള്‍ കുറയുന്നത് നല്ല സൂചനയാണ്. വാക്സിനില്‍ വിശ്വാസം വര്‍ധിക്കുന്നത് പ്രത്യാശ നല്‍കുന്നതാണ്. ആസാദി കാ അമൃത മഹോത്സവം ഇന്ത്യയില്‍ മാത്രം ഒതുങ്ങുന്ന ആഘോഷമല്ല. രാജ്യത്തിനകത്തും പുറത്തുമുള്ള ഒരു കോടിയോളം കുട്ടികള്‍ അവരുടെ ചിന്തകള്‍ പോസ്റ്റ് കാര്‍ഡില്‍ അയച്ചു. ഭീകര മുക്തമായ സുസ്ഥിര ഇന്ത്യ വേണം എന്നാണ് കത്തുകളിലെ സന്ദേശമെന്നും മന്‍ കി ബാത്തില്‍ പ്രധാനമന്ത്രി പറഞ്ഞു.
കാലുകളും കൈകളും ബന്ധിച്ച് മൂന്നര കിലോമീറ്റര്‍ നീന്തി ഉഡുപ്പിയിലെ അറുപത്താറുകാരനായ നീന്തല്‍താരം ഗംഗാധര്‍ ജി. കടേക്കര്‍ റിക്കാര്‍ഡിട്ടു. ഗോള്‍ഡന്‍ ബുക്ക് ഓഫ് വേള്‍ഡ് റെക്കോര്‍ഡിലേക്കാണ് ഗംഗാധര്‍ നീന്തിക്കയറിയത്. സെന്റ് മേരീസ് ഐലന്‍ഡില്‍നിന്ന് പദുക്കരെവരെ അഞ്ച് മണിക്കൂറും 35 മിനിറ്റും കൊണ്ട് അദ്ദേഹം നീന്തിയെത്തി.
ഡല്‍ഹിയില്‍ ബലാത്സംഗത്തിന് ഇരയായ പെണ്‍കുട്ടിയെ അപമാനിച്ച സംഭവത്തില്‍ പതിന്നാലുകാരന്‍കൂടി പിടിയിലായി. ലൈംഗീകാതിക്രമം നടത്തിയതിനാണ് പതിനാലുകാരന്‍ പിടിയിലായത്. ഇതോടെ അറസ്റ്റിലായവരുടെ എണ്ണം പന്ത്രണ്ടായി. ഇതുവരെ എട്ടു സ്ത്രീകളും ഒരു പുരുഷനും പ്രായപൂര്‍ത്തിയാകാത്ത മുന്ന് ആണ്‍കുട്ടികളുമാണ് അറസ്റ്റിലായത്.
പഞ്ചാബില്‍ താനാണു കോണ്‍ഗ്രസിന്റെ മുഖ്യമന്ത്രി സ്ഥാനാര്‍ഥിയെന്ന് കോണ്‍ഗ്രസ് നേതാവ് പ്രദീപ് സിംഗ് ബാജ്വാ. ഹൈക്കമാന്‍ഡ് ആരെ പ്രഖ്യാപിക്കുമെന്ന് പറയാനാകില്ല. എന്നാല്‍ മുഖ്യമന്ത്രി സ്ഥാനാര്‍ത്ഥിയാവാന്‍ ചന്നിക്കൊപ്പം താനും അര്‍ഹനാണ്. ചന്നി രണ്ടു തവണ മുഖ്യമന്ത്രിയായതിനാല്‍ ഇനി മാറിനില്‍ക്കണമെന്നും അദ്ദേഹം നിര്‍ദേശിച്ചു.
മതപരിവര്‍ത്തനത്തിനെതിരെ നിയമം കൊണ്ടുവരണമെന്നും എന്നാല്‍ അതിന്റെ പേരില്‍ ആരെയും തെറ്റായി ഉപദ്രവിക്കരുതെന്നും ആം ആദ്മി പാര്‍ട്ടി നേതാവ് അരവിന്ദ് കേജരിവാള്‍. ജലന്ധറില്‍ പൊതുസമ്മേളനത്തില്‍ സംസാരിക്കുകയായിരുന്നു കേജരിവാള്‍.
അമേരിക്കയില്‍ അതിശൈത്യം. നിരവധി സംസ്ഥാനങ്ങളില്‍ രണ്ടടിയോളം മഞ്ഞു വീണു. ജനജീവിതം സ്തംഭിച്ച അവസ്ഥയാണ്. നാലായിരത്തിലധികം വിമാന സര്‍വീസുകള്‍ റദ്ദാക്കി.
അമേരിക്കയില്‍ പണപ്പെരുപ്പം കുതിച്ചുയരുന്നു. കഴിഞ്ഞ വര്‍ഷം 5.8 ശതമാനമാണ് പണപ്പെരുപ്പ നിരക്ക് ഉയര്‍ന്നത്. 1983 ന് ശേഷമുളള ഏറ്റവും ഉയര്‍ന്ന പണപ്പെരുപ്പമാണിത്. നിത്യോപയോഗ സാധനങ്ങള്‍ക്കടക്കം വന്‍ വിലക്കയറ്റമാണ്. വിലക്കയറ്റം നിയന്ത്രിക്കാന്‍ പലിശ നിരക്ക് മാറ്റേണ്ടിവരുമെന്ന് അമേരിക്കന്‍ ഫെഡറല്‍ റിസര്‍വ് സൂചനകള്‍ നല്‍കി.
ഇന്ത്യന്‍ സൂപ്പര്‍ ലീഗില്‍ കുതിപ്പ് തുടരാന്‍ കേരള ബ്ലാസ്റ്റേഴ്സ് ഇന്ന് കളത്തിലിറങ്ങും. ബാംഗ്ളൂരു എഫ്സിക്കെതിരെ രാത്രി 7.30 നാണ് മത്സരം.
അണ്ടര്‍-19 ക്രിക്കറ്റ് ലോകകപ്പില്‍ നിലവിലെ ചാമ്പ്യന്‍മാരായ ബംഗ്ലാദേശിനെ അഞ്ച് വിക്കറ്റിന് തകര്‍ത്ത് ഇന്ത്യ സെമിയിലെത്തി. ആദ്യം ബാറ്റ് ചെയ്ത ബംഗ്ലാദേശ് ഉയര്‍ത്തിയ 112 റണ്‍സിന്റെ വിജയലക്ഷ്യം 115 പന്ത് ബാക്കിനില്‍ക്കേ അഞ്ച് വിക്കറ്റ് നഷ്ടത്തില്‍ ഇന്ത്യ മറികടന്നു. 65 പന്തില്‍ 44 റണ്‍സെടുത്ത ഓപ്പണര്‍ ആങ്ക്രിഷ് രഘുവംശിയാണ് ഇന്ത്യയുടെ ടോപ് സ്‌കോറര്‍.
ഓസ്ട്രേലിയന്‍ ഓപ്പണ്‍ ടെന്നിസ് പുരുഷ ചാമ്പ്യനെ ഇന്നറിയാം. ഇന്ന് നടക്കുന്ന ഫൈനലില്‍ റഷ്യന്‍ താരം ദാനില്‍ മെദ്വദേവും സ്പാനിഷ് ഇതിഹാസം റാഫേല്‍ നദാലും ഏറ്റുമുട്ടും. മെദ്വദേവ് രണ്ടാം സീഡും നദാല്‍ ആറാം സീഡുമാണ്. 21-ാം ഗ്രാന്‍ഡ്സ്ലാം കിരീടത്തിലൂടെ ചരിത്രനേട്ടത്തിലെത്താനാണ് നദാലിന്റെ ശ്രമം. ഇരുവരും ഇതിന് മുന്പ് ഏറ്റുമുട്ടിയ നാല് മത്സരങ്ങളില്‍ മൂന്നിലും നദാല്‍ ആണ് ജയിച്ചത്.
ദിവാന്‍ ഹൗസിംഗ് ഫിനാന്‍സ് കോര്‍പ്പറേഷന്‍ ലിമിറ്റഡിന്റെ ഏറ്റെടുക്കലിനുശേഷം കമ്പനിയുടെ ഏകീകരണ, വിപുലീകരണ പദ്ധതികളുടെ ഭാഗമായി പിരമല്‍ എന്റര്‍പ്രൈസസ് ലിമിറ്റഡിന്റെ പൂര്‍ണ ഉടമസ്ഥതയിലുള്ള പിരാമല്‍ ക്യാപിറ്റല്‍ ആന്‍ഡ് ഹൗസിംഗ് ഫിനാന്‍സ് ലിമിറ്റഡ് 2,000 തൊഴിലവസരങ്ങള്‍ സൃഷ്ടിക്കാന്‍ ഒരുങ്ങുന്നു. 'പ്രോജക്റ്റ് സംഗമം' എന്ന പേരില്‍ ഒരു പ്രോഗ്രാമിന് കീഴില്‍, പഴയ ഡിഎച്ച്എഫ്എല്‍ ഗ്രൂപ്പിലെ 3,000-ത്തിലധികം ജീവനക്കാരെ പിസിഎച്ച്എഫ്എല്‍ സംയോജിപ്പിച്ചു. ലയിപ്പിച്ച സ്ഥാപനത്തില്‍ കഴിഞ്ഞ മൂന്ന് മാസത്തിനുള്ളില്‍ ഇതിനകം 2,000 അവസരങ്ങള്‍ ഉണ്ടായി. 301 ശാഖകളുടെ ശൃംഖലയുള്ള പിസിഎച്ച്എഫ്എല്ലിന് 24 സംസ്ഥാനങ്ങളിലായി 1 ദശലക്ഷത്തിലധികം ഉപഭോക്താക്കളുണ്ട്.
ബാങ്കുകളുടെ കിട്ടാക്കട പ്രതിസന്ധി പരിഹരിക്കാനായി സര്‍ക്കാര്‍ രൂപീകരിച്ച നാഷനല്‍ അസറ്റ് റീ കണ്‍സ്ട്രക്ഷന്‍ കമ്പനി ലിമിറ്റഡ് (എന്‍എആര്‍സിഎല്‍) മാര്‍ച്ച് 31ന് മുന്‍പായി വിവിധ ബാങ്കുകളില്‍ നിന്നായി 50,335 കോടി രൂപയുടെ നിഷ്‌ക്രിയ ആസ്തി ഏറ്റെടുക്കും. വിവിധ ബാങ്കുകളിലായി 82,845 കോടി രൂപയുടെ കിട്ടാക്കടമാണ് എന്‍എആര്‍സിഎല്‍ അഥവാ ബാഡ് ബാങ്കിലേക്ക് കൈമാറാനായി കണ്ടുവച്ചിരിക്കുന്നത്. ബാങ്കുകളുടെ കിട്ടാക്കടം ഏറ്റെടുക്കുന്ന എന്‍എആര്‍സിഎല്‍, പണയവസ്തുക്കള്‍ വിറ്റ് പണമീടാക്കും. ബാങ്കുകളുടെ മോശം ആസ്തി ഏറ്റെടുക്കുന്ന ബാങ്ക് എന്ന നിലയ്ക്കാണ് ഇതിനെ ബാഡ് ബാങ്ക് എന്നു വിളിക്കുന്നത്.
കേരളത്തിനൊപ്പമായിരുന്നു ഹൃദയത്തിന്റെ യുഎസ്, കാനഡ റിലീസ്. ജനുവരി 21ന് തിയറ്ററുകളിലെത്തിയ ചിത്രം രണ്ടാം വാരത്തിലേക്ക് കടക്കുമ്പോഴും മികച്ച പ്രതികരണമാണ് നേടുന്നത്. വെള്ളിയാഴ്ചത്തെ മാത്രം യുഎസ് കളക്ഷന്‍ 15,862 ഡോളറും കാനഡ കളക്ഷന്‍ 2842 ഡോളറുമാണ്. യുഎസില്‍ നിന്ന് ഒരാഴ്ച കൊണ്ട് നേടിയത് 1.6 ലക്ഷം ഡോളറും കാനഡയില്‍ നിന്ന് നേടിയത് 29,104 ഡോളറുമാണ്. ഇതുവരെയുള്ള നോര്‍ത്ത് അമേരിക്കന്‍ കളക്ഷന്‍ ആകെ 1.89 ലക്ഷം ഡോളര്‍ ആണ്. അതായത് 1.42 കോടി ഇന്ത്യന്‍ രൂപ. ഓസ്ട്രേലിയയില്‍ നിന്ന് രണ്ട് ദിവസം കൊണ്ട് 28.22 ലക്ഷം രൂപയും ന്യൂസിലന്‍ഡില്‍ നിന്ന് 13.49 ലക്ഷം രൂപയുമാണ് ചിത്രം നേടിയിരിക്കുന്നത്.
പൃഥ്വിരാജിന്റെ സംവിധാനത്തില്‍ മോഹന്‍ലാല്‍ നായകനായ ബ്രോ ഡാഡി ഡിസ്നി പ്ലസ് ഹോട്ട്സ്റ്റാറിലൂടെയാണ് ചിത്രം പ്രേക്ഷകര്‍ക്ക് മുന്നിലെത്തിയത്. ഹോട്സ്റ്റാറില്‍ പുതിയ റെക്കോര്‍ഡുകള്‍ സൃഷ്ടിച്ചിരിക്കുകയാണ് ബ്രോ ഡാഡി. ഹോട്ട്സ്റ്റാറിന്റെ ചരിത്രത്തില്‍ ആദ്യദിനത്തില്‍ ഏറ്റവും അധികം സബ്സ്‌ക്രിപ്ഷനും, ആദ്യദിനത്തില്‍ ഏറ്റവും കൂടുതല്‍ വാച്ച് ടൈമുള്ള രണ്ടാമത്തെ സിനിമയുമായിരിക്കുകയാണ് ബ്രോ ഡാഡി. പൃഥ്വിരാജാണ് സോഷ്യല്‍ മീഡിയയിലൂടെ ഇക്കാര്യം അറിയിച്ചത്.
ജാപ്പനീസ് വാഹന ബ്രാന്‍ഡായ ടൊയോട്ട തങ്ങളുടെ മാരുതി റീ ബാഡ്ജ് പതിപ്പുകളായ ഗ്ലാന്‍സ, അര്‍ബന്‍ ക്രൂയിസര്‍ എന്നീ കാറുകള്‍ ഒരുമിച്ച് ഇന്ത്യയില്‍ ഒരു ലക്ഷം യൂണിറ്റ് വില്‍പ്പന നാഴികക്കല്ല് പിന്നിട്ടു. മാരുതിയില്‍ നിന്നുള്ള റീ ബാഡ്ജ് പകതിപ്പുകളായ ഈ രണ്ട് കാറുകളും ആദ്യമായി 2019 ന്റെ രണ്ടാം പകുതിയില്‍ ആണ് ഇന്ത്യയില്‍ അവതരിപ്പിച്ചത്. ഈ മോഡലുകള്‍ക്ക് ടൊയോട്ട ഉപഭോക്താക്കളില്‍ നിന്ന് ഉയര്‍ന്ന ഡിമാന്‍ഡ് ലഭിച്ചു. ഗ്ലാന്‍സയ്ക്ക് 65,000 യൂണിറ്റ് വില്‍പ്പനയും അര്‍ബന്‍ ക്രൂയിസര്‍ 35,000 യൂണിറ്റിലധികം മൊത്തവ്യാപാരവും രേഖപ്പെടുത്തി.
യോഗാപരിശീലനത്തിലൂടെ നമ്മുടെ കുട്ടികള്‍ ചുറുചുറുക്കുള്ളവരായി, ആത്മവിശ്വാസമുള്ളവരായി വളരുന്നു. ഉള്‍ചൈതന്യത്തെ പ്രപഞ്ച ചൈതന്യവുമായി കണ്ണിചേര്‍ക്കുന്നു. ഈ കൈപ്പുസ്തകത്തിലെ യോഗാപാഠങ്ങളിലൂടെ നിങ്ങളുടെ കുരുന്നുകള്‍ ശരീരത്തെയും മനസ്സിനെയും ഉറ്റചങ്ങാതിമാരാക്കുന്നു. സൂര്യനമസ്‌കാരത്തിലേക്കും ശ്വസനക്രിയകളിലേക്കും കുസൃതി നിലകളിലേക്കും ധ്യാനാസനങ്ങളിലേക്കുമൊക്കെ പടിപടിയായി മുന്നേറുന്ന ഈ പുസ്തകം അവര്‍ക്ക് ഒരു 'ഹെല്‍ത്ത് ടോണിക്' ആകും. 'കുട്ടികളുടെ യോഗ'. സുമ പിള്ള. എച്ച്ആന്‍ഡ്സി ബുക്സ്. വില 120 രൂപ.
രാവിലെ ഒരു കപ്പ് മല്ലി വെള്ളം കുടിച്ച് കൊണ്ട് ദിവസം ആരംഭിക്കുന്നത് ആരോഗ്യത്തിന് അത്യുത്തമമാണെന്ന് ഡയറ്റീഷന്മാര്‍ പറയുന്നു. ഇതിനായി ഒരു ടീ സ്പൂണ്‍ മല്ലി ഒരു കപ്പ് വെള്ളത്തില്‍ രാത്രിയില്‍ കുതിര്‍ത്ത് വയ്ക്കണം. പിറ്റേന്ന് രാവിലെ ഈ വെള്ളം കുടിക്കാവുന്നതാണ്. ഇത്തരത്തില്‍ മല്ലി വെള്ളം കുടിച്ചാലുള്ള ഗുണങ്ങള്‍ ഇനി പറയുന്നവയാണ്. മല്ലിയില്‍ അടങ്ങിയിരിക്കുന്ന ആന്റി ഓക്സിഡന്റുകള്‍ നമ്മുടെ ശരീരത്തിലെ ഫ്രീ റാഡിക്കല്‍സിനെ കുറച്ച് പ്രതിരോധശേഷി വര്‍ധിപ്പിക്കുന്നതാണ്. പല രോഗങ്ങളെയും തടയാന്‍ ഇത് വഴി സാധിക്കും. വൈറ്റമിന്‍ കെ, സി, എ എന്നിവ സമൃദ്ധമായി അടങ്ങിയ മല്ലി മുടികള്‍ തഴച്ചു വളരാനും അവയെ കരുത്തുറ്റതാക്കാനും സഹായിക്കും. മുടി പൊഴിയുന്നത് കുറയ്ക്കാനും അവ പൊട്ടി പോകാതിരിക്കാനും മല്ലിയിലെ പോഷണങ്ങള്‍ സഹായിക്കും. എണ്ണയില്‍ ചേര്‍ത്തും മല്ലി തലയില്‍ തേയ്ക്കുന്നത് നല്ലതാണ്. ദഹന സംവിധാനത്തെ മെച്ചപ്പെടുത്താനും ചയാപചയം വര്‍ധിപ്പിക്കാനും രാവിലെ മല്ലി വെള്ളം കുടിക്കുന്നതിലൂടെ സാധിക്കും. ഇത് ഭാരം കുറയ്ക്കാനും സഹായകമാണ്. മല്ലിയില്‍ ഇരുമ്പിന്റെയും സാന്നിധ്യം ധാരാളമുണ്ട്. ഇതിന്റെ ആന്റി ഫംഗല്‍, ആന്റി ബാക്ടീരിയല്‍ ഗുണങ്ങള്‍ ചര്‍മത്തില്‍ കുരുക്കളുണ്ടാകുന്നത് തടയുകയും ചര്‍മം മൃദുവാക്കി തിളക്കം നല്‍കുകയും ചെയ്യും. ഉയര്‍ന്ന കൊളസ്ട്രോള്‍ ഉള്ളവര്‍ക്കും രാവിലെ ഒരു കപ്പ് മല്ലി വെള്ളം കുടിക്കുക എന്ന ശീലം പിന്തുടരാവുന്നതാണ്. കൊളസ്ട്രോള്‍ കുറയ്ക്കാനും ഇത് സഹായിക്കും. പ്രമേഹ നിയന്ത്രണത്തിനും സഹായിക്കുന്ന ഉത്തമ ഔഷധമാണ് മല്ലി വെള്ളം.
