പ്രധാനപ്പെട്ട വാർത്തകൾ ഒറ്റനോട്ടത്തിൽ
2022 | ഫെബ്രുവരി 3 | വ്യാഴം | 1197 | മകരം 20 | ചതയം
ഇന്ത്യന്‍ സര്‍വകലാശാലകള്‍ക്കു വിദേശത്ത് കാമ്പസുകള്‍ തുറക്കാനുള്ള മാര്‍ഗരേഖ തയ്യാറാക്കാര്‍ ഉന്നതതല സമിതിക്കു കേന്ദ്രസര്‍ക്കാര്‍ രൂപം നല്‍കി. ഏഴ് ഐഐടികളുടെ ഡയറക്ടര്‍മാരും നാലു കേന്ദ്ര സര്‍വകലാശാലകളുടെ വൈസ് ചാന്‍സലര്‍മാരും അടങ്ങുന്ന 16 അംഗ സമിതിയാണ് രൂപീകരിച്ചത്. ഐഐടി കൗണ്‍സില്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഡോ കെ രാധാകൃഷ്ണനാണ് സമിതിയുടെ അധ്യക്ഷന്‍.
ഡിപിആറില്‍ പൂര്‍ണവിവരം ഇല്ലാത്തതിനാല്‍ കെ റെയില്‍ പദ്ധതിക്ക് ഇപ്പോള്‍ അനുമതി നല്‍കാനാകില്ലെന്ന കേന്ദ്രസര്‍ക്കാര്‍ നിലപാടിനെതിരേ സിപിഎം പാര്‍ലമെന്റില്‍. എളമരം കരീമാണ് വിഷയം രാജ്യസഭയില്‍ ഉന്നയിച്ചത്. കേരളത്തിന്റെ വികസന പദ്ധതിക്ക് അനുമതി നിഷേധിക്കരുതെന്ന് ശൂന്യവേളയില്‍ അദ്ദേഹം ആവശ്യപ്പെട്ടു. എന്നാല്‍ ഇതിനെ കോണ്‍ഗ്രസ് എംപി കെസി വേണുഗോപാല്‍ എതിര്‍ത്തു.
സില്‍വര്‍ ലൈന്‍ പദ്ധതിക്ക് 2019 ഡിസംബറില്‍ കേന്ദ്രാനുമതി ലഭിച്ചെന്ന് ധനമന്ത്രി കെ എന്‍ ബാലഗോപാല്‍ വാര്‍ത്താസമ്മേളനത്തില്‍ അവകാശപ്പെട്ടു. അന്നു കേന്ദ്രം അയച്ച കത്ത് വായിച്ചുകൊണ്ടാണ് ബാലഗോപാല്‍ അനുമതിയുണ്ടെന്നു വിശദീകരിച്ചത്.
ലോകായുക്ത ജസ്റ്റിസ് സിറിയക് ജോസഫ് അലസ ജീവിത പ്രേമിയാണെന്ന് കെ.ടി. ജലീലിന്റെ പരിഹാസം. വിധി പ്രസ്താവിക്കാത്ത ന്യായാധിപനെന്നും ഫെയ്സ് ബുക്കില്‍ കുറിച്ചു. സുപ്രീം കോടതിയില്‍ മൂന്നര വര്‍ഷത്തിനിടെ പറഞ്ഞത് ഏഴു വിധികള്‍ മാത്രം. വിധി ന്യായങ്ങള്‍ തയ്യാറാക്കിയത് ബെഞ്ചിലെ മറ്റു ജഡ്ജിമാരാണെന്നും ജലീല്‍ പരിഹസിച്ചു.
സില്‍വര്‍ ലൈന്‍ പദ്ധതിയുടെ ഡിപിആര്‍ അപൂര്‍ണമാണെന്ന പരാതിയുമായി അന്‍വര്‍ സാദത്ത് എംഎല്‍എ നിയമസഭാ സ്പീക്കര്‍ക്കു കത്തു നല്‍കി. അന്‍വര്‍ സാദത്ത് അവകാശ ലംഘനത്തിന് നോട്ടീസ് നല്‍കിയതിനു പിറകേയാണ് ഡിപിആര്‍ പുറത്തുവിട്ടത്. പല പ്രധാന കാര്യങ്ങളും സര്‍ക്കാര്‍ മറച്ചുവച്ചിരിക്കുകയാണ്. അലൈന്‍മെന്റിന്റെ ഡ്രോയിംഗ് പൂര്‍ണമല്ല. സാമ്പത്തിക- സാങ്കേതിക പഠനം പൂര്‍ണമല്ല. സ്പീക്കര്‍ക്ക് നല്‍കിയ പരാതിയില്‍ പറയുന്നു. പൂര്‍ണമായ ഡിപിആര്‍ പുറത്തുവിടണമെന്നാവശ്യപ്പെട്ടാണ് കത്ത്.
നെടുമ്പാശ്ശേരി വിമാനത്താവളത്തിലെ സ്വര്‍ണ്ണക്കടത്ത് കേസുമായി ബന്ധപ്പെട്ട് തമിഴ്-കന്നഡ നടി അക്ഷര റെഡ്ഡിയെ എന്‍ഫോഴ്സ്‌മെന്റ് ഡയറക്ട്രേറ്റ് ചോദ്യം ചെയ്യുന്നു. കോഴിക്കോട് ഇഡി ഓഫീസിലാണ് ചോദ്യംചെയ്യുന്നത്. 2013 ല്‍ വടകര സ്വദേശി ഫായിസ് ഉള്‍പ്പെട്ട സംഘം 20 കിലോ സ്വര്‍ണം കടത്തിയെന്ന കേസിലാണ് ചോദ്യം ചെയ്യല്‍.
കരുവന്നൂര്‍ ബാങ്ക് കണ്‍സോര്‍ഷ്യവുമായി യുഡിഎഫ് ഭരിക്കുന്ന സഹകരണ സംഘങ്ങളും സഹകരിക്കുമെന്ന് കേരള ബാങ്ക് വൈസ് ചെയര്‍മാന്‍ എം.കെ കണ്ണന്‍. സഹകരിക്കാത്ത സംഘങ്ങള്‍ക്ക് എങ്ങനെ മുന്നോട്ടു പോകാനാകുമെന്നും എ.കെ കണ്ണന്‍ ചോദിച്ചു. സഹകരിക്കില്ലെന്ന ഡിസിസി പ്രസിഡന്റിന്റെ പ്രസ്താവന വിഷയത്തെക്കുറിച്ചു വിവരമില്ലാത്തതിനാലാണ്. പല യുഡിഎഫ് ബാങ്കുകളും കണ്‍സോര്‍ഷ്യത്തിന്റെ ഭാഗമാകാന്‍ സമ്മതപത്രം തന്നുവെന്നും കേരള ബാങ്ക് വൈസ് ചെയര്‍മാന്‍ എം കെ കണ്ണന്‍ വ്യക്തമാക്കി.
പാമ്പുകടിയേറ്റ് കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന വാവാ സുരേഷിനെ വെന്റിലേറ്ററില്‍ നിന്ന് ഐസിയുവിലേക്കു മാറ്റി. സുരേഷിന് സ്വന്തമായി ശ്വാസമെടുക്കാന്‍ കഴിയുന്നുണ്ട്. ഡോക്ടര്‍മാരോടും ആരോഗ്യപ്രവര്‍ത്തകരോടും സംസാരിച്ചു.
നടിയെ ആക്രമിച്ച കേസിലെ തുടരന്വേഷണം തടയണമെന്നാവശ്യപ്പെട്ട് ഹൈക്കോടതിയില്‍ ദിലീപിന്റെ ഹര്‍ജി. തുടരന്വേഷണം ആവശ്യപ്പെട്ട് അന്വേഷണസംഘം വിചാരണ കോടതിയില്‍ നല്‍കിയ റിപ്പോര്‍ട്ട് റദ്ദാക്കണമെന്നാണ് ദിലീപിന്റെ ആവശ്യം. വിചാരണ വേഗത്തിലാക്കാന്‍ വിചാരണക്കോടതിക്കു നിര്‍ദ്ദേശം നല്‍കണമെന്നും ദിലീപ് ആവശ്യപ്പെട്ടിട്ടുണ്ട്. വിചാരണക്കോടതിയുടെ അനുമതിയില്ലാതെയാണ് അന്വേഷണം നടത്തുന്നത്. ദിലീപ് വാദിച്ചു. അന്വേഷണ ഉദ്യോഗസ്ഥരെ കൊല്ലാന്‍ ശ്രമിച്ചെന്ന കേസില്‍ ദിലീപിന്റെ മുന്‍കൂര്‍ ജാമ്യഹര്‍ജി ഹൈക്കോടതിയുടെ പരിഗണനയിലാണ്.
ദിലീപിന്റേതടക്കം നാലു പ്രതികളുടെ ആറു ഫോണുകള്‍ തിരുവനന്തപുരത്തെ സൈബര്‍ ഫോറന്‍സിക് ലാബിലേക്ക് അയക്കാന്‍ ആലുവ മജിസ്ട്രേറ്റ് കോടതി ഉത്തരവിട്ടു. ആറ് ഫോണുകളും തിരുവനന്തപുരത്തെ ലാബില്‍ പരിശോധിക്കും. അണ്‍ലോക്ക് പാറ്റേണ്‍ കോടതിയില്‍ പരിശോധിക്കണം എന്ന പ്രോസിക്യൂഷന്‍ ആവശ്യം തള്ളിയാണ് ആലുവ മജിസ്ട്രേറ്റ് കോടതിയുടെ ഉത്തരവ്.
തിരുവനന്തപുരം കോര്‍പറേഷനിലെ നികുതി വെട്ടിപ്പില്‍ സസ്പെന്‍ഷനിലുള്ള കാഷ്യര്‍ക്കെതിരെ വീണ്ടും കേസ്. സോണല്‍ ഓഫീസിലെ കാഷ്യറായിരുന്ന അന്‍സില്‍ കുമാറിനെതിരെയാണ് കഴക്കൂട്ടം പൊലീസ് കേസെടുത്തത്. കഴക്കൂട്ടം സോണല്‍ ഓഫീസില്‍ രണ്ടര ലക്ഷത്തിന്റെ തട്ടിപ്പു കണ്ടെത്തിയതിനെത്തുടര്‍ന്നാണ് പുതിയ കേസ്. നികുതിയിനത്തിലും കുടിവെള്ള കണക്ഷന് റോഡ് വെട്ടിപ്പൊളിക്കുന്നതിനും ജനങ്ങള്‍ അടച്ച പണമാണ് അന്‍സില്‍ തട്ടിയെടുത്തത്. പണമടയ്ക്കുന്നവര്‍ക്ക് രസീത് നല്‍കാറുണ്ടെങ്കിലും രജിസ്റ്ററില്‍ രസീത് ക്യാന്‍സല്‍ ചെയ്താണ് തട്ടിപ്പു നടത്തിയത്.
നെടുമ്പാശ്ശേരി വിമാനത്താവളത്തിലെ റാപ്പിഡ് ആര്‍ടിപിസിആര്‍ ടെസ്റ്റിനുള്ള അമിത നിരക്ക് കുറയ്ക്കണമെന്ന് പ്രധാനമന്ത്രി നരേന്ദ്രമോദിയുടെ ഓഫീസ് മുഖ്യമന്ത്രിയോട് ആവശ്യപ്പെട്ടു. നിരക്കു കുറയ്ക്കണമെന്ന് ആവശ്യപ്പെട്ട് കെപിസിസി സെക്രട്ടറി അഡ്വ. ഷാജി കോടങ്കണ്ടത്ത് പ്രധാനമന്ത്രിക്ക് അയച്ച കത്തിലാണ് അടിയന്തര നടപടി. വിമാനത്താവളത്തിലെ ആര്‍ടിപിസിആര്‍ ടെസ്റ്റിന് 2490 രൂപയാണ്. ദിവസേന രണ്ടായിരം യാത്രക്കാരില്‍നിന്നായി കഴിഞ്ഞ വര്‍ഷം ലാബുകാര്‍ 18 കോടിയോളം രൂപ പിരിച്ചെടുത്തു. കോഴിക്കോട് എയര്‍പോര്‍ട്ടില്‍ 1380 രൂപയാണ് ഈടാക്കുന്നത്. അഡ്വ. ഷാജി ചൂണ്ടിക്കാട്ടി.
മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയായിരുന്ന എം ശിവശങ്കറിന്റെ ആത്മകഥയുടെ പേര് 'അശ്വത്ഥാമാവ് വെറും ഒരു ആന'. മുഖ്യമന്ത്രിക്കും തനിക്കുമെതിരേ ഗൂഡാലോചന നടന്നെന്ന് പുസ്തകത്തില്‍ വിവരിക്കുന്നു. ജയിലിലെ അനുഭവങ്ങള്‍, അന്വേഷണ ഏജന്‍സികളുടെ സമീപനം തുടങ്ങിയവ വിവരിക്കുന്ന പുസ്തകം ശനിയാഴ്ച പുറത്തിറങ്ങും.
പാലിയേക്കര ടോള്‍പ്ലാസയില്‍ എംഎല്‍എയുടെ നേതൃത്വത്തില്‍ ഓഫീസ് ഉപരോധം. തദ്ദേശീയര്‍ക്ക് അനുവദിച്ച സൗജന്യ യാത്രാ പാസില്‍ നിയന്ത്രണം ഏര്‍പ്പെടുത്തിയതില്‍ പ്രതിഷേധിച്ചാണ് ഉപരോധം. പത്തു കിലോമീറ്റര്‍ ചുറ്റളവില്‍ താമസിക്കുന്ന ആറു പഞ്ചായത്തിലെ തദ്ദേശവാസികള്‍ക്ക് സൗജന്യ പാസ് അനുവദിച്ചിരുന്നു. ഒരു വീട്ടില്‍ ഒരു വാഹനത്തിന് മാത്രമേ പാസ് അനുവദിക്കൂവെന്ന നിലപാടിനെതിരേയാണ് സമരം.
തൃശൂര്‍ പെരിങ്ങോട്ടുകരയിലെ പോസ്റ്റോഫീസിനു മോഷ്ടാക്കള്‍ തീയിട്ടു. മുന്‍വശത്തെ വാതില്‍ കുത്തിത്തുറന്ന് അകത്തുകടന്ന മോഷ്ടാക്കള്‍ മണ്ണെണ്ണ ഒഴിച്ച് തീയിടുകയായിരുന്നു. കംപ്യൂട്ടര്‍, തപാല്‍ ഉരുപ്പിടികള്‍ തുടങ്ങിയവ കത്തിനശിച്ചു.
മൂന്നാറില്‍ താപനില മൈനസ് ഡിഗ്രിയിലെത്തി. ഡിസംബര്‍ ആദ്യവാരത്തില്‍ ശൈത്യം ആരംഭിക്കുന്ന മൂന്നാറില്‍ ഇത്തവണ ആദ്യമായാണ് മൈനസ് ഡിഗ്രിയിലെത്തുന്നത്. മൂന്നാര്‍ ചെണ്ടുവര എസ്റ്റേറ്റിലാണ് മൈനസ് ഒരു ഡിഗ്രി തണുപ്പ് രേഖപ്പെടുത്തിയത്.
കോണ്‍ഗ്രസ് നേതാവ് രാഹുല്‍ ഗാന്ധിയുടെ ലോക്സഭയിലെ പരാമര്‍ശത്തിനെതിരെ ബിജെപി അവകാശലംഘന നോട്ടീസ് നല്‍കി. നിഷികാന്ത് ദുബൈ എംപിയാണ് അവകാശലംഘന നോട്ടീസ് നല്കിയത്. രാഷ്ട്രപതിയുടെ പ്രസംഗത്തിനുള്ള നന്ദിപ്രമേയത്തില്‍ സംസാരിക്കവേ രാഹുല്‍ നടത്തിയ പരാമര്‍ശങ്ങള്‍ക്കെതിരെയാണ് ബിജെപിയുടെ നോട്ടീസ്
ചന്ദ്രയാന്‍ 3 അടുത്ത ഓഗസ്റ്റില്‍ വിക്ഷേപിക്കുമെന്ന് പ്രധാനമന്ത്രിയുടെ ഓഫീസിന്റെ ചുമതലയുള്ള കേന്ദ്ര സഹമന്ത്രി ജിതേന്ദ്ര സിംഗ്. ലോകസഭയില്‍ നല്‍കിയ മറുപടിയിലാണ് ഈ വിവരം. ചന്ദ്രയാന്‍ രണ്ട് ദൗത്യത്തില്‍നിന്ന് ലഭിച്ച വിവരങ്ങള്‍ ദേശീയ തലത്തിലുള്ള വിദഗ്ധര്‍ വിശകലനം ചെയ്തുവെന്നും ചന്ദ്രയാന്‍ മൂന്നിനായുള്ള ജോലികള്‍ പുരോഗമിക്കുന്നുവെന്നുമാണ് ജിതേന്ദ്ര സിംഗ് ലോകസഭയെ അറിയിച്ചത്.
ഇലക്ട്രോണിക് ഉപകരണ നിര്‍മാതാക്കളായ വി-ഗാര്‍ഡ് ഇന്‍ഡസ്ട്രീസ് നടപ്പു സാമ്പത്തിക വര്‍ഷം ഡിസംബര്‍ 31ന് അവസാനിച്ച മൂന്നാം പാദത്തില്‍ 967.38 കോടി രൂപ ഏകീകൃത അറ്റവരുമാനം നേടി. മുന്‍ വര്‍ഷം ഇതേ പാദത്തിലെ 835.04 കോടി രൂപയില്‍ നിന്ന് ഇത്തവണ 16 ശതമാനം വര്‍ധനയാണ് രേഖപ്പെടുത്തിയത്. ഈ പാദത്തില്‍ കമ്പനിയുടെ ഏകീകൃത അറ്റാദായം 53.92 കോടി രൂപയാണ്. മുന്‍ വര്‍ഷം ഇതേപാദത്തില്‍ ഇത് 78.25 കോടി രൂപയായിരുന്നു. എല്ലാ വിഭാഗങ്ങളിലും വളര്‍ച്ച കൈവരിച്ചു. കിച്ചന്‍, കണ്‍സ്യൂമര്‍ ഉപകരണങ്ങളുടെ വില്‍പ്പനയില്‍ മികച്ച വര്‍ധനയുണ്ടായി.
തുടര്‍ച്ചയായി മൂന്ന് ദിവസം മാറ്റമില്ലാതെ തുടര്‍ന്ന സ്വര്‍ണ വിലയില്‍ മുന്നേറ്റം. 160 രൂപ വര്‍ധിച്ച് ഒരു പവന്‍ സ്വര്‍ണത്തിന്റെ വില 36,080 രൂപയായി. ഗ്രാമിന് 20 രൂപ വര്‍ധിച്ചു. 4510 രൂപയാണ് ഒരു ഗ്രാം സ്വര്‍ണത്തിന്റെ വില. കഴിഞ്ഞ മാസം 26ന് 36,720 രൂപ വരെ വര്‍ധിച്ച് സ്വര്‍ണവില ജനുവരിയിലെ ഏറ്റവും ഉയര്‍ന്ന നിലവാരത്തില്‍ എത്തിയിരുന്നു. പിന്നീടുള്ള ദിവസങ്ങളില്‍ വില താഴ്ന്ന സ്വര്‍ണവില 35920 രൂപ വരെ താഴ്ന്ന ശേഷമാണ് ഇന്ന് മുന്നേറിയത്.
തെലുങ്ക് ബോക്‌സോഫീസില്‍ വലിയ തരംഗം സൃഷ്ടിച്ച ചിത്രം 'അഖണ്ഡയ്ക്ക് രണ്ടാം ഭാഗം ഒരുങ്ങുന്നു. 2023ല്‍ ചിത്രം ആരംഭിക്കും. ബോയപതി ശ്രീനു തന്നെയായിരിക്കും അഖണ്ഡ രണ്ടാം ഭാഗവും സംവിധാനം ചെയ്യുക. ബാലകൃഷ്ണയും ശ്രീനുവും ഒന്നിക്കുന്ന നാലാമത്തെ ചിത്രമാകും അഖണ്ഡ രണ്ടാം ഭാഗം. നേരത്തെ സിംഹ, ലെജന്റ്, അഖണ്ഡ എന്നീ ചിത്രങ്ങളാണ് ഇരുവരും ചേര്‍ന്ന് ഒരുക്കിയത്. നന്ദമൂരി ബാലകൃഷ്ണ ബാലയ്യയുടെ കരിയര്‍ ബെസ്റ്റ് ചിത്രം എന്നാണ് ഈ ചിത്രത്തെ ഇപ്പോള്‍ വിശേഷിപ്പിക്കുന്നത്. ഒരു ബാലയ്യ ചിത്രം ബോക്‌സ് ഓഫീസില്‍ 100 കോടി ക്ലബ്ബില്‍ ഇടംപിടിക്കുന്നത് ആദ്യമായാണ്.
കമല്‍ കെ എം രചനയും സംവിധാനവും നിര്‍വഹിക്കുന്ന 'പട' എന്ന ചിത്രത്തിന്റെ പുതിയ ക്യാരക്ടര്‍ പോസ്റ്റര്‍ പുറത്തിറങ്ങി. ജോജു ജോര്‍ജ് അവതരിപ്പിക്കുന്ന അരവിന്ദന്‍ മണ്ണൂര്‍ എന്ന കഥാപാത്രത്തിന്റെ പോസ്റ്ററാണ് പുറത്തുവിട്ടിരിക്കുന്നത്. കുഞ്ചാക്കോ ബോബന്‍, വിനായകന്‍, ദിലീഷ് പോത്തന്‍ എന്നിവരാണ് മറ്റ് പ്രധാന കഥാപാത്രങ്ങളായി എത്തുന്നത്. ചിത്രം ഈ മാസം പ്രേക്ഷകരിലേക്ക് എത്തും. 1996ല്‍ പാലക്കാട് കളക്റ്ററേറ്റില്‍ അയ്യങ്കാളി പടയിലെ അംഗങ്ങളായ നാല് യുവാക്കള്‍ കളക്ടറെ ബന്ദിയാക്കിയ സംഭവത്തെ അധികരിച്ചാണ് ചിത്രമെന്നാണ് സൂചന.
ഐക്കണിക്ക് അമേരിക്കന്‍ ഇരുചക്രവാഹന ബ്രാന്‍ഡായ ഇന്ത്യന്‍ മോട്ടോര്‍സൈക്കിള്‍സ് ലോകമെമ്പാടുമുള്ള അതിന്റെ ഏറ്റവും പുതിയ ഓഫറായ സ്‌കൌട്ട് റോഗ് അവതരിപ്പിച്ചു. സ്‌പോര്‍ട്ടി ക്രൂയിസര്‍ എബിഎസ് വേരിയന്റിലും നോണ്‍ എബിഎസ് വേരിയന്റിലും വാഹനം ലഭ്യമാണ്. യഥാക്രമം 11,499 ഡോളര്‍ (8.59 ലക്ഷം രൂപ), 12,399 ഡോളര്‍ (9.27 ലക്ഷം രൂപ) എന്നിങ്ങനെയാണ് വില. കമ്പനിയുടെ 1133 സിസി ക്രൂയിസര്‍ പോര്‍ട്ട്‌ഫോളിയോയിലെ നാലാമത്തെ ബൈക്കാണ് പുതിയ സ്‌കൌട്ട് റോഗ് മോട്ടോര്‍സൈക്കിള്‍.
മുന്‍കാലങ്ങളെ അപേക്ഷിച്ച് ചെറുപ്പക്കാരില്‍ ഹൃദ്രോഗങ്ങളും അതുവഴി ഹൃദയാഘാതം- ഹൃദയസ്തംഭനം എന്നിവയും വര്‍ധിക്കുന്ന സാഹചര്യം ഇന്നുണ്ട്. പ്രത്യേകിച്ച് ഇന്ത്യയില്‍ യുവാക്കള്‍ക്കിടയിലെ ഹൃദയാഘാതം കൂടിവരികയാണെന്നാണ് 'ഇന്ത്യന്‍ ഹാര്‍ട്ട് അസേസിയേഷന്‍' അടക്കമുള്ള വിദഗ്ധസംഘങ്ങള്‍ ചൂണ്ടിക്കാട്ടുന്നത്. മടി പിടിച്ചുള്ള ജീവിതരീതി, പ്രമേഹം, രക്തസമ്മര്‍ദ്ദം, അമിത മദ്യപാനം- പുകവലി- മറ്റ് ലഹരിപദാര്‍ത്ഥങ്ങളുടെ ഉപയോഗം എന്നിവയാണ് ചെറുപ്പക്കാരില്‍ ഹൃദയാഘാതം- ഹൃദയസ്തംഭനം എന്നിവ വര്‍ധിപ്പിക്കുന്നത്. ഇതോടൊപ്പം തന്നെ ഒരു വിഭാഗം ആളുകളില്‍ പാരമ്പര്യഘടകങ്ങളും ഹൃദയാഘാതത്തിലേക്കും ഹൃദയസ്തംഭനത്തിലേക്കും നയിക്കുന്നു. പെട്ടെന്ന് സംഭവിക്കുന്ന ഹൃദയസ്തംഭനത്തില്‍ നിന്ന് പലപ്പോഴും ആളുകള്‍ക്ക് തിരിച്ചുകയറാന്‍ സാധിക്കാറില്ല. ഹൃദയസ്തംഭനം സംഭവിച്ച് ആദ്യ ആറ് മിനുറ്റിനുള്ളില്‍ തന്നെ പ്രാഥമിക ശുശ്രൂഷ ലഭ്യമാക്കിയെങ്കില്‍ മാത്രമേ ഇവരുടെ ജീവന്‍ പിടിച്ചുനിര്‍ത്താന്‍ സാധിക്കൂ. സിപിആര്‍ ആണ് ഹൃദയസ്തംഭനം സംഭവിച്ചവര്‍ക്ക് നല്‍കേണ്ട ആദ്യ ചികിത്സ. ഇത് കൃത്യമായി ചെയ്യുകയും വേണം. നെഞ്ചില്‍ അസ്വസ്ഥത, കനം, ചെറിയ രീതിയില്‍ ശ്വാസതടസം, ഹൃദയസ്പന്ദനങ്ങളില്‍ വ്യത്യാസം, പെട്ടെന്നുള്ള തളര്‍ച്ച, തലകറക്കം, ചിലപ്പോള്‍ തലകറങ്ങി ബോധം വരെ നഷ്ടപ്പെടുന്ന അവസ്ഥ- ഇവയെല്ലാം ഹൃദയസ്തംഭനത്തിലേക്ക് നയിക്കുന്ന ശാരീരികമായ സൂചനകളാകാം. അതിനാല്‍ തന്നെ ഇത്തരം പ്രശ്‌നങ്ങള്‍ നേരിടുന്ന പക്ഷം അടുത്തുള്ള ആശുപത്രിയില്‍ ഉടനെ രോഗിയെ എത്തിക്കേണ്ടതാണ്. ആരോഗ്യകരമായ ഭക്ഷണം, വ്യായാമം, ഉറക്കം, മദ്യപാനം-പുകവലി പോലുള്ള ശീലങ്ങള്‍ ഉപേക്ഷിക്കുന്നത് എന്നിവയെല്ലാം ഹൃദയത്തെ ഒരു പരിധി വരെ സംരക്ഷിക്കും.
ഇന്നത്തെ വിനിമയ നിരക്ക്
ഡോളര്‍ - 74.88, പൗണ്ട് - 101.49, യൂറോ - 84.58, സ്വിസ് ഫ്രാങ്ക് - 81.31, ഓസ്‌ട്രേലിയന്‍ ഡോളര്‍ - 53.34, ബഹറിന്‍ ദിനാര്‍ - 198.69, കുവൈത്ത് ദിനാര്‍ -247.56, ഒമാനി റിയാല്‍ - 194.54, സൗദി റിയാല്‍ - 19.96, യു.എ.ഇ ദിര്‍ഹം - 20.39, ഖത്തര്‍ റിയാല്‍ - 20.57, കനേഡിയന്‍ ഡോളര്‍ - 58.95.
