വിദ്യാർത്ഥികളുടെ ജീവന് പുല്ലുവില കൽപ്പിച്ച്, മദ്യപിച്ച് സ്കൂൾ-കോളേജ് ബസുകൾ ഓടിച്ച ഏഴ് ഡ്രൈവർമാർ പോലീസ് പിടിയിൽ. എറണാകുളം റേഞ്ച് ഡെപ്യൂട്ടി ഇൻസ്പെക്ടർ ജനറൽ (ഡി.ഐ.ജി) യതീഷ് ചന്ദ്ര ഐ.പി.എസിന്റെ നിർദ്ദേശപ്രകാരം ഇടുക്കി ജില്ലയിൽ നടത്തിയ പ്രത്യേക വാഹന പരിശോധനയിലാണ് ഇവർ പിടിയിലായത്.
ഇടുക്കി ജില്ലാ പോലീസ് മേധാവി ഡോ. എ. നസീം ഐ.പി.എസിന്റെ നേതൃത്വത്തിൽ നടന്ന 'റേഞ്ച് തല സ്പെഷ്യൽ കോമ്പിംഗ് ഓപ്പറേഷന്റെ' ഭാഗമായാണ് ജില്ലയിലുടനീളം പരിശോധന കർശനമാക്കിയത്. കുട്ടികളുടെ സുരക്ഷ ഉറപ്പാക്കുന്നതിനായി രാവിലെ മുതൽ തന്നെ വിവിധ സ്റ്റേഷൻ പരിധികളിൽ പോലീസ് സംഘം പരിശോധന നടത്തിയിരുന്നു.
ജില്ലയിലെ വിവിധ പോലീസ് സ്റ്റേഷനുകളിലായി ആകെ ഏഴ് കേസുകളാണ് ഇതുമായി ബന്ധപ്പെട്ട് രജിസ്റ്റർ ചെയ്തിരിക്കുന്നത്. പിടിയിലായ ഡ്രൈവർമാരുടെ സ്റ്റേഷൻ തിരിച്ചുള്ള വിവരങ്ങൾ താഴെ പറയുന്നവയാണ്:
ശാന്തൻപാറ: 2 കേസുകൾ
കരിങ്കുന്നം: 1 കേസ്
ഇടുക്കി: 1 കേസ്
വെള്ളത്തൂവൽ: 1 കേസ്
രാജാക്കാട്: 1 കേസ്
വണ്ടൻമേട്: 1 കേസ്
വിദ്യാർത്ഥികളെ കയറ്റി സർവീസ് നടത്തുന്ന വാഹനങ്ങളിലെ ഡ്രൈവർമാർ മദ്യപിച്ചിട്ടുണ്ടോ എന്ന് കണ്ടെത്താൻ വരും ദിവസങ്ങളിലും കർശന പരിശോധന തുടരുമെന്ന് പോലീസ് അറിയിച്ചു. കുട്ടികളുടെ സുരക്ഷ മുൻനിർത്തിക്കൊണ്ടുള്ള ഇത്തരം നിയമലംഘനങ്ങളിൽ യാതൊരു വിട്ടുവീഴ്ചയും ഉണ്ടാകില്ലെന്നും, കുറ്റക്കാർക്കെതിരെ ലൈസൻസ് റദ്ദാക്കുന്നതുൾപ്പെടെയുള്ള കർശന നടപടികൾ സ്വീകരിക്കുമെന്നും അധികൃതർ വ്യക്തമാക്കിയിട്ടുണ്ട്.
