ദേവികുളം മുൻ എംഎൽഎയും സിപിഎം നേതാവുമായ എസ് രാജേന്ദ്രനെതിരെ നടപടിയുമായി റവന്യൂ വകുപ്പ്. രാജേന്ദ്രൻ കയ്യേറിയ സർക്കാർ ഭൂമി ഒഴിയണമെന്ന് റവന്യൂ വകുപ്പ് നിർദ്ദേശം നൽകി.
രാജേന്ദ്രന്റെ കൈവശമുള്ള ഇക്കാ നഗറിലുള്ള നാല് സെന്റ് ഭൂമിയോട് ചേർന്നുള്ള സ്‌ഥലത്താണ്‌ കയ്യേറ്റ ശ്രമം നടന്നതെന്നാണ് ആരോപണം. സിമന്റിഷ്ടിക ഉപയോഗിച്ച് കെട്ടിയ ശേഷം കോൺക്രീറ്റ് കാൽ നാട്ടി കമ്പി വേലി സ്ഥാപിക്കുകയായിരുന്നു. കെ.എസ്.ഇ.ബിയ്ക്ക് സർക്കാർ കൈമാറിയ എട്ട് സെന്റോളം വരുന്ന ഭൂമിയാണ് കൈയേറി മുളുവേലി സ്ഥാപിച്ചത്. ഇതിന് സമീപത്തായി എം.എൽ.എയുടെ ഭാര്യ ലതയുടെ പേരിൽ 4 സെന്റ് സ്ഥലവും ഇതിലൊരു വീടുമുണ്ട്. കയ്യേറിയ സ്‌ഥലത്ത് വേലികെട്ടി നടത്തുന്ന നിർമാണ പ്രവൃത്തികൾ നിർത്തിവെക്കണമെന്നും ഭൂമി ഒഴിയണമെന്നും ഉത്തരവിൽ പറയുന്നു. ബുധനാഴ്‌ചയായിരുന്നു ഭൂമി കയ്യേറ്റം ഉണ്ടായതെന്നാണ് പുറത്തുവരുന്ന വിവരം. ഇതിനിടയിലാണ് വിഷയം റവന്യൂ വകുപ്പിന്റെ ശ്രദ്ധയിൽ പെടുന്നത്. തുടർന്ന് ഉദ്യോഗസ്ഥർ സ്റ്റോപ്പ് മെമ്മോ നൽകി നിർമാണം നിർത്തി വയ്ക്കണമെന്നും കൈയേറിയ ഭൂമി അടിയന്തരമായി ഒഴിയണമെന്നും കാണിച്ചു കത്ത് നൽകി. എന്നാൽ ഉദ്യോഗസ്ഥർ പോയതിന് ശേഷം നിർമാണം പൂർത്തീകരിക്കുകയായിരുന്നു.
സംഭവത്തിൽ വിശദമായ റിപ്പോർട്ട് വില്ലേജ് ഓഫീസറോട് ആവശ്യപ്പെട്ടതായും ഇത് ലഭിച്ച ശേഷം സബ് കളക്ടർക്കും ജില്ലാ കളക്ടർക്കും റിപ്പോർട്ട് നൽകുമെന്നും ദേവികുളം തഹസിൽദാർ പറഞ്ഞു. എന്നാൽ ഭൂമിക്ക് പട്ടയമുണ്ടെന്നും ഇത് പരിശോധിക്കാൻ പോലും ഉദ്യോഗസ്ഥർ തയ്യാറാകാതെയാണ് വിവാദം സൃഷ്ടിക്കാനായി നടപടി എടുക്കുന്നതെന്നും എസ് . രജേന്ദ്രൻ കുറ്റപ്പെടുത്തി.
