ധീരജ് കൊലക്കേസിലെ അഞ്ച് പ്രതികളെയും പൊലീസ് കസ്റ്റഡിയിൽ വിട്ടു. മുട്ടം ജില്ലാ കോടതിയാണ് കസ്റ്റഡി അപേക്ഷ പരിഗണിച്ചത്.
ഇടുക്കി ഗവൺമെന്റ് എൻജിനീയറിങ് കോളജ് വിദ്യാർഥിയായ എസ്.എഫ്.ഐ പ്രവർത്തകൻ ധീരജ് കൊലപാതകത്തിലെ ഒന്നാം പ്രതി നിഖിൽ പൈലി , രണ്ടാം പ്രതി ജെറിൻ ജോജോ എന്നിവരെ ഈ മാസം 22 വരെയും മൂന്ന് നാല് അഞ്ച് പ്രതികളായ ജിതിൻ, ടോണി, നിതിൻ എന്നിവരെ ഈ മാസം 20 വരെയും കസ്റ്റഡിയിൽ വിട്ടു.
ഗവൺമെന്റ് എഞ്ചിനീയറിംഗ് കോളേജ് വിദ്യാര്‍ത്ഥി ധീരജിനെ കുത്തിക്കൊന്ന കേസിലെ പ്രതികളെ കസ്റ്റഡിയിൽ വിട്ടുകിട്ടണമെന്നാവശ്യപ്പെട്ടുള്ള പൊലീസിന്റെ കസ്റ്റഡി അപേക്ഷ ഇന്നാണ് ജില്ലാ കോടതി പരിഗണിച്ചത്. യൂത്ത് കോണ്‍ഗ്രസ് - കെഎസ്‍യു നേതാക്കളായ നിഖിൽ പൈലി, ജെറിൻ ജോജോ, ജിതിൻ, ടോണി തേക്കിലക്കാടൻ എന്നിവരെ പത്ത് ദിവസത്തെ കസ്റ്റഡിയിൽ വേണമെന്നായിരുന്നു പോലീസ് ആവശ്യപ്പെട്ടത്. എന്നാൽ കോടതി ഒന്നും രണ്ടും പ്രതികളെ ശനിയാഴ്ചവരെയും മറ്റുപ്രതികളെ വെള്ളിയാഴ്ചവരെയും കസ്റ്റഡിയിൽ വിടുകയായിരുന്നു.
ധീരജിനെ കുത്താൻ പ്രതികൾ ഉപയോഗിച്ച കത്തി ഇതുവരെ കണ്ടെത്താൻ കഴിയാത്തത് അന്വേഷണ സംഘത്തിന് വെല്ലുവിളിയാണ്. കൊലപാതകത്തിന് ഉപയോഗിച്ച കത്തികണ്ടെടുത്ത് കൂടുതൽ തെളിവുകൾ ശേഖരിച്ച് പ്രതികളെ വീണ്ടും കോടതിയിൽ ഹാജരാക്കും.
കൊലപാതകത്തിൽ ഇതുവരെ ആറു പ്രതികൾ അറസ്റ്റിലായി. ഒരാൾകൂടി അറസ്റ്റിൽ ആകുവാനുണ്ട്. ഇയാൾ ഇന്ന് കോടതിയിൽ ഹാജരാകാനാണ് സാധ്യത.
കോളജ് യൂണിയൻ തെരഞ്ഞെടുപ്പുമായി ബന്ധപ്പെട്ട സംഘർഷത്തിനിടെ യൂത്ത് കോൺഗ്രസ് നേതാവായ നിഖിൽ പൈലി ധീരജിനെ കുത്തുകയായിരുന്നു . ആഴത്തിലുള്ളമുറിവും ഹൃദയത്തിനേറ്റ പരിക്കുമാണ് ധീരജിന്റെ മരണത്തിന് കാരണമായതെന്നാണ് പോസ്റ്റുമാർട്ടം റിപ്പോർട്ട്.
