തിങ്കളാഴ്ച രാത്രി മൂവാറ്റുപുഴ വെള്ളൂർക്കുന്നം ബവ്റിജസ് ഔട്ട് ലെറ്റിനു സമീപം അനധികൃത മദ്യവിൽപ്പനക്കാരെ പിടികൂടാനായി എത്തിയ സിവിൽ എക്സൈസ് ഓഫീസർക്കാണ് മർദ്ദനമേറ്റത്.
മൂവാറ്റുപുഴ എക്സൈസ് ഓഫിസിലെ സിവിൽ എക്സൈസ് ഓഫിസർ ജിഷ്ണു മനോജിനാണ് ( 28 ) മർദനമേറ്റത്. മർദ്ദനമേറ്റ ജിഷ്ണു മൂവാറ്റുപുഴ ജനറൽ ആശുപത്രിയിൽ ചികിത്സയിസലാണ് .ഔട്ട്ലെറ്റിൽ നിന്നും അമിതമായി മദ്യം വാങ്ങിയ ശേഷം വിൽപ്പന നടത്തുന്നസംഘം സജീവമാണന്നുള്ള പരാതിയെതുടർന്ന് മഫ്തിയിൽ പരിശോധനക്കെത്തിയതായിരുന്നു ജിഷ്ണു.
ടൂറിസ്റ്റ് ബസിൽ വിവാഹ ചടങ്ങ് കഴിഞ്ഞ് എത്തിയ കല്ലൂർക്കാട് പെരുമാംകണ്ടത്തുള്ള സംഘം മദ്യക്കുപ്പികളുമായി കറങ്ങി നടക്കുന്നതു കണ്ട് മദ്യം എവിടെ നിന്നാണെന്നു ചോദിച്ചതോടെയാണ് അധ്യാപകൻ ഉൾപ്പെടെയുള്ള സംഘം എക്സൈസ് ഉദ്യോഗസ്ഥനെ മർദിച്ചത്. എക്സൈസ് ഉദ്യോഗസ്ഥനാണെന്നു പറഞ്ഞ് തിരിച്ചറിയൽ കാർഡ് കാണിച്ചിട്ടും മദ്യ ലഹരിയിൽ ആയിരുന്ന ഇവർ മർദനം തുടർന്നു. ഇതിനിടയിൽ ഇവർ തിരിച്ചറിയൽ കാർഡും മൊബൈൽ ഫോണും തട്ടിയെടുത്തു . പിന്നീട് നാട്ടുകാർ ഇടപെട്ടാണ് ഫോണും തിരിച്ചറിയൽ കാർഡും തിരികെ വാങ്ങിയത്. നാട്ടുകാരും സ്ഥലത്തെത്തിയ ജിഷ്ണുവിന്റെ സഹപ്രവർത്തകരും ചേർന്നാണ് ജിഷ്ണുവിനെ മൂവാറ്റുപുഴ ജനറൽ ആശുപത്രിയിൽ പ്രവേശിപ്പിച്ചത് . ജിഷ്ണുവിന്റെ കൈകൾക്കും തലയ്ക്കും പരുക്കേറ്റിട്ടുണ്ട് . സംഭവവുമായി ബന്ധപ്പെട്ട് അധ്യാപകൻ ഉൾ പ്പെടെ അഞ്ചുപേരെ മൂവാറ്റുപുഴ പോലീസ് കസ്റ്റഡിയിലെടുത്തു . ചൊവ്വാഴ്ച പുലർച്ചെയാണ് ഇവരെ പിടികൂടിയത് .
