പ്രധാനപ്പെട്ട വാർത്തകൾ ഒറ്റനോട്ടത്തിൽ
അഹമ്മദാബാദ് സ്ഫോടനപരമ്പരക്കേസില്‍ 38 പ്രതികള്‍ക്കു വധശിക്ഷ. കേസിലെ 78 പ്രതികളില്‍ കുറ്റക്കാരായി കോടതി കണ്ടെത്തിയത് 49 പേരെയാണ്. ഇതില്‍ 38 പേര്‍ക്കും വധശിക്ഷയാണ് വിധിച്ചത്. 11 പേര്‍ക്ക് ജീവപര്യന്തം ശിക്ഷ വിധിച്ചു. അഹമ്മദാബാദ് പ്രത്യേകകോടതിയാണു ശിക്ഷ വിധിച്ചത്.
അഹമ്മദാബാദ് സ്ഫോടനക്കേസിലെ കുറ്റക്കാരില്‍ അഞ്ചു മലയാളികള്‍. ഇവരില്‍ മൂന്നു മലയാളികള്‍ക്കു വധശിക്ഷ. ഈരാറ്റുപേട്ട പീടിക്കല്‍ ഷാദുലി, സഹോദരന്‍ ഷിബിലി, കൊണ്ടോട്ടി സ്വദേശി ഷറഫുദ്ദീന്‍ എന്നിവര്‍ക്കാണു വധശിക്ഷ. വാഗമണ്‍, പാനായിക്കുളം സിമി ക്യാമ്പ് കേസില്‍ ശിക്ഷിക്കപ്പെട്ടവരാണ് ഷിബിലി, ഷാദുലി സഹോദരങ്ങള്‍. ജീവപര്യന്തം തടവിനു ശിക്ഷിക്കപ്പെട്ട മലയാളികള്‍ ആലുവാ കുഞ്ഞാനിക്കര സ്വദേശി മുഹമ്മദ് അന്‍സാരി, മംഗലാപുരത്ത് നിന്നുള്ള മലയാളി നൗഷാദ് എന്നിവരാണ്.
അഹമ്മദാബാദ് സ്ഫോടന പരമ്പരയില്‍ കൊല്ലപ്പെട്ടത് 56 പേര്‍. 248 പേര്‍ക്കെങ്കിലും പരിക്കേറ്റു. പ്രതികള്‍ നിരോധിക്കപ്പെട്ട 'സിമി'യുടെ ഉപവിഭാഗമായ ഇന്ത്യന്‍ മുജാഹിദ്ദീന്റെ പ്രവര്‍ത്തകരാണ്. അഹമ്മദാബാദില്‍ 2008 ജൂലൈ 26 ന് തിരക്കേറിയ ഓള്‍ഡ് സിറ്റിയില്‍ അടക്കം 20 ഇടങ്ങളിലാണ് സ്ഫോടനപരമ്പര നടന്നത്.
ഗവര്‍ണറുടെ നയപ്രഖ്യാപന പ്രസംഗം പ്രതിപക്ഷം ബഹിഷ്‌കരിച്ചു. ഗവര്‍ണര്‍ സഭയിലേക്ക് എത്തിയപ്പോള്‍ പ്രതിപക്ഷം മുദ്രാവാക്യം വിളികള്‍ ആരംഭിച്ചു. ഗവര്‍ണര്‍ പ്രസംഗം ആരംഭിച്ചതോടെ പ്രതിപക്ഷം പ്രതിഷേധിച്ച് സഭ വിട്ടു. ക്ഷുഭിതനായ ഗവര്‍ണര്‍ പ്രതിഷേധിക്കേണ്ട സമയം ഇതല്ലെന്ന് പറഞ്ഞു.
സര്‍ക്കാരിന്റെ ഭരണനേട്ടങ്ങള്‍ ഗവര്‍ണര്‍ പ്രസംഗിച്ചപ്പോഴും ഗൗനിക്കാതെ ഭരണപക്ഷ എംഎല്‍എമാര്‍. ഡസ്‌കിലിടിച്ച് ആവേശം പ്രകടമാക്കാതെ ഗവര്‍ണറോട് അതൃപ്തിയും പ്രതിഷേധവും പ്രകടമാക്കിയാണ് ഭരണപക്ഷ എംഎല്‍എ മാര്‍ സഭയില്‍ ഉപവിഷ്ഠരായത്.
കേന്ദ്ര സര്‍ക്കാരിനെതിരേ നയപ്രഖ്യാപന പ്രസംഗത്തില്‍ രൂക്ഷ വിമര്‍ശനങ്ങള്‍. ധനക്കമ്മി കുറക്കുന്നതിനുള്ള ഗ്രാന്‍ഡ് കേന്ദ്രം കുറച്ചു. പ്രതിസന്ധി കാലത്ത് കേന്ദ്രം സഹായിച്ചില്ല. 6500 കോടി രൂപ ജി.എസ്.ടി നഷ്ടപരിഹാരമായി ലഭിക്കാനുണ്ടെന്നും നയപ്രഖ്യാപന പ്രസംഗത്തില്‍ ഗവര്‍ണര്‍ വ്യക്തമാക്കി.
ഭരണഘടനാ ബാധ്യത നിര്‍വഹിക്കേണ്ടവര്‍ അത് ചെയ്യാന്‍ തയ്യാറാകണമെന്ന് മന്ത്രി കെ രാധാകൃഷ്ണന്‍. ഭരണഘടനാ പദവിയിലിരിക്കുന്നയാള്‍ അത് നിര്‍വ്വഹിക്കാത്തത് ശരിയായ രീതിയല്ല. ഗവര്‍ണര്‍ ഉന്നയിക്കുന്ന വിഷയം വേറെ ചര്‍ച്ച ചെയ്യുമെന്നും മന്ത്രി രാധാകൃഷ്ണന്‍ വിശദീകരിച്ചു.
> |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
സില്‍വര്‍ ലൈനില്‍ സംസ്ഥാന സര്‍ക്കാരിനെതിരെ വീണ്ടും വിമര്‍ശനവും ഉത്തരവുമായി ഹൈക്കോടതി സിംഗിള്‍ ബെഞ്ച്. വസ്തുതകള്‍ സര്‍ക്കാര്‍ മറച്ചു വയ്ക്കുകയാണെന്ന് ജസ്റ്റിസ് ദേവന്‍ രാമചന്ദ്രന്‍ കുറ്റപ്പെടുത്തി. വിവരങ്ങള്‍ കോടതി തേടുമ്പോള്‍ അതിനെതിരെ സര്‍ക്കാര്‍ അപ്പീല്‍ നല്‍കുന്നു. സില്‍വര്‍ ലൈന്‍ പദ്ധതിക്ക് കോടതി എതിരല്ലെന്നും ജനങ്ങളെ ബാധിക്കുന്ന വിഷയങ്ങളിലാണ് കോടതി ഇടപെടുന്നതെന്നും വീണ്ടും സ്റ്റേ ഉത്തരവു പുറപ്പെടുവിച്ചുകൊണ്ട് അദ്ദേഹം പറഞ്ഞു.
സില്‍വര്‍ ലൈന്‍ സര്‍വെ തടഞ്ഞ സിംഗിള്‍ ബെഞ്ചിന്റെ രണ്ടാം ഉത്തരവും റദ്ദാക്കുമെന്ന് ഡിവിഷന്‍ ബഞ്ച്. ഡിവിഷന്‍ ബെഞ്ചിന്റെ പരിഗണനയിലുള്ള കേസില്‍ സിംഗിള്‍ ബെഞ്ച് ഉത്തരവിറക്കിയത് തെറ്റായ നടപടിയാണെന്ന് ഏ ജി ചൂണ്ടിക്കാട്ടി. ഡിവിഷന്‍ ബെഞ്ച് കേസില്‍ വിധി പറയാന്‍ മാറ്റിയ കാര്യം സിംഗിള്‍ ബെഞ്ചിനെ അറിയിച്ചിരുന്നു. സര്‍ക്കാരിന്റെ ഭാഗം കേള്‍ക്കാതെയാണ് സിംഗിള്‍ ബഞ്ച് ഉത്തരവിറക്കിയതെന്നും എജി ആരോപിച്ചു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
പ്ലസ്ടു ക്ലാസില്‍ പാഠഭാഗങ്ങള്‍ തീര്‍ക്കാത്ത അധ്യാപകരുടെ പേരുകള്‍ വിദ്യാഭ്യാസവകുപ്പ് ശേഖരിക്കുന്നു. 60 ശതമാനത്തില്‍ താഴെ മാത്രം പഠിപ്പിച്ചവരുടെ കണക്കാണെടുക്കുന്നത്. തസ്തിക, പഠിപ്പിക്കുന്ന വിഷയം എന്നിവയടക്കമുള്ള വിവരങ്ങളാണ് എടുക്കേണ്ടതെന്നാണ് പ്രിന്‍സിപ്പല്‍മാര്‍ക്ക് വാട്സ്ആപ്പില്‍ നിര്‍ദേശം നല്‍കിയത്.
കൊച്ചിയിലെ മോഡലുകളുടെ അപകടമരണ കേസിലെയും നമ്പര്‍ 18 ഹോട്ടല്‍ പോക്സോ കേസിലെയും പ്രതിയായ സൈജു തങ്കച്ചനെ തട്ടിക്കൊണ്ടുപോയെന്നു പരാതി. കുഴിപ്പള്ളിയിലെ വീട്ടില്‍നിന്ന് എട്ടംഗ സംഘം തട്ടിക്കൊണ്ടുപോയി മോചനദ്രവ്യമായി പത്തു ലക്ഷം രൂപ ആവശ്യപ്പെട്ടു. പിന്നീട് ഒരു ലക്ഷം രൂപ തന്നാല്‍ മതിയെന്നു പറഞ്ഞെന്നും സൈജു മുനമ്പം പൊലീസില്‍ നല്‍കിയ പരാതിയില്‍ പറയുന്നു. രണ്ടുപേരെ പോലീസ് കസ്റ്റഡിയിലെടുത്തിട്ടുണ്ട്.
നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ കൊല്ലാന്‍ ദിലീപ് അടക്കമുള്ള പ്രതികള്‍ ഗൂഢാലോചന നടത്തിയെന്ന കേസില്‍ സംവിധായകന്‍ നാദിര്‍ഷായെ ക്രൈം ബ്രാഞ്ച് ചോദ്യം ചെയ്തു. ദിലീപിന്റെ അടുത്ത സുഹൃത്തായ നാദിര്‍ഷായെ മൂന്ന് മണിക്കൂറോളം ചോദ്യം ചെയ്തു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
കിഴക്കമ്പലത്ത് സിപിഎം പ്രവര്‍ത്തകരുടെ മര്‍ദ്ദനമേറ്റ ട്വന്റി 20 പ്രവര്‍ത്തകന്‍ മരിച്ചു. കാവുങ്ങപ്പറമ്പ് പാറപ്പുറം കോളനിയിലെ താമസക്കാരനായ ദീപു (37) ആണ് മരിച്ചത്. എറണാകുളത്തെ സ്വകാര്യ ആശുപത്രിയില്‍ ചികിത്സയിലായിരുന്നു.
സംസ്ഥാന വൈദ്യുതി ബോര്‍ഡില്‍ സ്ഥാനക്കയറ്റത്തിനു സര്‍ക്കാര്‍ പുറത്തിറക്കിയ ഇളവുകള്‍ സുപ്രീം കോടതി ശരിവച്ചു. ഇതോടെ കെഎസ്ഇബിയില്‍ രണ്ടു വര്‍ഷമായി മുടങ്ങിക്കിടക്കുന്ന പ്രമോഷനുകള്‍ക്കുള്ള തടസം നീങ്ങി.
മരം മുറി വിവാദത്തില്‍ നടപടി നേരിട്ട അടിമാലി മുന്‍ റേഞ്ച് ഓഫീസര്‍ ജോജി ജോണിനു വരുമാനത്തിന്റെ 304 ഇരട്ടി സ്വത്തുണ്ടെന്ന് വിജിലന്‍സിന്റെ പ്രാഥമിക കണ്ടെത്തല്‍. ജോജി ജോണിന്റെ തേക്കടിയിലെ വീട്ടിലും റിസോര്‍ട്ടിലും വിജിലന്‍സ് സംഘം പരിശോധന നടത്തി രേഖകള്‍ പിടിച്ചെടുത്തു.
കോഴിക്കോട് വെളളയില്‍നിന്ന് കാണാതായ പെണ്‍കുട്ടി തിരികെയെത്തി. ബാലികാമന്ദിരത്തില്‍ നിന്ന് ഒളിച്ചോടിയതിനെ തുടര്‍ന്ന് വീട്ടുകാര്‍ക്കൊപ്പം അയച്ച പെണ്‍കുട്ടിയെയാണ് കഴിഞ്ഞ ദിവസം കാണാതായത്. സ്‌കൂളിലേക്കെന്ന് പറഞ്ഞിറങ്ങിയ കുട്ടി സ്‌കൂളിലെത്തിയില്ല. ഇതേത്തുടര്‍ന്നാണ് രക്ഷിതാക്കള്‍ പൊലീസില്‍ പരാതി നല്‍കിയത്.
പൊതുഭരണ സെക്രട്ടറി കെആര്‍ ജ്യോതിലാലിനെതിരെ നടപടിയെടുത്ത് ഗവര്‍ണര്‍ ആരിഫ് മുഹമ്മദ് ഖാനുമായി ഒത്തുതീര്‍പ്പുണ്ടാക്കിയതില്‍ എതിര്‍പ്പുമായി സിപിഐ സംസ്ഥാന സെക്രട്ടറി കാനം രാജേന്ദ്രന്‍. ഗവര്‍ണര്‍ വിലപേശിയതും അതിന് സര്‍ക്കാര്‍ വഴങ്ങിയതും ശരിയായില്ലെന്ന് അദ്ദേഹം പറഞ്ഞു.
സര്‍ക്കാര്‍ ചെയ്യുന്ന എല്ലാ നിയമവിരുദ്ധ പ്രവര്‍ത്തനങ്ങള്‍ക്കും ഗവര്‍ണര്‍ കൂട്ടുനില്‍ക്കുകയാണെന്ന് പ്രതിപക്ഷ നേതാവ് വി .ഡി സതീശന്‍. കണ്ണൂര്‍ സര്‍വകലാശാലയിലെ വൈസ് ചാന്‍സലറുടെ നിയമനം, അഴിമതിക്കു കളമൊരുക്കുന്ന ലോകായുക്ത ഓര്‍ഡിനന്‍സ് എന്നിവയിലെല്ലാം ഗവര്‍ണര്‍ ഒപ്പുവച്ചത് ഉദാഹരണമാണെന്ന് സതീശന്‍.
വയനാട് ബത്തേരി മന്ദംകൊല്ലിയിലെ ജനവാസ മേഖലയില്‍ ആഴമുള്ള കുഴിയില്‍ ആറുമാസം പ്രായമായ പെണ്‍കടുവ അകപ്പെട്ടു. വനം വകുപ്പ് ഉദ്യോഗസ്ഥരെത്തി കടുവയെ മയക്കുവെടിവച്ച് രക്ഷിച്ചു. അമ്മ കടുവയെ കണ്ടെത്തി കടുവക്കുഞ്ഞിനെ വനത്തില്‍ തിരിച്ചുവിടാനുള്ള ശ്രമത്തിലാണ്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
സ്വര്‍ണക്കടത്തു കേസിലെ മുഖ്യപ്രതി സ്വപ്ന സുരേഷ് പുതിയ ജോലിയില്‍ പ്രവേശിച്ചു. അട്ടപ്പാടി കേന്ദ്രീകരിച്ചു പ്രവര്‍ത്തിക്കുന്ന സന്നദ്ധ സംഘടനയില്‍ സിഎസ്ആര്‍ ഡയറക്ടറായാണ് സ്വപ്നയുടെ നിയമനം. തൊടുപുഴയിലെ ഓഫീസിലെത്തിയാണു ചുമതലയേറ്റത്. ജീവിതത്തിന്റെ രണ്ടാം ഘട്ടമാണിതെന്ന് അവര്‍ പ്രതികരിച്ചു.
നമ്പര്‍പ്ലേറ്റ് ഇല്ലാത്ത ഇരുചക്ര വാഹനവുമായി പെണ്‍ സുഹൃത്തുമൊന്നിച്ചു കറങ്ങിയ 'കുട്ടി ഡ്രൈവറുടെ' വീട്ടിലെത്തി നടപടിയെടുത്ത് മോട്ടോര്‍ വാഹന വകുപ്പ്. ആലുവയില്‍ വാഹന പരിശോധനയ്ക്കിടെയാണ് കുട്ടമശ്ശേരി സ്വദേശിയായ കുട്ടി ഡ്രൈവര്‍ നമ്പര്‍പ്ലേറ്റ് ഇല്ലാത്ത ബൈക്കില്‍ കങ്ങുന്നതു കണ്ടത്. പരിശോധിക്കാനായി നിര്‍ത്താന്‍ ആവശ്യപ്പെട്ടെങ്കിലും വേഗത്തില്‍ ഓടിച്ചു പോയി. തന്ത്രപൂര്‍വം നമ്പര്‍ മനസിലാക്കിയാണ് ഉടമയുടെ വീട്ടിലെത്തി നടപടിയെടുത്തത്.
കേരള ടീച്ചര്‍ എലിജിബിലിറ്റി ടെസ്റ്റ് അഥവാ കെ ടെറ്റ് പരീക്ഷക്ക് അപേക്ഷിക്കാനുള്ള തീയതി നാളെ വരെ നീട്ടി. സെര്‍വര്‍ തകരാര്‍ മൂലം അപേക്ഷ പ്രക്രിയ നടത്താന്‍ സാധിക്കാത്ത സാഹചര്യത്തിലാണ് തീയതി നീട്ടിയത്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
വോഡഫോണ്‍ ഐഡിയ സാങ്കേതികവിദ്യാ പങ്കാളിയായ നോക്കിയയുമായി ചേര്‍ന്ന് ഗുജറാത്തിലെ ഗാന്ധിനഗറില്‍ 5 ജി ട്രയല്‍ നടത്തി. ന്യൂ റേഡിയോയിലൂടെ 5ജി വോയ്‌സ് വിജയകരമായി അവതരിപ്പിച്ചു. സര്‍ക്കാര്‍ അനുവദിച്ച സ്‌പെക്ട്രത്തിലൂടെ ഗുജറാത്തിലെ ഗാന്ധി നഗര്‍, മഹാരാഷ്ട്രയിലെ പൂനെ എന്നിവിടങ്ങളിലാണ് 5 ജി ട്രയല്‍. വോയ്‌സ്, ഡാറ്റ സേവനങ്ങള്‍ക്ക് 5 ജി ശൃംഖല ഉപയോഗിക്കുന്നതാവും ഈ സംവിധാനം.
കര്‍ണാടകയിലെ ബിജെപി മന്ത്രി കെ എസ് ഈശ്വരപ്പ ദേശീയപതാകയെ അപമാനിച്ചെന്നാരോപിച്ച് പ്രതിഷേധവുമായി പ്രതിപക്ഷ കക്ഷിയായ കോണ്‍ഗ്രസ്. മന്ത്രി രാജിവയ്ക്കും വരെ നിയമസഭയില്‍ പ്രതിഷേധം തുടരുമെന്ന് കോണ്‍ഗ്രസ് അറിയിച്ചു. കാവിക്കൊടി ദേശീയ പതാകയാകുമെന്ന മന്ത്രിയുടെ പ്രസംഗത്തെച്ചൊല്ലിയാണ് സമരം.
ഖലിസ്ഥാനികളുമായി അരവിന്ദ് കെജ്രിവാളിനു ബന്ധമുണ്ടെന്ന ആരോപണത്തില്‍ അന്വേഷണമാവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് പഞ്ചാബ് മുഖ്യമന്ത്രി ചരണ്‍ജിത് സിങ് ഛന്നി കത്തയച്ചു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ബ്രസീലിലെ പെട്രോപോളിസില്‍ രണ്ടു ദിവസമായി തുടരുന്ന മഴയിലും മണ്ണിടിച്ചിലിലും വെള്ളപ്പൊക്കത്തിലുമായി നൂറിലധികം പേര്‍ മരിച്ചു. ബ്രസീലിലെ റിയോ ഡി ജനീറോയുടെ വടക്കന്‍ പര്‍വതനിരകളിലെ നഗരം വെള്ളപ്പൊക്കത്തിലും മണ്ണിടിച്ചിലിലും ഏതാണ്ട് തകര്‍ന്നു.
പോര്‍ഷെ, ഔഡി, ലംബോര്‍ഗിനി തുടങ്ങിയ ആഡംബര കാറുകളടക്കം അയ്യായിരത്തോളം വാഹനങ്ങള്‍ കയറ്റിയ ചരക്കുകപ്പലിനു തീ പിടിച്ചു. അറ്റലാന്റിക് സമുദ്രത്തിലെ അസോറസ് ദ്വീപിനു സമീപമാണ് ഫെലിസിറ്റ് എന്ന പനാമയിലെ കപ്പലിനു തീപിടിച്ചത്. കപ്പലിലെ 22 ജീവനക്കാരെ പോര്‍ച്ചുഗീസ് നാവികസേന കരയ്ക്കെത്തിച്ചു.
കഴിഞ്ഞ അര്‍ദ്ധവര്‍ഷത്തെ അപേക്ഷിച്ച് ഈ വര്‍ഷം ജനുവരി-ജൂണ്‍ കാലയളവില്‍ പുതുമുഖങ്ങളുടെ നിയമനം 30 ശതമാനം വര്‍ദ്ധിച്ചു. ഇത് സാമ്പത്തിക പ്രവര്‍ത്തനങ്ങളില്‍ ഗണ്യമായ വീണ്ടെടുപ്പിനെ സൂചിപ്പിക്കുന്നു. ടീം ലീസ് എഡ്‌ടെക്കിന്റെ കരിയര്‍ ഔട്ട്‌ലുക്ക് റിപ്പോര്‍ട്ട് പ്രകാരം, 47 ശതമാനത്തിലധികം കമ്പനികള്‍ പുതുമുഖങ്ങളെ നിയമിക്കാന്‍ താല്‍പര്യം പ്രകടിപ്പിച്ചിട്ടുണ്ട്. 17 ശതമാനം കമ്പനികള്‍ മാത്രമാണ് കഴിഞ്ഞ വര്‍ഷം പുതുമുഖങ്ങളെ നിയമിച്ചത്. തൊഴില്‍ നല്‍കാനുള്ള സാധ്യതയില്‍ ഇടിവ് രേഖപ്പെടുത്തിയ മേഖലകളില്‍ നിര്‍മാണം, റിയല്‍ എസ്റ്റേറ്റ്, അഗ്രി ആന്‍ഡ് അഗ്രോകെമിക്കല്‍സ്, എഫ്എംസിജി, മാര്‍ക്കറ്റിംഗും പരസ്യവും, മാധ്യമങ്ങളും വിനോദവും പെടുന്നു. ഹോസ്പിറ്റാലിറ്റിയും യാത്രയും തൊഴില്‍ മേഖലയില്‍ രണ്ട് ശതമാനം വര്‍ധിച്ചെങ്കിലും താഴ്ന്ന റാങ്കില്‍ തുടരുകയാണ്.
2021 ഡിസംബര്‍ മാസത്തില്‍ ഇന്ത്യയിലെ മൊബൈല്‍ നെറ്റ്വര്‍ക്ക് വരിക്കാരുടെ എണ്ണം കുറഞ്ഞതായി ടെലികോം റെഗുലേറ്ററി അതോറിറ്റി ഓഫ് ഇന്ത്യ. 1.28 കോടി ഉപഭോക്താക്കളുടെ കുറവാണ് കഴിഞ്ഞ വര്‍ഷാവസാനം റിപ്പോര്‍ട്ട് ചെയ്തത്. റിലയന്‍സ് ജിയോ, വൊഡഫോണ്‍ ഐഡിയ എന്നിവയുടെ ഉപഭോക്താക്കളുടെ എണ്ണം കുറഞ്ഞപ്പോള്‍ ഭാരതി ഐയര്‍ടെല്ലിന്റേത് വര്‍ധിച്ചു. റിലയന്‍സ് ജിയോയാണ് ഉപഭോക്താക്കളുടെ നഷ്ടത്തില്‍ മുന്നിലുള്ളത്. 2021 ഡിസംബറില്‍ 1.29 കോടി ഉപഭോക്താക്കള്‍ കുറഞ്ഞ് 41.57 കോടിയായപ്പോള്‍ വൊഡഫോണ്‍ ഐഡിയയ്ക്ക് നഷ്ടമായത് 16.14 ലക്ഷം ഉപഭോക്താക്കളെയാണ്. ഡിസംബറിലെ കണക്കുകള്‍ പ്രകാരം 26.55 കോടി ഉപഭോക്താക്കളാണ് വൊഡഫോണ്‍ ഐഡിയയ്ക്ക് ഉള്ളത്. അതേസമയം, എയര്‍ടെല്‍ പുുതതായി 4.75 ലക്ഷം ഉപഭോക്താക്കളെയും നേടി. ടെലികോം റെഗുലേറ്ററി അതേറിറ്റി ഓഫ് ഇന്ത്യയുടെ കണക്കുകള്‍ പ്രകാരം 35.57 കോടി ഉപഭോക്താക്കളാണ് എയര്‍ടെല്ലിനുള്ളത്.
മഞ്ജു വാര്യര്‍ കേന്ദ്ര കഥാപാത്രത്തെ അവതരിപ്പിക്കുന്ന ഇന്തോ-അറബിക് ചിത്രമാണ് ആയിഷ'. ചിത്രീകരണം റാസല്‍ ഖൈമയില്‍ പുരോഗമിക്കുകയാണ്. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. മഞ്ജു വാര്യര്‍ തന്നെയാണ് പോസ്റ്റര്‍ പങ്കുവച്ചത്. 7 ഭാഷകളിലായി ഒരുങ്ങുന്ന ചിത്രത്തിന്റെ 7 ഭാഷയിലുള്ള പോസ്റ്ററും താരം പങ്കുവച്ചിട്ടുണ്ട്. നൃത്ത ചുവട് വയ്ക്കുന്ന രീതിയിലാണ് പോസ്റ്റര്‍ തയ്യാറാക്കിയിരിക്കുന്നത്. മഞ്ജു വാര്യരുടെ മികച്ച കഥാപാത്രമായാണ് 'ആയിഷ' ഒരുങ്ങുന്നത്. മലയാളത്തിനു പുറമെ തമിഴ്, തെലുങ്ക്, കന്നഡ, ഹിന്ദി, ഇംഗ്ലീഷ്, അറബിക് ഭാഷകളിലും ചിത്രമിറങ്ങും. ആഷിഫ് കക്കോടിയാണ് രചന.
ബാലതാരമായി സിനിമയില്‍ അരങ്ങേറ്റം കുറിച്ച യുവനടന്‍ ടോണി സിജിമോന്‍ നായകനിരയിലേക്ക്. നവാഗത സംവിധായകന്‍ മനീഷ് കുറുപ്പ് ഒരുക്കിയ പുതിയ ചിത്രം വെള്ളരിക്കാപ്പട്ടണത്തിലൂടെയാണ് ടോണി സിജിമോന്‍ നായകനാകുന്നത്. എഞ്ചിനീയറിംഗ് ബിരുദം നേടിയ ടോണി ഇപ്പോള്‍ തിരുവനന്തപുരം ഇന്‍ഫോസിസില്‍ ജോലി ചെയ്യുകയാണ്. വെള്ളരിക്കാപ്പട്ടണത്തിലൂടെ മുന്‍മന്ത്രിമാരായ കെ കെ ശൈലജയും, വി എസ് സുനില്‍കുമാറും ആദ്യമായി വെള്ളിത്തിരയിലെത്തുകയാണ്. യുവനടിമാരായ ജാന്‍വി ബൈജുവും, ഗൗരി ഗോപികയുമാണ് നായികമാര്‍. ഗാനങ്ങള്‍ കെ ജയകുമാര്‍ ഐ.എ.എസ്സ് ആണ് രചിച്ചിരിക്കുന്നത് ഒപ്പം സംവിധായകന്‍ മനീഷ് കുറുപ്പും ഗാനങ്ങള്‍ രചിച്ചിട്ടുണ്ട്.
ജാപ്പനീസ് ഇരുചക്ര വാഹന ബ്രാന്‍ഡായ ഹോണ്ട ടൂ വീലേഴ്സ് ഇന്ത്യ തങ്ങളുടെ ഏറ്റവും കൂടുതല്‍ വിറ്റഴിക്കപ്പെടുന്ന ജനപ്രിയ ഉല്‍പ്പന്നമായ ആക്ടിവയ്ക്ക് പ്രത്യേക ക്യാഷ്ബാക്ക് ഓഫര്‍ പ്രഖ്യാപിച്ചു. ഇപ്പോള്‍ സ്‌കൂട്ടര്‍ വാങ്ങുന്നവര്‍ക്ക് 5,000 രൂപ വരെ ക്യാഷ്ബാക്ക് ലഭിക്കും. ഏറ്റവും കുറഞ്ഞ ഇടപാട് തുകയായ 30,000 രൂപയ്ക്ക് അഞ്ച് ശതമാനം (5,000 രൂപ വരെ) ക്യാഷ്ബാക്ക് ഹോണ്ട ടൂ വീലേഴ്സ് ഇന്ത്യ വാഗ്ദാനം ചെയ്യും. തിരഞ്ഞെടുത്ത ഡെബിറ്റ്, ക്രെഡിറ്റ് കാര്‍ഡുകള്‍ വഴിയുള്ള ഇഎംഐ ഇടപാടുകള്‍ക്ക് മാത്രമേ ഈ ഓഫര്‍ സാധുതയുള്ളൂ.
നാരുകള്‍ ധാരാളം അടങ്ങിയ, പോഷകങ്ങള്‍ ഏറെയുള്ള ഗ്ലൈസെമിക് മൂല്യം ഏറെ കുറഞ്ഞ പഴങ്ങള്‍ പ്രമേഹ രോഗികള്‍ക്കും കഴിക്കാം. സ്ട്രോബറി, ബ്ലൂബെറി, ബ്ലാക്ക്ബെറി തുടങ്ങിയ പഴങ്ങള്‍ പ്രമേഹ രോഗികള്‍ക്ക് കഴിക്കാവുന്നതാണ്. ഇവയുടെ ഗ്ലൈസെമിക് സൂചിക വളരെ കുറവാണ്. അതുപോലെ ആപ്പിള്‍ ധൈര്യമായി കഴിക്കാം. ധാരാളം ഫൈബര്‍ അടങ്ങിയിട്ടുള്ളതിനാല്‍ പ്രമേഹത്തിന് മാത്രമല്ല, ദഹനസംബന്ധമായ പ്രശ്‌നങ്ങള്‍ക്കും ആപ്പിള്‍ കഴിക്കുന്നത് ഗുണം ചെയ്യും. തക്കാളിയാണ് അടുത്തതായി ഈ പട്ടികയില്‍ ഉള്‍പ്പെടുന്നത്. തക്കാളിയുടെ ഗ്ലൈസെമിക് ഇന്‍ഡക്സ് 30 ആണ്. അതുകൊണ്ട് തന്നെ തക്കാളി പ്രമേഹ രോഗികള്‍ക്ക് കഴിക്കാവുന്ന മികച്ച ഭക്ഷണമാണ്. ഓറഞ്ചില്‍ ആസിഡ് അംശമുള്ളതിനാല്‍ പ്രമേഹരോഗികള്‍ക്ക് കഴിക്കാവുന്നതാണ്. കിവിയാണ് അടുത്തത്. വിറ്റാമിന്‍ സി, പൊട്ടാസ്യം, നാരുകള്‍ ഇവയടങ്ങിയ കിവി, പ്രമേഹരോഗികള്‍ക്ക് ഏറ്റവും മികച്ച പഴങ്ങളിലൊന്നാണ്. നാരുകള്‍, വിറ്റാമിന്‍ കെ, ആന്റിഓക്‌സിഡന്റുകള്‍ ഇവ സബര്‍ജില്ലില്‍ ധാരാളമായി അടങ്ങിയിട്ടുണ്ട്. ഒരു മാതളത്തില്‍ 7 ഗ്രാം ഫൈബര്‍ ഉണ്ട്. അതുകൊണ്ടുതന്നെ മാതളം പ്രമേഹ രോഗികള്‍ക്ക് കഴിക്കാവുന്നതാണ്.
ഇന്നത്തെ വിനിമയ നിരക്ക്
ഡോളര്‍ - 74.74, പൗണ്ട് - 101.87, യൂറോ - 85.00, സ്വിസ് ഫ്രാങ്ക് - 81.19, ഓസ്‌ട്രേലിയന്‍ ഡോളര്‍ - 53.98, ബഹറിന്‍ ദിനാര്‍ - 198.30, കുവൈത്ത് ദിനാര്‍ -247.24, ഒമാനി റിയാല്‍ - 194.19, സൗദി റിയാല്‍ - 19.92, യു.എ.ഇ ദിര്‍ഹം - 20.35, ഖത്തര്‍ റിയാല്‍ - 20.53, കനേഡിയന്‍ ഡോളര്‍ - 58.96.
കൂടുതൽ വാർത്തകൾക്കായി വാട്‌സാപ്പ് ഗ്രൂപ്പിൽ അംഗമാവുക. ഗ്രൂപ്പ്
സന്ദർശിക്കുക. www.honesty.news
