പ്രധാനപ്പെട്ട വാർത്തകൾ ഒറ്റനോട്ടത്തിൽ.
വീട്, കുടിവെള്ളം, തൊഴില്‍, വിദ്യാര്‍ത്ഥികള്‍ക്ക് ഇ വിദ്യ പദ്ധതി, ട്രെയിനുകളും റോഡും അടക്കമുള്ള അടിസ്ഥാന സൗകര്യ വികസനം എന്നിവ വാഗ്ദാനം ചെയ്തുകൊണ്ട് കേന്ദ്ര ബജറ്റ്. ധനമന്ത്രി നിര്‍മല സീതാരാമന്‍ പാര്‍ലമെന്റില്‍ അവതരിപ്പിച്ച ബജറ്റിലാണ് ഈ നിര്‍ദേശങ്ങള്‍. ആദായനികുതിയില്‍ ഇളവുകളില്ല.
പിഎം ആവാസ് യോജനയിലൂടെ 80 ലക്ഷം വീടുകളുടെ നിര്‍മാണത്തിന് 48,000 കോടി രൂപ. 2023ന് മുന്‍പ് 18 ലക്ഷം പേര്‍ക്ക് വീട് നിര്‍മിച്ചു നല്‍കും. 3.8 കോടി വീടുകളിലേക്കു കുടിവെള്ളമെത്തിക്കാന്‍ 60,000 കോടി നീക്കിവച്ചു.
പതിന്നാലു മേഖലകളിലെ പദ്ധതികളിലൂടെ 60 ലക്ഷം തൊഴിലവസരങ്ങള്‍ സൃഷ്ടിക്കും. ഇത് 30 ലക്ഷം കോടിയുടെ അധിക ഉത്പാദനത്തിന് വഴിയൊരുക്കുമെന്ന് ധനമന്ത്രി അവകാശപ്പെട്ടു.
400 പുതിയ വന്ദേഭാരത് ട്രെയിന്‍ സര്‍വീസുകള്‍ ആരംഭിക്കും. റെയില്‍വേ ചരക്കുനീക്കത്തിനു പദ്ധതി. മലയോരഗതാഗതത്തിന് പര്‍വത് മാലാ പദ്ധതി നടപ്പാക്കും. ദേശീയ പാതകള്‍ 25000 കിലോമീറ്റര്‍ കൂടി നിര്‍മിക്കും. നദീസംയോജനത്തിന് പദ്ധതി രേഖ തയ്യാറാക്കും.
പ്രധാനമന്ത്രിയുടെ ഇ-വിദ്യ പദ്ധതി പ്രകാരം 'വണ്‍ ക്ലാസ് വണ്‍ ടിവി ചാനല്‍' എന്ന പദ്ധതി ആരംഭിക്കും. കോവിഡ്മൂലം സ്‌കൂളുകള്‍ അടച്ചിട്ടതോടെ വിദ്യാര്‍ഥികള്‍ക്ക് രണ്ടു വര്‍ഷത്തോളം ഔപചാരിക വിദ്യാഭ്യാസം നഷ്ടപ്പെട്ടു. സര്‍ക്കാര്‍ സ്‌കൂളുകളിലെ വിദ്യാര്‍ഥികള്‍ക്ക് വിദ്യാഭ്യാസം ഉറപ്പുവരുത്താനാണ് വണ്‍ ക്ലാസ് വണ്‍ ചാനല്‍ പദ്ധതി ആരംഭിക്കുന്നത്. പ്രാദേശിക ഭാഷകളിലായിരിക്കും ചാനലുകള്‍.
പിഎം ഇ വിദ്യ പദ്ധതി പ്രകാരമുളള വണ്‍ക്ലാസ് വണ്‍ ടിവി ചാനല്‍ പ്രോഗ്രാം 12 മുതല്‍ 200 ടിവി ചാനലുകളായി വിപുലപ്പെടുത്തും. ഒന്നു മുതല്‍ പന്ത്രണ്ടാംക്ലാസ് വരെ പ്രാദേശിക ഭാഷകളില്‍ അനുബന്ധ വിദ്യാഭ്യാസം വിദ്യാര്‍ഥികള്‍ക്ക് ഉറപ്പാക്കും.
ഡിജിറ്റല്‍ യൂണിവേഴ്‌സിറ്റി ആരംഭിക്കും. രണ്ടു ലക്ഷം അംഗന്‍വാടികളെ നവീകരിക്കാന്‍ സമക്ഷം അംഗന്‍വാടി പദ്ധതി നടപ്പാക്കും. അങ്കണവാടികളില്‍ ഡിജിറ്റല്‍ സൗകര്യങ്ങള്‍ ഒരുക്കും.
അടിസ്ഥാന സൗകര്യ വികസന രംഗത്ത് ഊന്നല്‍ നല്‍കും. 22 ലക്ഷം കോടി രൂപയുടെ വരുമാനത്തില്‍ നിന്ന് ഏഴര ലക്ഷം കോടി രൂപയാണ് ഇതിനായി മാറ്റിവച്ചത്.
സമ്പദ്വ്യവസ്ഥയിലെ മൊത്തത്തിലുള്ള നിക്ഷേപം ഉത്തേജിപ്പിക്കുന്നതിന് സംസ്ഥാനങ്ങളെ സഹായിക്കാന്‍ ലക്ഷം കോടി രൂപ അനുവദിച്ചു.
ചിപ്പ് ഘടിപ്പിച്ച ഈ പാസ്‌പോര്‍ട്ട് സംവിധാനം വരും. ഒന്നര ലക്ഷം പോസ്റ്റ് ഓഫീസുകളില്‍ കൂടി കോര്‍ബാങ്കിങ് സൗകര്യം. നാല് സ്ഥലങ്ങളില്‍ ലോജിസ്റ്റിക് പാര്‍ക്കുകള്‍ നിര്‍മിക്കും. എല്‍ഐസി ഐപിഒ ഉടന്‍.
ചെറുകിട മേഖലയ്ക്ക് രണ്ട് ലക്ഷം കോടിയുടെ സഹായം നല്‍കും. ചെറുകിട വ്യവസായങ്ങള്‍ക്ക് എമര്‍ജന്‍സി ക്രെഡിറ്റ് ലൈന്‍ ഗാരന്റി പദ്ധതി 2023 വരെ നീട്ടി.
പോളിഷ് ചെയ്ത ഡയമണ്ടുകള്‍ക്കും രത്‌നങ്ങള്‍ക്കുമുളള കസ്റ്റംസ് തീരുവ അഞ്ചുശതമാനമാക്കി കുറച്ചു.
ഇലക്ട്രോണിക്‌സ് പാര്‍ട്‌സുകള്‍ക്കും കസ്റ്റംസ് തീരുവയില്‍ ഇളവ്. ഇതോടെ വസ്ത്രങ്ങള്‍, വജ്രം-രത്‌നക്കല്ലുകള്‍, പെട്രോളിയം ഉത്പന്നങ്ങള്‍ക്കായുള്ള രാസവസ്തുക്കള്‍, സ്റ്റീല്‍ സ്‌ക്രാപ്പുകള്‍, മൊബൈല്‍ ഫോണുകള്‍, മൊബൈല്‍ ഫോണ്‍ ചാര്‍ജര്‍ മുതലായവയ്ക്ക് വിലകുറയും.
കുട, ഇറക്കുമതി വസ്തുക്കള്‍ എന്നിവയ്ക്ക് വില കൂടും. ഇന്ധനവില ഉയരും. എഥനോള്‍ ചേര്‍ക്കാത്ത ഇന്ധനത്തിന് രണ്ടു രൂപ അധിക എക്‌സൈസ് തീരുവ.
റോഡ്, വിമാനത്താവളം, റെയില്‍വേ, തുറമുഖങ്ങള്‍ അടക്കം 7 ഗതാഗത മേഖലകളില്‍ ദ്രുതവികസനം ലക്ഷ്യമിടുന്ന പിഎം ഗതിശക്തി പദ്ധതിയുടെ സമഗ്ര മാസ്റ്റര്‍ പ്ലാന്‍.
5 ജി ഇന്റര്‍നെറ്റ് ഈ വര്‍ഷം തന്നെ. ലേലത്തിലൂടെ സ്വകാര്യ കമ്പനികള്‍ക്ക് 5 ജി ലൈസന്‍സ് നല്‍കും.
കര്‍ഷകര്‍ക്ക് താങ്ങുവില ഉറപ്പാക്കാന്‍ 1.37 ലക്ഷം കോടി രൂപ നീക്കിവയ്ക്കുമെന്നും ബജറ്റില്‍ നിര്‍ദേശമുണ്ട്.
ആദായ നികുതിയില്‍ ഇളവുകളില്ല. നികുതി സ്ലാബുകളിലും മാറ്റമില്ല.
ആദായ നികുതി റിട്ടേണ്‍ പരിഷ്‌കരിക്കും. റിട്ടേണിലെ തെറ്റുകള്‍ തിരുത്തി വീണ്ടും സമര്‍പ്പിക്കാന്‍ രണ്ടുവര്‍ഷം സമയമുണ്ടാകും. മറച്ചുവച്ച വരുമാനം പിന്നീടു വെളിപ്പെടുത്താം. സഹകരണ സംഘങ്ങള്‍ക്ക് മിനിമം നികുതി 15 ശതമാനമാക്കി.
സംസ്ഥാന സര്‍ക്കാര്‍ ജീവനക്കാര്‍ക്ക് എന്‍പിഎസ് നിക്ഷേപങ്ങള്‍ക്ക് 14 ശതമാനം വരെ നികുതിയിളവ്.
ഇലക്ട്രിക് വാഹനങ്ങളുടെ സ്വീകാര്യത വര്‍ധിപ്പിക്കും. കൂടുതല്‍ പ്രദേശങ്ങളിലേക്ക് ഇലക്ട്രിക് ചാര്‍ജിങ്ങ് സംവിധാനം വ്യാപിപ്പിക്കും.
കേന്ദ്രബജറ്റില്‍ പ്രതിരോധമേഖലയ്ക്ക് 2.39 ലക്ഷം കോടി രൂപ. വാക്‌സീനേഷന് 5000 കോടി രൂപയാണ് മാറ്റിവച്ചത്. കഴിഞ്ഞ ബജറ്റില്‍ 35000 കോടി നീക്കിവച്ചിരുന്നു.
ഒന്നര മണിക്കൂറില്‍ ബജറ്റ് പ്രസംഗം അവസാനിപ്പിച്ച് നിര്‍മല സീതാരാമന്‍. രാവിലെ 11 ന് ആരംഭിച്ച കേന്ദ്രബജറ്റ് അവതരണം 12.35- ന് ധനമന്ത്രി അവസാനിപ്പിച്ചു.
നടിയെ ആക്രമിച്ച കേസിലെ പുനരന്വേഷണം ഒരുമാസത്തിനം തീര്‍ക്കണമെന്ന് വിചാരണ കോടതി ഉത്തരവിട്ടു. അന്വേഷണത്തിന് ആറ് മാസത്തെ സമയം അനുവദിക്കണമെന്ന പ്രോസിക്യൂഷന്റെ ആവശ്യം തള്ളി. അടുത്ത മാര്‍ച്ച് ഒന്നിന് മുമ്പ് അന്തിമ റിപ്പോര്‍ട്ട് സമര്‍പ്പിക്കണമെന്നും കോടതി നിര്‍ദ്ദേശിച്ചു. വിചാരണ കാലയളവ് നീട്ടണമെന്ന് വിചാരണ കോടതി സുപ്രീംകോടതിയോട് ആവശ്യപ്പെടും.
അന്വേഷണ ഉദ്യോഗസ്ഥരെ കൊല്ലാന്‍ ശ്രമിച്ചെന്ന കേസില്‍ ദിലീപിന്റെ കൊച്ചി എംജി റോഡിലെ മേത്തര്‍ അപ്പാര്‍ട്ട്‌മെന്റില്‍ തെളിവെടുപ്പ്. ദിലീപ് അടക്കമുള്ള പ്രതികള്‍ ഇവിടുത്തെ ഫ്‌ളാറ്റില്‍ ഗൂഢാലോചന നടത്തിയെന്ന മൊഴിയെ തുടര്‍ന്നാണ് ക്രൈംബ്രാഞ്ച് സംഘം തെളിവെടുപ്പ് നടത്തിയത്.
തന്റെ പക്കല്‍ ഇല്ലെന്ന് കഴിഞ്ഞദിവസം ദിലീപ് കോടതിയില്‍ അറിയിച്ച നാലാം നമ്പര്‍ ഫോണ്‍ ഹൈക്കോടതി രജിസ്ട്രാര്‍ ജനറലിന് കൈമാറി. താന്‍ ഉപയോഗിക്കുന്ന രണ്ട് ഐ ഫോണുകളില്‍ ഒന്നാണെന്ന വിശദീകരണത്തോടെയാണ് ഫോണ്‍ കൈമാറിയത്.
പാചകവാതകത്തിനു വില കുറഞ്ഞു. വാണിജ്യാവശ്യത്തിനുള്ള സിലിണ്ടറിന് 101 രൂപ കുറഞ്ഞ് 1,902 രൂപയായി.
മൂന്നു ജില്ലകളില്‍ക്കൂടി സിറ്റി ഗ്യാസ് നല്‍കാന്‍ കരാറായി. ഇതോടെ സംസ്ഥാനത്തെ എല്ലാ ജില്ലകളിലും പ്രകൃതിവാതകം എത്താന്‍ സാധ്യതയൊരുങ്ങി. കോട്ടയം, ഇടുക്കി, പത്തനംതിട്ട ജില്ലകളില്‍ സിറ്റി ഗ്യാസ് വിതരണത്തിന് ഷോള ഗ്യാസ്‌കോ ലിമിറ്റഡിന് പെട്രോളിയം ആന്‍ഡ് നാച്ചുറല്‍ ഗ്യാസ് റഗുലേറ്ററി ബോര്‍ഡ് അനുമതി നല്‍കി.
ആലപ്പുഴ ചാരുംമൂട് താമരക്കുളത്ത് അമ്മയെയും രണ്ടു മക്കളെയും വീട്ടിനുള്ളില്‍ കത്തിക്കരിഞ്ഞ നിലയില്‍ കണ്ടെത്തി. കിഴക്കേമുറി കലാഭവനത്തില്‍ ശശിധരന്‍പിള്ളയുടെ ഭാര്യ പ്രസന്ന (54), മക്കളായ ശശികല (34 ), മീനു (32) എന്നിവരാണ് മരിച്ചത്. ശശിധരന്‍പിള്ള ഒരു മാസമായി കരുനാഗപ്പള്ളിയിലെ ആശുപത്രിയില്‍ ചികിത്സയിലാണ്.
സംസ്ഥാനത്തെ സി കാറ്റഗറി ജില്ലകളില്‍ തീയറ്ററുകള്‍ തുറക്കാനാകില്ലെന്നു സര്‍ക്കാര്‍ ഹൈക്കോടതിയില്‍. അടച്ചിട്ട എസി ഹാളുകളില്‍ ആളുകള്‍ രണ്ട് മണിക്കൂറിലധികം ചെലവഴിക്കുന്നത് കൊവിഡ് വ്യാപന സാധ്യത വര്‍ധിപ്പിക്കുമെന്നും സര്‍ക്കാര്‍ ഹൈക്കോടതിയില്‍ പറഞ്ഞു.
കണ്ണൂരില്‍ പാര്‍ക്കിംഗിനെച്ചൊല്ലിയുള്ള തര്‍ക്കത്തെത്തുടര്‍ന്ന് ഹോട്ടലുടമ കുത്തേറ്റ് മരിച്ചു. സുഫി മക്കാനി ഹോട്ടല്‍ ഉടമയായ ജംഷീര്‍ ആണ് കൊല്ലപ്പെട്ടത്. രണ്ടു പേരെ പോലീസ് കസ്റ്റഡിയിലെടുത്തു.
മകനെ ജാമ്യത്തിലിറക്കാന്‍ സഹായിക്കാത്തതിന് അച്ഛന്‍ സി.പി.ഐ നേതാവിനെ ഓഫീസിനുള്ളിലിട്ട് കുത്തിപ്പരിക്കേല്‍പ്പിച്ചു. കുളത്തൂപ്പുഴയില്‍ ആധാരമെഴുത്ത് ജോലിചെയ്യുന്ന സി.പി.ഐ അഞ്ചല്‍ മണ്ഡലം സെക്രട്ടേറിയറ്റ് അംഗം സാംനഗര്‍ വിജിതാഭവനില്‍ പി.ജെ.രാജു(60)വിനാണ് കുത്തേറ്റത്. പ്രതി സാംനഗര്‍ നിഷാമന്‍സിലില്‍ എം.ഷാജി (57) പോലീസില്‍ കീഴടങ്ങി.
കോവളത്തെ പതിനാലുകാരിയുടെ കൊലപാതകത്തില്‍ പ്രതികളായ റഫീക്കയെയും മകന്‍ ഷെഫീക്കിനെയും കൊലപാതകം നടന്ന വീട്ടിലെത്തിച്ച് തെളിവെടുപ്പ് നടത്തി. ഇരുവര്‍ക്കും നേരെ പ്രദേശവാസികളുടെ രോഷപ്രകടനമുണ്ടായി. ഹെല്‍മെറ്റ് ധരിപ്പിച്ചാണ് ഇരുവരെയും തെളിവെടുപ്പിനെത്തിച്ചത്.
കടല്‍ക്കൊല കേസില്‍ ഇറ്റാലിയന്‍ മറൈനുകള്‍ക്കെതിരായ കൊലപാതകക്കേസ് ഇറ്റാലിയന്‍ കോടതി തള്ളി. ഇന്ത്യയില്‍ ഇവര്‍ക്കെതിരായ കേസ് നടപടികള്‍ സുപ്രീംകോടതി അവസാനിപ്പിച്ച് മാസങ്ങള്‍ക്കുള്ളിലാണ് റോമിലെ കോടതി വിധി.
എന്‍ഫോഴ്‌സ്‌മെന്റ് ഡയറക്ടറേറ്റ് മുന്‍ ജോയിന്റ് ഡയറക്ടര്‍ രാജേശ്വര്‍ സിങ് സര്‍വീസില്‍ നിന്ന് സ്വമേധയാ വിരമിച്ചു. ഉത്തര്‍പ്രദേശ് നിയമസഭാ തിരഞ്ഞെടുപ്പില്‍ ബിജെപി സ്ഥാനാര്‍ഥിയായി മത്സരിക്കും. 2 ജി സ്‌പെക്ട്രം, അഗസ്താവെസ്റ്റ്‌ലാന്‍ഡ് ഇടപാട് തുടങ്ങി രണ്ടാം യുപിഎ സര്‍ക്കാരിനെ പ്രതിസന്ധിയിലാക്കിയ നിരവധി കേസുകളുടെ അന്വേഷണ ഉദ്യോഗസ്ഥനായിരുന്നു രാജേശ്വര്‍.
പതിനാറുകാരന്‍ ഓടിച്ച എസ്‌യുവി റോഡരികിലെ കുടിലുകളില്‍ ഉറങ്ങിക്കിടന്നവരുടെ ഇടയിലേക്ക് പാഞ്ഞുകയറി നാലു പേര്‍ മരിച്ച സംഭവത്തില്‍ കുട്ടിയുടെ പിതാവിനെതിരെ നരഹത്യയ്ക്ക് കേസ്. തെലങ്കാനയിലെ കരിംനഗര്‍ നഗരത്തിലെ കോതിരംപൂരിന് സമീപമാണ് അപകടമുണ്ടായത്.
ഇന്ത്യന്‍ ഓയില്‍ കോര്‍പറേഷനില്‍ 1196 ഒഴിവുകളിലേക്കു നിയമനം നടത്തുന്നു. ഓണ്‍ലൈനിലൂടെ അപേക്ഷിക്കാം.
അടുത്ത സാമ്പത്തിക വര്‍ഷത്തേക്കുള്ള എച്ച്1-ബി വിസകള്‍ക്കുള്ള രജിസ്ട്രേഷന്‍ മാര്‍ച്ച് 1ന് ആരംഭിക്കുമെന്ന് യുഎസ് സിറ്റിസണ്‍ഷിപ് ആന്‍ഡ് ഇമിഗ്രേഷന്‍ സര്‍വീസസ് അറിയിച്ചു. അമേരിക്കന്‍ കമ്പനികളില്‍ വിദേശികള്‍ക്ക് തൊഴില്‍ ചെയ്യാന്‍ അനുമതി നല്‍കുന്ന ഈ നോണ്‍ ഇമിഗ്രന്റ് വിസയ്ക്ക് വേണ്ടി മാര്‍ച്ച് 18 വരെ രജിസ്റ്റര്‍ ചെയ്യാം. ഓണ്‍ലൈന്‍ എച്ച്1 ബി രജിസ്ട്രേഷന്‍ സംവിധാനം ഉപയോഗിച്ചാണ് വിസയ്ക്കുള്ള അപേക്ഷ സമര്‍പ്പിക്കേണ്ടത്. ഓരോ അപേക്ഷയ്ക്കും സ്ഥിരീകരണ നമ്പര്‍ നല്‍കും. ഇത് ഉപയോഗിച്ച് രജിസ്ട്രേഷന്‍ നപടികള്‍ ട്രാക്ക് ചെയ്യാന്‍ സാധിക്കും. ഓരോ അപേക്ഷകനും പ്രത്യേക 'മൈ യുഎസിഐഎസ്' അക്കൗണ്ട് ആരംഭിക്കണം. 10 ഡോളറാണ് രജിസ്ട്രേഷന്‍ ഫീസ്.
അതിര്‍ത്തിയിലെ പ്രശ്‌നങ്ങള്‍ നിലനില്‍ക്കുമ്പോഴും ഇന്ത്യയും ചൈനയും തമ്മിലുള്ള വ്യാപാരം മികച്ച രീതിയില്‍ തന്നെ മുന്നോട്ട് പോകുകയാണ്. ഇറക്കുമതിക്ക് പുറമെ ചൈനയിലേക്കുള്ള ഇന്ത്യന്‍ ഉല്‍പന്നങ്ങളുടെ കയറ്റുമതി വന്‍തോതില്‍ വര്‍ദ്ധിച്ചതായാണ് കണക്കുകള്‍ സൂചിപ്പിക്കുന്നത്. 2019നെ അപേക്ഷിച്ച് 34 ശതമാനം വര്‍ദ്ധിച്ച് 22.9 ബില്യണ്‍ അമേരിക്കന്‍ ഡോളറിന്റെ വര്‍ദ്ധനവാണ് കയറ്റുമതിയില്‍ ഇന്ത്യ കൈവരിച്ചിരിക്കുന്നത്. 2019ല്‍ ഇത് 17.1 ബില്യണായിരുന്നു. ഇറക്കുമതിയിലും വര്‍ദ്ധനവ് ഉണ്ടായിട്ടുണ്ടെന്ന് റിപ്പോര്‍ട്ടുകള്‍ വ്യക്തമാക്കുന്നു. കഴിഞ്ഞ വര്‍ഷം 28 ശതമാനം വര്‍ദ്ധിച്ച് 87.5 ബില്യണ്‍ അമേരിക്കന്‍ ഡോളറായി ഇത് ഉയര്‍ന്നിട്ടുണ്ട്. 2019ല്‍ ഇത് 68.4 ബില്യണ്‍ ഡോളറായിരുന്നു.
തെന്നിന്ത്യയില്‍ സൂപ്പര്‍ ഹിറ്റ് സിനിമകള്‍ സമ്മാനിച്ച കൊരട്ടാല ശിവയ്‌ക്കൊപ്പം വീണ്ടും ജൂനിയര്‍ എന്‍ടിആര്‍. മോഹന്‍ലാലിനൊപ്പം അഭിനയിച്ച ജനത ഗാരേജിനു ശേഷം കൊരട്ടാല ശിവയുമായി ചേര്‍ന്ന് ജൂനിയര്‍ എന്‍ ടി ആര്‍ സഹകരിക്കുന്ന രണ്ടാമത്തെ ചിത്രമാണിത്. സിനിമയുടെ പൂജ ഫെബ്രുവരി ഏഴിന് നടക്കും. സംഗീത സംവിധായകനായി അനിരുദ്ധിന്റെ പേരാണ് ഉയര്‍ന്നുകേള്‍ക്കുന്നത്. അലിയാ ഭട്ട് നായികയായേക്കുമെന്ന വിവരമുണ്ട്. അതേസമയം, ജനത ഗാരേജിലേത് പോലെ മോഹന്‍ലാലും ചിത്രത്തില്‍ ഉണ്ടാകുമോ എന്നാണ് ആരാധകര്‍ ചോദിക്കുന്നത്.
തെലുങ്ക് സിനിമാപ്രേമികള്‍ ഏറെനാളായി കാത്തിരിക്കുന്ന ചിത്രമാണ് 'അയ്യപ്പനും കോശിയും' എന്ന മലയാള ചിത്രത്തിന്റെ റീമേക്ക്. അന്തരിച്ച സംവിധായകന്‍ സച്ചിയുടെ അവസാന ചിത്രം, തെലുങ്കിലെത്തുമ്പോള്‍ പ്രധാന കഥാപാത്രങ്ങളെ അവതരിപ്പിക്കുന്നത് പവന്‍ കല്യാണും റാണ ദഗുബാട്ടിയുമാണ്. 'ഭീംല നായക്' എന്നാണ് ചിത്രത്തിന്റെ ടൈറ്റില്‍. ഇപ്പോഴിതാ ചിത്രത്തിന്റെ റിലീസ് പ്രഖ്യാപിച്ചിരിക്കുകയാണ് അണിയറ പ്രവര്‍ത്തകര്‍. ഫെബ്രുവരിയില്‍ അല്ലെങ്കില്‍ ഏപ്രിലില്‍ റിലീസ് ചെയ്യുമെന്നാണ് അണിയറപ്രവര്‍ത്തകര്‍ അറിയിച്ചിരിക്കുന്നത്.
നിസാന്‍ ഇന്ത്യയുടെ ജനപ്രിയ മോഡലായ മാഗ്‌നൈറ്റ് കോംപാക്റ്റ് എസ്യുവിക്ക് ഇതുവരെ 78,000 ബുക്കിംഗുകള്‍ ലഭിച്ചു. ചെന്നൈയ്ക്ക് സമീപമുള്ള റെനോ-നിസാന്‍ പ്ലാന്റില്‍ മാഗ്‌നൈറ്റിന്റെ ഉത്പാദനം ദ്രുതഗതിയില്‍ പുരോഗമിക്കുകയാണ്, ഇതുവരെ 42,000 യൂണിറ്റ് എസ്യുവികള്‍ നിര്‍മ്മിച്ചതായി കമ്പനി സ്ഥിരീകരിച്ചു. നിലവില്‍ 5.75 ലക്ഷം മുതല്‍ 10.36 ലക്ഷം വരെയാണ് മാഗ്‌നൈറ്റിന്റെ വില ദില്ലി എക്‌സ് ഷോറൂം വില.
കൊറോണ വൈറസിന്റെ സാന്നിധ്യം ചിലരില്‍ ഏഴ് മാസങ്ങള്‍ക്കപ്പുറവും സജീവമായി തുടരാമെന്ന് പഠനം. ഫ്രാന്‍സിലെ പാസ്ചര്‍ ഇന്‍സ്റ്റിറ്റ്യൂട്ട് , ബ്രസീലിലെ സാവോ പോളോ സര്‍വകലാശാല , ഒസ് വാള്‍ഡോ ക്രൂസ് ഫൗണ്ടേഷന്‍ എന്നിവിടങ്ങളിലെ ശാസ്ത്രജ്ഞന്മാരുടെ സംഘം നടത്തിയ പഠനത്തിലാണ് ഈ കണ്ടെത്തല്‍. ബ്രസീലിലെ 38 രോഗികളെയാണ് ഗവേഷകര്‍ നിരീക്ഷിച്ചത്. ഇതില്‍ മൂന്ന് പേരില്‍ 70 ദിവസത്തിനപ്പുറം സാര്‍സ് കൊവ്-2 വൈറസിന്റെ സാന്നിധ്യം കണ്ടെത്താന്‍ സാധിച്ചു. ഇതിന്റെ അടിസ്ഥാനത്തില്‍ കൊവിഡ് ബാധിതരില്‍ എട്ട് ശതമാനത്തിന് ലക്ഷണങ്ങളൊന്നും കൂടാതെതന്നെ രണ്ട് മാസത്തില്‍ കൂടുതല്‍ രോഗം പരത്താനാകുമെന്ന നിഗമനത്തിലേയ്ക്ക് ശാസ്ത്രജ്ഞര്‍ എത്തുകയായിരുന്നു. അതേസമയം 20 ദിവസത്തേയ്ക്ക് മിതമായ ലക്ഷണങ്ങള്‍ പ്രകടിപ്പിച്ച 38കാരനായ ഒരു രോഗിയില്‍ വൈറസ് 232 ദിവസം തുടര്‍ന്നു എന്നും ഗവേഷകര്‍ പറയുന്നു. അതായത് ഏകദേശം ഏഴ് മാസത്തില്‍ അധികം തുടര്‍ച്ചയായ ചികിത്സ ലഭിക്കുകയോ മാസ്‌ക്, സാമൂഹിക അകലം പോലുള്ള പ്രതിരോധ നടപടികള്‍ സ്വീകരിക്കുകയോ ചെയ്തില്ലായിരുന്നുവെങ്കില്‍ ഇക്കാലയളവിലെല്ലാം രോഗം പരത്താന്‍ ഇയാള്‍ക്ക് സാധിച്ചേനെ എന്നും ഫ്രോണ്ടിയേഴ്സ് ഇന്‍ മെഡിസിന്‍ ജേണലില്‍ പ്രസിദ്ധീകരിച്ച ഗവേഷണ റിപ്പോര്‍ട്ടില്‍ പറയുന്നു.
ഇന്നത്തെ വിനിമയ നിരക്ക്
ഡോളര്‍ - 74.80, പൗണ്ട് - 100.79, യൂറോ - 84.21, സ്വിസ് ഫ്രാങ്ക് - 80.95, ഓസ്‌ട്രേലിയന്‍ ഡോളര്‍ - 53.00, ബഹറിന്‍ ദിനാര്‍ - 198.43, കുവൈത്ത് ദിനാര്‍ -247.06, ഒമാനി റിയാല്‍ - 194.26, സൗദി റിയാല്‍ - 19.93, യു.എ.ഇ ദിര്‍ഹം - 20.36, ഖത്തര്‍ റിയാല്‍ - 20.54, കനേഡിയന്‍ ഡോളര്‍ - 58.08.
