സംസ്ഥാനത്തെ സ്കൂളുകള്ക്ക് ജനുവരി 27ന് അവധി പ്രഖ്യാപിച്ചു. 1 മുതല് 10 വരെയുള്ള ക്ലാസുകള്ക്കാണ് അവധി. മൂന്നാം ഘട്ട ക്ലസ്റ്റര് യോഗങ്ങള് ശനിയാഴ്ച നടക്കുന്നതിനാലാണ് അവധി. പൊതുവിദ്യാഭാസ മന്ത്രി വി ശിവന്കുട്ടിയുടെ നേതൃത്വത്തില് കഴിഞ്ഞ ദിവസം ചേര്ന്ന യോഗത്തിലാണ് തീരുമാനം. യോഗത്തിന്റെ അടിസ്ഥാനത്തില് പൊതുവിദ്യാഭ്യസ ഡയറക്ടര് എസ് ഷാനവാസാണ് അവധി പ്രഖ്യാപിച്ചത്.
സര്ക്കാര്, എയ്ഡഡ് സ്കൂളുകളില് നിന്നായി എല്.പി തലത്തില് 51,515 അധ്യാപകരും യു.പിതലത്തില് 40,036 അധ്യാപകരും ഹൈസ്കൂള് തലത്തില് 42,989 അധ്യാപകരുമാണ് പരിശീലനത്തില് പങ്കെടുക്കുന്നത്. എല്.പി തലം ക്ലാസ് അടിസ്ഥാനത്തില് പഞ്ചായത്ത് തലത്തിലും യു.പിതലം വിഷയാടിസ്ഥാനത്തില് ബി.ആര്.സി തലത്തിലും ഹൈസ്കൂള് തലം വിഷയാടിസ്ഥാനത്തില് വിദ്യാഭ്യാസ ജില്ലതലത്തിലും ആണ് ക്ലസ്റ്റര് പരിശീലനങ്ങള് നടക്കുന്നത്. 40-50 അധ്യാപകര്ക്ക് ഒരു ബാച്ച് എന്ന ക്രമത്തിലാണ് ക്ലസ്റ്റര് പരിശീലനങ്ങള് ആസൂത്രണം ചെയ്തിട്ടുള്ളത്. ഒരു ബാച്ചിന് രണ്ട് റിസോഴ്സ് പേഴ്സണുകള് എന്ന നിലയിലാണ് ക്രമീകരണം നടത്തിയിട്ടുള്ളത്.
കഴിഞ്ഞ ക്ലസ്റ്റര് പരിശീലനത്തിനുശേഷം ക്ലാസില് നടന്ന പഠന പ്രവര്ത്തനങ്ങളുടെ അവലോകനം, രണ്ടാം ടേം മൂല്യനിര്ണയത്തിന്റെ ഫീഡ്ബാക്ക് പങ്കുവെക്കല്, ഫെബ്രുവരി അവസാനം വരെ പഠിപ്പിക്കേണ്ട കാര്യങ്ങളുടെ ആസൂത്രണം, കുട്ടികളുടെ മികവുകള് രക്ഷിതാക്കളുടെയും സമൂഹത്തിന്റെയും മുന്നില് പ്രകടിപ്പിക്കുന്ന പഠനോത്സവത്തിന് സജ്ജമാക്കുന്നതിനായുള്ള പ്രാഥമിക ധാരണ നല്കുക എന്നിവയാണ് ക്ലസ്റ്റര് പരിശീലനത്തിന്റെ ഭാഗമായി ഉള്ളത്. പങ്കാളിത്തം പൂര്ണ്ണമാക്കാന് എല്ലാ അധ്യാപകരും ശ്രമിക്കണമെന്ന് മന്ത്രി വി. ശിവന്കുട്ടി യോഗത്തില് പറഞ്ഞു. ഇതിനു മുമ്പ് 2023 ഒക്ടോബര് ഏഴിനും 20023 നവംബര് 23നുമാണ് ക്ലസ്റ്റര് പരിശീലനങ്ങള് നടന്നത്.
കൂടുതൽ വാർത്തകൾക്കായി വാട്സാപ്പ് ഗ്രൂപ്പിൽ അംഗമാവുക.ക്ലിക്ക്.
