കെ എസ് ആർ ടി സി സ്വിഫ്റ്റില് ഡ്രൈവർ - കണ്ടക്ടർ തസ്തികകളില് ഒഴിവുകള്. നാനൂറ് വേക്കൻസികളാണ് റിപ്പോർട്ട് ചെയ്തിരിക്കുന്നത്. കരാർ അടിസ്ഥാനത്തിലായിരിക്കും നിയമനമെന്ന് അധികൃതർ അറിയിച്ചു.
പത്താം ക്ലാസ് പാസായവർ മാത്രമേ അപേക്ഷിക്കേണ്ടതുള്ളൂ. ഹെവി മോട്ടോർ ഡ്രൈവിംഗ് ലൈസൻസ് കൂടാതെ മുപ്പതിലധികം സീറ്റുള്ള ബസുകള് ഓടിച്ച് അഞ്ച് വർഷത്തെ പ്രവർത്തി പരിചയവും വേണം. സർക്കാർ ഡോക്ടർമാർ ( സിവില് സർജനോ അതിനുമുകളിലോ ഉള്ളവർ) സാക്ഷ്യപ്പെടുത്തിയ ഫിസിക്കല് ഫിറ്റ്നസ്, കണ്ണ് പരിശോധന സർട്ടിഫിക്കറ്റുകള് വേണം.
കൂടാതെ മലയാളം, ഇംഗ്ലീഷ് ഭാഷകളില് പ്രാവീണ്യം വേണം( എഴുതാനും വായിക്കാനും അറിഞ്ഞിരിക്കണം). പ്രായ പരിധി - 25 വയസ് മുതല് 55 വയസ് വരെ. എട്ട് മണിക്കൂർ ജോലിക്ക് 715 രൂപ ലഭിക്കും. ഓവർ ടൈം ഒരു മണിക്കൂറിന് 130 രൂപവച്ച് ലഭിക്കും. സെക്യൂരിറ്റി ഡെപ്പോസിറ്റായി 30,000 രൂപ നല്കണം.
അതേസമയം, കെ എസ് ആർ ടി സി ജീവനക്കാരെ സെക്യൂരിറ്റി ഡെപ്പോസിറ്റില് നിന്ന് ഒഴിവാക്കിയിട്ടുണ്ട്. താത്പര്യമുള്ള ഉദ്യോഗാർത്ഥികള് www.cmd.kerala.gov.in. എന്ന വെബ്സൈറ്റ് വഴിയാണ് അപേക്ഷ സമർപ്പിക്കേണ്ടത്. ജൂണ് 30 ന് വൈകിട്ട് അഞ്ച് വരെ അപേക്ഷ സമർപ്പിക്കാമെന്നും അതിനുശേഷം ലഭിക്കുന്ന അപേക്ഷകള് സ്വീകരിക്കില്ലെന്നും അധികൃതർ അറിയിച്ചു.
