കോട്ടയത്ത് മഴയ്ക്കൊപ്പം കനത്ത കാറ്റ്; മരങ്ങൾ കടപുഴകി, വ്യാപക നാശനഷ്ട്ടം

കോട്ടയം ജില്ലയിൽ മഴയ്ക്ക് ഒപ്പം എത്തിയ കാറ്റിൽ വിവിധ പ്രദേശങ്ങളിൽ വ്യാപക നാശം. പാലാ പ്രവിത്താനത്ത് റോഡിലേക്ക് മരം വീണ് വൈദ്യുതി പോസ്‌റ്റുകൾ അടക്കം തകർന്നു. പ്രവിത്താനം- ഉള്ളനാട് റോഡിൽ ഗതാഗത തടസ്സമുണ്ട്. ഉച്ചയ്ക്ക് 12.30ഓടെ വീശിയടിച്ച കാറ്റിലാണു നാശം. റോഡിൽ പാർക്ക് ചെയ്ത വാഹനങ്ങൾക്കും കേടുപാടുകളുണ്ട്.

കുമരകം- ചേർത്തല റോഡിൽ ബണ്ട് റോഡിൽ മരം റോഡിലേക്ക് കടപുഴകി വീണു. രണ്ട് കാറുകൾക്കു മുകളിലേക്കാണു മരം വീണത്. റോഡിൽ ഗതാഗത തടസ്സമുണ്ട്. വാഴുർ- ചങ്ങനാശേരി റോഡിൽ ചമ്പക്കര പള്ളിക്കു സമീപം കുറ്റൻ മരം റോഡിലേക്കു വീണു. ഇവിടെയും റോഡിൽ ഗതാഗത തടസ്സമുണ്ട്. അഗ്നിരക്ഷാസേന മരം വെട്ടി നീക്കുന്നു.