കേരള വ്യാപാരി വ്യവസായി ഏകോപന സമിതി ചെറുതോണി യൂണിറ്റിന്റെ ആഭിമുഖ്യത്തിൽ ഇഫ്താർ സംഗമം സംഘടിപ്പിച്ചു. ചെറുതോണി ജില്ലാ വ്യാപാര ഭവനിൽ നടന്ന പരിപാടിയിൽ വ്യാപാരികളും വിവിധ മത-സാമൂഹിക സംഘടനകളുടെ പ്രതിനിധികളും നാട്ടുകാരും പങ്കെടുത്തു. റമദാൻ മാസത്തിന്റെ ആത്മീയ സന്ദേശമായ സൗഹാർദ്ദവും സഹോദരത്വവും പങ്കുവെപ്പും ഉയർത്തിപ്പിടിക്കുന്നതിന്റെ ഭാഗമായാണ് ഇഫ്താർ സംഗമം സംഘടിപ്പിച്ചത്.
അസോസിയേഷൻ ജില്ലാ സെക്രട്ടറി ജോസ് കുഴികണ്ടം അധ്യക്ഷത വഹിച്ച യോഗം ഇടുക്കി ഇമാം ഖാലിദ് ഉവൈസി ഉദ്ഘാടനം ചെയ്തു. റമദാൻ മാസം മനുഷ്യർക്കിടയിൽ സ്നേഹവും കരുണയും പരസ്പര ബഹുമാനവും വളർത്തുന്ന മഹത്തായ കാലഘട്ടമാണെന്നും സമൂഹത്തിലെ ഐക്യവും സൗഹാർദ്ദവും ശക്തിപ്പെടുത്തുന്നതിൽ ഇത്തരം ഇഫ്താർ സംഗമങ്ങൾ വലിയ പങ്ക് വഹിക്കുന്നുവെന്നും അദ്ദേഹം പറഞ്ഞു.
പരിപാടിയിൽ എസ്.എൻ.ഡി.പി ഇടുക്കി യൂണിയൻ പ്രസിഡണ്ട് പി. രാജൻ, ഇടുക്കി എൻ.എസ്.എസ് കരയോഗം പ്രസിഡണ്ട് പി.സി. രവീന്ദ്രനാഥ്, ചെറുതോണി ജുമാ മസ്ജിദ് പ്രസിഡണ്ട് കബീർ സുഹരി, കേരള വ്യാപാരി വ്യവസായി ഏകോപന സമിതി നിയോജക മണ്ഡലം പ്രസിഡണ്ട് ഷിജോ തടത്തിൽ എന്നിവർ ആശംസകൾ നേർന്നു. സമൂഹത്തിലെ മതസൗഹാർദ്ദവും ഐക്യവും നിലനിർത്താൻ ഇത്തരത്തിലുള്ള പരിപാടികൾ ഏറെ സഹായകരമാണെന്ന് ആശംസാപ്രസംഗങ്ങളിൽ സംസാരിച്ചവർ പറഞ്ഞു.
വിവിധ സമുദായ നേതാക്കളും വ്യാപാരി പ്രമുഖരും ഒരേ വേദിയിൽ ഒത്തുചേർന്നത് ചെറുതോണിയുടെ മതസൗഹാർദ്ദ പാരമ്പര്യത്തിന് മാറ്റുകൂട്ടി. ചെറുതോണി യൂണിറ്റിലെ നിരവധി വ്യാപാരികളും പൊതുപ്രവർത്തകരും സംഗമത്തിൽ പങ്കെടുത്തു. വ്യാപാര മേഖലയിലെ പ്രതിസന്ധികൾക്കിടയിലും സാമൂഹികവും മതപരവുമായ ഒത്തൊരുമ നിലനിർത്താൻ ഇത്തരം കൂട്ടായ്മകൾ സഹായിക്കുമെന്ന് ഭാരവാഹികൾ വ്യക്തമാക്കി
കൂടുതൽ വാർത്തകൾക്കായി വാട്സാപ്പ് ഗ്രൂപ്പിൽ അംഗമാവുക...👉👉👉...ക്ലിക്ക്.
