സംസ്ഥാനത്ത് ലഹരി മാഫിയക്കെതിരായ പ്രതിരോധം ശക്തമാക്കുന്നതിന്റെ ഭാഗമായി സർക്കാർ നടപ്പിലാക്കുന്ന "ഓപ്പറേഷൻ തൂഫാൻ ദ് നാർക്കോഹണ്ട്" പദ്ധതിയുടെ ഇടുക്കി ജില്ലാതല ഉദ്ഘാടനം സെപ്റ്റംബർ 3 ബുധനാഴ്ച നടക്കും. മുരിക്കാശ്ശേരി പാവനാത്മാ കോളേജ് ഇൻഡോർ സ്റ്റേഡിയത്തിൽ രാവിലെ 10.30-ന് നടക്കുന്ന ചടങ്ങിൽ ആഭ്യന്തര വകുപ്പ് മന്ത്രി രമേശ് ചെന്നിത്തല പദ്ധതി ഉദ്ഘാടനം ചെയ്യുകയും 'ഓപ്പറേഷൻ തൂഫാൻ' പതാക ഉയർത്തുകയും ചെയ്യും. ഇടുക്കി എം.എൽ.എ. റോയി കെ. പൗലോസാണ് ചെറുതോണി പ്രസ് ക്ലബ്ബിൽ ചേർന്ന വാർത്താസമ്മേളനത്തിൽ ഇക്കാര്യം അറിയിച്ചത്.
സിന്തറ്റിക് മയക്കുമരുന്നുകളുടെ വ്യാപനം തടയുകയെന്ന ലക്ഷ്യത്തോടെ ഡിജിറ്റൽ യുഗത്തിന് അനുയോജ്യമായ രീതിയിലാണ് പദ്ധതി വിഭാവനം ചെയ്തിരിക്കുന്നത്. കേരള പോലീസ്, ജില്ലാ ഭരണകൂടം, എക്സൈസ്, വിദ്യാഭ്യാസം, ആരോഗ്യം എന്നീ വകുപ്പുകളും പാവനാത്മാ കോളേജ് മാനേജ്മെന്റും സംയുക്തമായാണ് ജില്ലയിൽ പദ്ധതിക്ക് നേതൃത്വം നൽകുന്നത്.
വിശിഷ്ട വ്യക്തികൾക്ക് 'തൂഫാൻ ബാഡ്ജ്'
ഉദ്ഘാടന സമ്മേളനത്തിൽ ഇടുക്കി എം.എൽ.എ. റോയി കെ. പൗലോസ് അധ്യക്ഷത വഹിക്കും. ഇടുക്കി രൂപതാ മെത്രാൻ മാർ ജോൺ നെല്ലിക്കുന്നേൽ മുഖ്യപ്രഭാഷണം നടത്തും. ജനപ്രതിനിധികൾ, ഉദ്യോഗസ്ഥർ, സാമൂഹിക-സാംസ്കാരിക രംഗത്തെ പ്രമുഖർ തുടങ്ങിയവർ ചടങ്ങിൽ സംബന്ധിക്കും.
വിവിധ മേഖലകളിൽ മാതൃകാപരമായ പ്രവർത്തനം നടത്തുന്ന വിശിഷ്ട വ്യക്തികളെ 'തൂഫാൻ വാരിയേഴ്സ്' ആയി പ്രഖ്യാപിക്കുകയും ചടങ്ങിൽ തൂഫാൻ ബാഡ്ജ് നൽകി ആദരിക്കുകയും ചെയ്യും. പരിപാടിയിൽ പങ്കെടുക്കുന്ന സ്കൂളുകൾക്കും കോളേജുകൾക്കും മെമന്റോയും സർട്ടിഫിക്കറ്റും വിതരണം ചെയ്യും. ലഹരിവിരുദ്ധ പ്രതിജ്ഞ, "തൂഫാൻ: ദി വാരിയർ വിത്ത് ഇൻ" വീഡിയോ പ്രദർശനം എന്നിവയും ചടങ്ങിന്റെ ഭാഗമായി സംഘടിപ്പിച്ചിട്ടുണ്ട്.
എൻ.സി.സി, എസ്.പി.സി, സ്കൗട്ട്സ് ഉൾപ്പെടെയുള്ള വിദ്യാർത്ഥികളും പൊതുജനങ്ങളുമായി ഏകദേശം മൂവായിരത്തോളം പേർ പരിപാടിയിൽ പങ്കെടുക്കുമെന്ന് സംഘാടകർ അറിയിച്ചു. വാർത്താസമ്മേളനത്തിൽ പാവനാത്മാ കോളേജ് പ്രിൻസിപ്പാൾ പ്രൊഫ. സിജോ പി. ജോർജ്, കോളേജ് ബർസാർ ഫാ. വിൽസൺ മണിയാട്ട്, സന്തോഷ് ജോർജ്, ഡോ. ജിജോ ജോർജ്, അലക്സ് തോമസ് എന്നിവരും പങ്കെടുത്തു.
കൂടുതൽ വാർത്തകൾക്കായി വാട്സാപ്പ് ഗ്രൂപ്പിൽ അംഗമാവുക...👉👉👉...ക്ലിക്ക്.
