പ്രധാനപ്പെട്ട വാർത്തകൾ ഒറ്റനോട്ടത്തിൽ
2022 | ഫെബ്രുവരി 17 | വ്യാഴം | 1197 | കുംഭം 5 | മകം
കോഴിക്കോട് ജില്ലയിലെ കനോലി കനാല്‍ ജലപാതയാക്കാന്‍ 1,118 കോടി രൂപയുടെ പദ്ധതിക്ക് മന്ത്രിസഭ അംഗീകാരം നല്‍കി. കിഫ്ബിയിലൂടെയാണ് പദ്ധതി നടപ്പാക്കുക. സര്‍ക്കാരിന്റെ വാര്‍ഷിക പരിപാടികള്‍ ഏപ്രില്‍ ആദ്യവാരം കണ്ണൂരില്‍ ആരംഭിക്കാനും മെയ് അവസാനത്തോടെ തിരുവനന്തപുരത്ത് സമാപിപ്പിക്കാനും മന്ത്രിസഭ തീരുമാനിച്ചു.
ലോകായുക്താ ഓര്‍ഡിനന്‍സ് നിയമമായെങ്കിലും മന്ത്രിസഭായോഗത്തില്‍ എതിര്‍പ്പു പ്രകടിപ്പിച്ച് സിപിഐ മന്ത്രിമാര്‍. ഭേദഗതിയെക്കുറിച്ച് പഠിക്കാനോ രാഷ്ട്രീയ ചര്‍ച്ച നടത്താനോ അവസരം കിട്ടിയില്ലെന്ന് സിപിഐ മന്ത്രിമാര്‍ മന്ത്രിസഭായോഗത്തില്‍ പരാതിപ്പെട്ടു. എന്നാല്‍ മന്ത്രിസഭാ അജന്‍ഡ നിശ്ചയിക്കുന്ന ക്യാബിനറ്റ് നോട്ട് നേരത്തെ നല്‍കിയിരുന്നുവെന്ന് മുഖ്യമന്ത്രി സിപിഐ മന്ത്രിമാര്‍ക്കു മറുപടി നല്‍കി.
എല്‍ഡിഎഫിലെ ഘടകക്ഷിയായ ഐഎന്‍എലില്‍ പിളര്‍പ്പ് പൂര്‍ണമായി. എ.പി അബ്ദുള്‍ വഹാബ് പക്ഷം പുതിയ സംസ്ഥാന ഭാരവാഹികളെ പ്രഖ്യാപിച്ചു. വഹാബുതന്നെ പ്രസിഡന്റ്. നാസര്‍കോയാ തങ്ങളെ ജനറല്‍ സെക്രട്ടറിയായും വഹാബ് ഹാജിയെ ട്രഷററായും തെരഞ്ഞെടുത്തു. കോഴിക്കോട് ചേര്‍ന്ന യോഗത്തിലാണ് പുതിയ കൗണ്‍സില്‍ രൂപീകരിച്ചത്.
കെഎസ്ഇബിയില്‍ ചെയര്‍മാനും സിഐടിയു യൂണിയന്‍ നേതാക്കളും ഉന്നയിച്ച ആരോപണങ്ങളെക്കുറിച്ച് അന്വേഷണം. ഊര്‍ജ വകുപ്പു സെക്രട്ടറി രാജേഷ്‌കുമാര്‍ സിന്‍ഹയോട് അന്വേഷിച്ച് ഒരാഴ്ചയ്ക്കകം റിപ്പോര്‍ട്ടു തരാന്‍ മന്ത്രി കെ. കൃഷ്ണന്‍കുട്ടി ആവശ്യപ്പെട്ടു. വിഷയത്തില്‍ യൂണിയന്‍ നേതാക്കളുമായി ഇന്നു ചര്‍ച്ച നടക്കാനിരിക്കേയാണ് അന്വേഷണത്തിനു മന്ത്രി നിര്‍ദേശം നല്‍കിയത്.
ഇരുചക്ര വാഹനങ്ങളില്‍ യാത്രചെയ്യുന്ന നാലു വയസിനു താഴെയുള്ള കുട്ടികള്‍ക്കും ഹെല്‍മറ്റ് നിര്‍ബന്ധമാക്കുന്ന പുതിയ നിയമം കേന്ദ്ര സര്‍ക്കാര്‍ വിജ്ഞാപനം ചെയ്തു. ഇരുചക്ര വാഹനം ഓടിക്കുന്നയാളുമായി ബന്ധിപ്പിക്കുന്ന സുരക്ഷാ ബെല്‍റ്റും നിര്‍ബന്ധമാണ്. നാലു വയസിനു മുകളിലുള്ളവര്‍ക്കു നേരത്തെതന്നെ ഹെല്‍മറ്റ് നിര്‍ബന്ധമായിരുന്നു.
എംബിബിഎസ് വിദ്യാര്‍ഥികള്‍ പഠനകാലത്ത് അഞ്ചു കുടുംബങ്ങളുടെ ആരോഗ്യപരിപാലന ചുമതല ഏറ്റെടുക്കണമെന്ന പുതിയ നിയമം വരുന്നു. കുടുംബ ദത്ത് പദ്ധതിയുടെ കരടുരേഖ നാഷണല്‍ മെഡിക്കല്‍ കമ്മീഷനാണു തയാറാക്കിയത്. രണ്ടാഴ്ചയിലൊരിക്കല്‍ വീടു സന്ദര്‍ശിച്ച് കുടുംബാംഗങ്ങള്‍ക്ക് ചികില്‍സ നല്‍കണമെന്നാണു പുതുതായി നടപ്പാക്കാനിരിക്കുന്ന ചട്ടത്തിലെ നിര്‍ദേശം.
> |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ആസാം പോലീസ് അഞ്ചു ലക്ഷം രൂപ ഇനാം പ്രഖ്യാപിച്ച പിടികിട്ടാപ്പുള്ളി നിലമ്പൂരില്‍ പിടിയില്‍. സോനിത്പൂര്‍ സ്വദേശി അസ്മത്ത് അലി, സഹായി അമീര്‍ കുസ്മു എന്നിവരാണ് നിലമ്പൂര്‍ പൊലീസിന്റെ പിടിയിലായത്. വംശനാശ ഭീഷണി നേരിടുന്ന ഒറ്റക്കൊമ്പന്‍ കണ്ടാമൃഗത്തെ വേട്ടയാടിയ കേസിലെ പ്രതിയാണ് അസ്മത്ത് അലി.
മലബാര്‍ സിമന്റ്സ് എംഡി എം മുഹമ്മദാലി രാജിക്കത്തു നല്‍കി. മാര്‍ച്ച് 31 വരെയേ സ്ഥാനത്ത് ഉണ്ടാകുവെന്നാണ് രാജിക്കത്തില്‍ പറഞ്ഞിരിക്കുന്നത്. തൊഴിലാളി യൂണിയനുകളുടെ സമ്മര്‍ദ്ദമാണ് രാജിക്ക് കാരണമെന്നാണ് സൂചന. സിഐടിയു പ്രവര്‍ത്തകര്‍ അടുത്തിടെ എംഡിയെ ഉപരോധിച്ചിരുന്നു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ഹരിപ്പാട് കുമാരപുരത്ത് ബിജെപി പ്രവര്‍ത്തകന്‍ കുത്തേറ്റു മരിച്ചു. തൃക്കുന്നപ്പുഴ കിഴക്കേക്കര സ്വദേശി ശരത്ചന്ദ്രന്‍ എന്ന ഇരുപത്താറുകാരനാണ് മരിച്ചത്. ക്ഷേത്രോല്‍സവത്തോടനുബന്ധിച്ചുണ്ടായ തര്‍ക്കത്തെ തുടര്‍ന്നാണ് കൊലപാതകം. ആക്രമിച്ച ഏഴംഗ സംഘത്തിലെ നാലു പേരെ കസ്റ്റഡിയിലെടുത്തു. മയക്കുമരുന്ന് ഗുണ്ടാ-മാഫിയയാണ് കൊലയ്ക്കു പിന്നിലെന്ന് ബിജെപി ആരോപിച്ചു.
തൃശൂരിലെ ഹോട്ടല്‍ മുറിയില്‍ യുവാവിനെയും യുവതിയെയും മരിച്ച നിലയില്‍ കണ്ടെത്തി. തൃശൂര്‍ ഒളരിക്കര സ്വദേശി റിജോ(26), കാര്യാട്ടുക്കര സ്വദേശി സംഗീത (26) എന്നിവരാണു മരിച്ചത്. സംഗീതയുടെ ഭര്‍ത്താവ് സുനിലിന്റെ കാറ്ററിംഗ് സ്ഥാപനത്തിലെ ജീവനക്കാരനാണ് റിജോ.
കണ്ണൂര്‍ തോട്ടടയില്‍ വിവാഹവീട്ടിലെ ബോംബേറില്‍ യുവാവു കൊല്ലപ്പെട്ട സംഭവത്തില്‍ ഒരാള്‍കൂടി അറസ്റ്റിലായി. വടിവാളുമായി എത്തിയ സനാദിന്റെ കൂടെവന്ന കാടാച്ചിറ സ്വദേശി അരുണിനെയാണ് പിടികൂടിയത്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
തൃപ്പുണിത്തുറ കണ്ണംകുളങ്ങരയില്‍ ചുമട്ടുതൊഴിലാളി യൂണിയനുകള്‍ തമ്മില്‍ കൂട്ടത്തല്ല്. പ്രദേശത്തെ ഫ്ളാറ്റ് നിര്‍മാണത്തിനു ചരക്കിറക്കുന്ന തൊഴിലില്‍നിന്ന് ബിഎംഎസ് തൊഴിലാളികളെ മാറ്റിനിര്‍ത്താന്‍ സിഐടിയു, ഐഎന്‍ടിയുസി തൊഴിലാളി യൂണിയനുകള്‍ തമ്മില്‍ ധാരണയുണ്ടാക്കിയിരുന്നു. ഒത്തുതീര്‍പ്പിനു പോലീസും ശ്രമിച്ചിരുന്നെങ്കിലും ഫലമുണ്ടായില്ല. ഇന്ന് ബിഎംഎസ് തൊഴിലാളികള്‍ ജോലിക്കെത്തിയതോടെയാണ് തര്‍ക്കവും കൂട്ടത്തല്ലുമുണ്ടായത്.
സ്പിരിറ്റു കടത്തുകേസില്‍ പ്രതി അത്തിമണി അനില്‍ പിടിയിലായി. ഹൈവേ കവര്‍ച്ചാ സംഘത്തില്‍നിന്ന് കൊള്ളമുതല്‍ കൈപ്പറ്റിയ കേസിലാണ് പാലക്കാട് കസബ പോലീസ് ഇയാളെ അറസ്റ്റു ചെയ്തത്.
അടുത്ത അഞ്ചു ദിവസം കേരളത്തിലും തമിഴ്നാട്ടിലും മഴയ്ക്കു സാധ്യത. വടക്കുകിഴക്കന്‍ കാറ്റ് തമിഴ്നാട് തീരംവഴി പ്രവേശിക്കുന്നതിനാലാണ് മഴയ്ക്കു സാധ്യതയുള്ളത്.
എംജി സര്‍വകലാശാലയില്‍ മാര്‍ക്ക് ലിസ്റ്റ് നല്‍കാന്‍ വിദ്യാര്‍ത്ഥിയില്‍നിന്ന് കൈക്കൂലി വാങ്ങി അറസ്റ്റിലായ സര്‍വ്വകലാശാല അസിസ്റ്റന്റ് സി.ജെ. എല്‍സി കോഴപ്പണത്തിനായി മറ്റു രണ്ടു വിദ്യാര്‍ത്ഥികളുടെ മാര്‍ക്ക് തിരുത്തിയെന്നു സൂചന. സര്‍വകലാശാല സിന്‍ഡിക്കറ്റ് ഉപസമിതിയുടെതാണ് കണ്ടെത്തല്‍. വിശദമായ അന്വേഷണത്തിന് ഉപസമിതി ശുപാര്‍ശ ചെയ്തിട്ടുണ്ട്.
തൃശൂര്‍ പെരിങ്ങോട്ടുകരയിലെ പോസ്റ്റ് ഓഫീസ് കത്തിച്ച പ്രതി പിടിയില്‍. പോസ്റ്റ് ഓഫീസിലെ ലോക്കറില്‍നിന്നു പണമെടുക്കാന്‍ സാധിക്കാത്തതിന്റെ വൈരാഗ്യത്തിലാണ് ഓഫീസിനു തീയിട്ടതെന്ന് പ്രതി പൊലീസിനോട് പറഞ്ഞു. വാടാനപ്പിള്ളി സ്വദേശി സുഹൈല്‍ ആണ് പിടിയിലായത്.
മകന്റെ കസ്റ്റഡി മരണത്തിന് ഉത്തരവാദികളായ വനപാലകരെ ശിക്ഷിക്കണമെന്നാവശ്യപ്പെട്ട് വൃദ്ധരായ മാതാപിതാക്കള്‍ അനിശ്ചിതകാല സമരം തുടങ്ങി. മറയൂര്‍ വനപാലകരുടെ കസ്റ്റഡിയിലിരിക്കെ മരിച്ച തൊടുപുഴ കാളിയാര്‍ വടക്കേക്കുന്നേല്‍ ബാബു തോമസിന്റെ മാതാപിതാക്കളാണ് തൊടുപുഴ സിവില്‍ സ്റ്റേഷനു മുന്നില്‍ സമരം നടത്തുന്നത്. തൊടുപുഴ കാളിയാര്‍ വടക്കേക്കുന്നേല്‍ തോമസിന്റെയും പെണ്ണമ്മയുടെയും മകന്‍ ബാബു തോമസ് 2006 നവംബര്‍ 23 നാണ് വനംവകുപ്പിന്റെ കസ്റ്റഡിയില്‍ ഇരിക്കെ മരിച്ചത്.
പത്തടിപ്പാലത്തിനു സമീപം കൊച്ചി മെട്രോ പാളത്തിന്റെ തൂണിനു ചരിവ്. ഈ ഭാഗത്ത് വേഗം കുറച്ചാണ് മെട്രോ സര്‍വീസ് നടത്തുന്നത്. മെട്രോ പാളവും തൂണും കെഎംആര്‍എല്‍ പരിശോധിച്ചു. ചരിവ് ഗുരുതരമല്ലെന്നാണ് പ്രാഥമിക വിലയിരുത്തല്‍.
ഭക്തിനിര്‍ഭരമായ അന്തരീക്ഷത്തില്‍ ഭക്തര്‍ ആറ്റുകാല്‍ പൊങ്കാല ആഘോഷിച്ചു. രാവിലെ ക്ഷേത്രമുറ്റത്തെ പണ്ടാര അടുപ്പിന് തീ കൊളുത്തി. വീടുകളില്‍ ഒരുക്കിയ പൊങ്കാല അടുപ്പുകള്‍ക്കും തീ കൊടുത്തു. കോവിഡ് നിയന്ത്രണങ്ങള്‍മൂലം ജനത്തിരക്ക് കുറവാണ്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
സ്വര്‍ണക്കടത്തു കേസിലെ പ്രതി സ്വപ്ന സുരേഷിന്റെ അഭിഭാഷകന്‍ പിന്‍മാറി. കൊച്ചി എന്‍ഐഎ കോടതിയില്‍ കേസ് പരിഗണിക്കുന്നതിനിടെ പിന്‍മാറുകയാണെന്ന് അഭിഭാഷകന്‍ സൂരജ് ടി ഇലഞ്ഞിക്കല്‍ അറിയിക്കുകയായിരുന്നു.
മയക്കുമരുന്നുമായി കണ്ണൂരിലെ മൊകേരിയില്‍ യുവതി പിടിയില്‍. മാരക മയക്കുമരുന്നായ എംഡിഎംഎയുമായ തൊട്ടില്‍പ്പാലത്ത് വാടകയ്ക്ക് താമസിക്കുന്ന പാലേരി സ്വദേശിനി കുന്നോത്ത് ശരണ്യയെയാണ് മൊകേരിയിലെ നിര്‍മല ടാക്കീസിനു സമീപത്തുനിന്ന് പിടികൂടിയത്.
കെഎസ്ഇബിയിലെ അഴിമതികളെക്കുറിച്ച് അന്വേഷിക്കണമെന്ന് പ്രതിപക്ഷ നേതാവ് വി.ഡി. സതീശന്‍. മുന്‍ വൈദ്യുതി വകുപ്പ് മന്ത്രി എം.എം മണി കെഎസ്ഇബിയുടെ ഭൂമി ബന്ധുക്കള്‍ക്കു കൈമാറിയെന്ന് സതീശന്‍ ആരോപിച്ചു. ഇത്തരത്തിലുള്ള അഴിമതിമൂലമാണ് വൈദ്യുത ബോര്‍ഡിലെ സാമ്പത്തിക പ്രതിസന്ധി. ഇങ്ങനെയുണ്ടായ നഷ്ടം നികത്താന്‍ വൈദ്യുതി ചാര്‍ജ് വര്‍ദ്ധിപ്പിച്ച് ജനങ്ങളെ ബുദ്ധിമുട്ടിലാക്കരുത്. സതീശന്‍ ആവശ്യപ്പെട്ടു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
അന്വേഷണ ഉദ്യോഗസ്ഥര്‍ക്കെതിരെ വധ ഗൂഢാലോചന നടത്തിയെന്ന കേസില്‍ ദിലീപ് അടക്കമുള്ള പ്രതികളെ വീണ്ടും ചോദ്യം ചെയ്യും. ദിലീപിന്റെ സഹോദരന്‍ അനൂപിനോട് തിങ്കളാഴ്ച ഹാജരാകാന്‍ നിര്‍ദ്ദേശം നല്‍കി. ഇന്നലെ ഹാജരാകണമെന്ന് അനൂപിനോട് ക്രൈംബ്രാഞ്ച് അന്വേഷണ സംഘം ആവശ്യപ്പെട്ടെങ്കിലും ഹാജരായില്ല. നോട്ടീസും കൈപ്പറ്റിയില്ല. ഇതോടെ ഇവരുടെ വീട്ടിലെത്തി ക്രൈംബ്രാഞ്ച് സംഘം നോട്ടീസ് പതിച്ചു.
ചെറുകഥാകൃത്തും പോര്‍ക്കുളം പഞ്ചായത്ത് മുന്‍ പ്രസിഡന്റുമായിരുന്ന അന്തരിച്ച സി.വി. ശ്രീരാമന്റെ ഭാര്യ യശോദ അന്തരിച്ചു. 88 വയസായിരുന്നു.
വര്‍ഷങ്ങളായി കാരവനില്‍ ലോകം ചുറ്റുന്ന ജര്‍മ്മന്‍ കുടുംബം കേരളത്തില്‍. തോബനും ഭാര്യയും രണ്ടു മക്കളുമാണ് കാരവനില്‍ ലോകം ചുറ്റിക്കറങ്ങുന്നത്. ഇതുവരെ 90 രാജ്യങ്ങള്‍ സന്ദര്‍ശിച്ചു. ഓഗസ്റ്റില്‍ ഇന്ത്യയിലെത്തിയ ഇവരെ ടൂറിസം മന്ത്രി മുഹമ്മദ് റിയാസാണ് സമൂഹമാധ്യമങ്ങളിലൂടെ പരിചയപ്പെടുത്തിയത്. കേരളാ ടൂറിസം പേജില്‍ വന്ന ഒരു മിനിറ്റ് വീഡിയോ റീലില്‍ ഈ കുടുംബം ഉണ്ടായിരുന്നു.
നരേന്ദ്ര മോദി സര്‍ക്കാരിനെതിരേ നിശിത വിമര്‍ശനവുമായി മുന്‍പ്രധാനമന്ത്രി ഡോ. മന്‍മഹോന്‍സിംഗ്. സ്വന്തം പിഴവുകള്‍ക്കു മോദി, ജവഹര്‍ലാല്‍ നെഹ്റുവിനെ പഴിക്കുകയാണെന്നും അദ്ദേഹം ആരോപിച്ചു. സര്‍ക്കാരിന്റെ നയങ്ങളില്‍ ഗുരുതരമായ പ്രശ്നങ്ങളുണ്ട്. ദരിദ്രര്‍ കൂടുതല്‍ ദരിദ്രരും സമ്പന്നര്‍ കൂടുതല്‍ സമ്പന്നരുമാകുന്ന നയമാണ് മോദി സര്‍ക്കാര്‍ നടപ്പാക്കുന്നത്. വിദേശനയവും പരാജയമാണ്. അതിര്‍ത്തിയില്‍ ചൈനയുടെ കൈയേറ്റം തുടരുകയാണെന്നും മന്‍മോഹന്‍സിംഗ് കുറ്റപ്പെടുത്തി.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ഉത്തര്‍പ്രദേശില്‍ വിവാഹ ആഘോഷങ്ങള്‍ക്കിടെ കിണറ്റില്‍ വീണ് സ്ത്രീകളും കുട്ടികളുമടക്കം 13 പേര്‍ മരിച്ചു. വീട്ടുമുറ്റത്തെ കിണര്‍ മൂടിയ സ്ലാബിനു മുകളില്‍ ഇരുന്നവര്‍ സ്ലാബ് തകര്‍ന്ന് കിണറിലേക്കു വീഴുകയായിരുന്നു. കിഴക്കന്‍ മേഖലയിലെ കുഷിനഗറിലെ നെബുവ നൗറംഗിയ എന്ന ഗ്രാമത്തിലാണ് ദാരുണസംഭവം.
മുസ്ലീം പള്ളികളില്‍ മൈക്കുകള്‍ ഉപയോഗിക്കുന്നതിനു നിയന്ത്രണം ഏര്‍പ്പെടുത്തിയതിനു പിറകേ, ക്ഷേത്രങ്ങളിലും ക്രിസ്ത്യന്‍ പള്ളികളിലും ഉച്ചത്തില്‍ മൈക്ക് ഉപയോഗിക്കുന്നതിനെതിരെ കര്‍ണാടക പൊലീസ്. ശബ്ദമലിനീകരണ നിയന്ത്രണ ചട്ടമനുസരിച്ച് ക്ഷേത്രങ്ങള്‍ക്കും പള്ളികള്‍ക്കും പൊലീസ് നോട്ടീസ് അയച്ചു.
യുക്രെയിന്‍ അതിര്‍ത്തിയില്‍നിന്ന് സൈന്യത്തെ പിന്‍വലിച്ചെന്ന റഷ്യയുടെ അവകാശവാദം ശരിയല്ലെന്ന് അമേരിക്ക. പിന്മാറുന്നതായി തോന്നിപ്പിക്കുന്ന ഏതാനും ദൃശ്യങ്ങള്‍ റഷ്യ പുറത്തുവിട്ടെങ്കിലും സൈന്യസന്നാഹം അതിര്‍ത്തിയില്‍തന്നെ തുടരുകയാണെന്ന് അമേരിക്ക വ്യക്തമാക്കി.
നഗരവികസനത്തിനായി ജിദ്ദയില്‍ ചേരികള്‍ ഒഴിപ്പിക്കുന്നതിന്റെ ഭാഗമായി പതിനായിരം പേരെ അറസ്റ്റ് ചെയ്തു. ചേരികളില്‍ നിന്ന് 60 ദശലക്ഷം റിയാലും 100 കിലോയിലധികം സ്വര്‍ണശേഖരവും പിടിച്ചെടുത്തു. ദിവസങ്ങള്‍ക്കിടെ 218 കിലോഗ്രാം കഞ്ചാവും ചേരിപ്രദേശങ്ങളില്‍നിന്ന് പിടിച്ചെടുത്തിരുന്നു.
ബലാല്‍സംഗക്കേസില്‍ മാഞ്ചെസ്റ്റര്‍ സിറ്റിയുടേയും എസി മിലാന്റേയും മുന്‍ ബ്രസീലിയന്‍ താരം റോബിഞ്ഞ്യോക്കെതിരേ ഇറ്റലിയില്‍ അറസ്റ്റു വാറണ്ട്. കുറ്റക്കാരനെന്ന് ഇറ്റാലിയന്‍ കോടതി വിധിച്ചതോടെയാണ് രാജ്യാന്തര അറസ്റ്റു വാറണ്ട് പുറപ്പെടുവിച്ചത്.
സ്റ്റേറ്റ് ബാങ്ക് ഓഫ് ഇന്ത്യ 2 വര്‍ഷത്തിന് മുകളിലുള്ള സ്ഥിര നിക്ഷേപങ്ങളുടെ പലിശ നിരക്ക് 10-15 ബേസിസ് പോയിന്റുകള്‍ വര്‍ധിപ്പിച്ചു. 2022 ഫെബ്രുവരി 15 മുതല്‍ പുതിയ നിരക്കുകള്‍ പ്രാബല്യത്തില്‍ വരും. എസ്ബിഐ വെബ്‌സൈറ്റിലാണ് പുതിയ വിവരങ്ങള്‍ പ്രസിദ്ധപ്പെടുത്തിയിരിക്കുന്നത്. 2 വര്‍ഷം മുതല്‍ 3 വര്‍ഷത്തില്‍ താഴെ വരെയുള്ള എഫ്ഡി കാലാവധിക്ക്, പലിശ നിരക്ക് 10 ബേസിസ് പോയിന്റ് വര്‍ധിപ്പിച്ച് 5.20 ശതമാനമായും 3 വര്‍ഷം മുതല്‍ 5 വര്‍ഷത്തില്‍ താഴെയുള്ളവയ്ക്ക് 15 ബേസിസ് പോയിന്റ് വര്‍ധിപ്പിച്ച് 5.45 ശതമാനവും ആക്കി. 5 വര്‍ഷം മുതല്‍ 10 വര്‍ഷം വരെയുള്ള എഫ്ഡി കാലാവധിക്ക്, പലിശ നിരക്ക് 10 ബേസിസ് പോയിന്റ് വര്‍ധിപ്പിച്ച് 5.50 ശതമാനമാക്കി. 2 കോടിയില്‍ താഴെ മൂല്യമുള്ള എല്ലാ എഫ്ഡികള്‍ക്കും പുതിയ നിരക്കുകള്‍ ബാധകമാണ്.
മുഷിഞ്ഞതും കീറിയതും സെല്ലോടേപ്പൊട്ടിച്ചതുമായ നോട്ടുകള്‍ ഇനി ബാങ്കുകളിലൂടെ മാറ്റിയെടുക്കാം. ഇവ നിരസിക്കുന്ന ബാങ്കുകള്‍ക്കെതിരെ റിസര്‍വ് ബാങ്കിന്റെ നടപടിയുണ്ടാകും. മുഷിപ്പ് കൂടിയാല്‍ നോട്ടിന്റെ മൂല്യം കുറയും. ഒരാളുടെ പക്കല്‍ 20ലധികം മുഷിഞ്ഞ നോട്ടുകള്‍ ഉണ്ടാവുകയും മൊത്തം മൂല്യം 5,000 രൂപയ്ക്കുമേല്‍ ആവുകയും ചെയ്താല്‍ ട്രാന്‍സാക്ഷന്‍ ഫീസ് ഈടാക്കും. റിസര്‍വ് ബാങ്കിലെത്തുന്ന മുഷിഞ്ഞ നോട്ടുകള്‍ നേരത്തേ കത്തിച്ചുകളയുകയായിരുന്നു പതിവ്. എന്നാല്‍, ഇപ്പോള്‍ അവ കഷണങ്ങളാക്കിയ ശേഷം പുനരുപയോഗിക്കുകയാണ് ചെയ്യുന്നത്. മുഷിഞ്ഞ നോട്ടുകള്‍ക്ക് പകരം റിസര്‍വ് ബാങ്ക് പുതിയ നോട്ടുകള്‍ അച്ചടിക്കുകയും ചെയ്യും.
മലയാളത്തിന്റെ എക്കാലത്തെയും ഹിറ്റ് ചിത്രങ്ങളില്‍ ഒന്നാണ് 'ദൃശ്യം. 'ദൃശ്യം 2' ചിത്രത്തിന്റെ രണ്ടാം ഭാഗം ഹിന്ദിയിലും ഷൂട്ടിംഗ് തുടങ്ങിയിരിക്കുകയാണ്. മുംബൈയില്‍ ആണ് ചിത്രത്തിന്റെ ഷൂട്ടിംഗ്. 'ദൃശ്യം' ആദ്യ ഭാഗം അജയ് ദേവ്ഗണ്‍ നായകനായി എത്തി വന്‍ വിജയം സ്വന്തമാക്കിയിരുന്നു. 'ദൃശ്യ'ത്തിന്റെ രണ്ടാം ഭാഗത്തിലും വിജയ് എന്ന നായകനായി അജയ് ദേവ്ഗണ്‍ തന്നെ നായകനായി എത്തുന്നു. അഭിഷേക് പതകാണ് ചിത്രം സംവിധാനം ചെയ്യുന്നത്. ശ്രിയ ശരണ്‍ തബു, ഇഷിത് ദത്ത തുടങ്ങിയവരാണ് ചിത്രത്തില്‍ പ്രധാന കഥാപാത്രങ്ങളായി എത്തുന്നത്.
അജിത്ത് നായകനാകുന്ന ചിത്രം 'വലിമൈ' ഫെബ്രുവരി 24ന് ചിത്രം തിയറ്ററുകളില്‍ എത്തുകയാണ്. 'വലിമൈ' ഒരു തകര്‍പ്പന്‍ ആക്ഷന്‍ ചിത്രമാകും എന്ന് അടിവരയിടുന്ന മറ്റൊരു പ്രൊമൊ വീഡിയോ കൂടി പുറത്തുവിട്ടിരിക്കുന്നു. 'വലിമൈ'യിലെ നായിക ഹുമ ഖുറേഷിക്കും ആക്ഷന്‍ രംഗങ്ങളുണ്ടെന്നാണ് പുതിയ പ്രൊമൊ വീഡിയോയില്‍ നിന്ന് വ്യക്തമാകുന്നത്. ബൈക്ക് ചേസ് അടക്കുള്ള ത്രില്ലിംഗ് രംഗങ്ങള്‍ ചിത്രത്തിലുണ്ടാകും. എച്ച് വിനോദാണ് ചിത്രം സംവിധാനം ചെയ്യുന്നത്.
ടാറ്റ മോട്ടോഴ്‌സ് തങ്ങളുടെ ഹാരിയര്‍ എസ്യുവി മോഡല്‍ ലൈനപ്പ് പെട്രോള്‍ വകഭേദങ്ങള്‍ക്കൊപ്പം വിപുലീകരിക്കും. നിലവില്‍ അന്തിമ പരീക്ഷണ ഘട്ടത്തിലുള്ള ഗ്യാസോലിന്‍ പതിപ്പ് പുതിയ 1.6 എല്‍ ടര്‍ബോചാര്‍ജ്ഡ് ഡിഐ മോട്ടോറുമായി വരും. ടാറ്റയുടെ പുതിയ പെട്രോള്‍ എഞ്ചിന്‍ എംപിഎഫ്ഐ യൂണിറ്റുകളേക്കാള്‍ ശക്തമാണെന്ന് പറയപ്പെടുന്നു. ഇതിന്റെ ശക്തിയും ടോര്‍ക്കും യഥാക്രമം 160ബിഎച്ചപി, 250എന്‍എം എന്നിവയായിരിക്കും. ടാറ്റ ഹാരിയര്‍ പെട്രോള്‍ ഓട്ടോമാറ്റിക് ഗിയര്‍ബോക്‌സ്, പാഡില്‍ ഷിഫ്റ്ററുകള്‍, ഒന്നിലധികം ഡ്രൈവ് മോഡുകള്‍ (സ്‌പോര്‍ട്ട് മോഡ് ഉള്‍പ്പെടെ) എന്നിവയുമായാണ് വരുന്നത്.
കൊവിഡ് 19 പോലുള്ള വൈറല്‍ അണുബാധയ്ക്ക് ശേഷവും കാലക്രമേണയുള്ള സാധാരണലക്ഷണങ്ങളായ ശ്വാസതടസ്സം, ചുമ, പേശിവേദനഅല്ലെങ്കില്‍ തലവേദന, വിഷാദം അല്ലെങ്കില്‍ ഉത്കണ്ഠ എന്നിവ നിലനില്‍ക്കുന്നു. എന്നിരുന്നാലും കൊവിഡിന് ശേഷമുള്ള ഏറ്റവും സാധാരണമായ അനന്തരഫലങ്ങളിലൊന്നാണ് കൊവിഡ് തളര്‍ച്ച, നിരന്തരമായ ക്ഷീണവും ഊര്‍ജ്ജത്തിന്റെയും ശ്രദ്ധയുടെയും അഭാവം എന്നിവയാണ്. ഇത് നമ്മുടെ ദൈനംദിന ജീവിതശൈലിയെ ബാധിക്കുന്നു. കൊവിഡ് -19 ന്റെ പ്രത്യാഘാതങ്ങളെ തരണം ചെയ്യുന്നതില്‍ പോഷകാഹാരത്തിന്റെ പങ്ക് വളരെ വലുതാണ്. കാരണം വൈറസ് ശരീരത്തില്‍ പിടിപെടുന്ന സമയത്ത് മൊത്തത്തിലുള്ള ആരോഗ്യം ദുര്‍ബലമാകാന്‍ തുടങ്ങുന്നു. വൈറസ് മാറി ഒരുപാട്നാള്‍ കഴിഞ്ഞാലും ശരീരം പിന്നെയും ദുര്‍ബലമാണ്. ഈ പ്രശ്നം പരിഹരിക്കാനുള്ള ഏറ്റവും നല്ല മാര്‍ഗം നിങ്ങളുടെ ശരീരത്തിന്റെ പോഷകാഹാര ആവശ്യകത തിരിച്ചറിയുകയും ഉചിതമായ, സമീകൃതാഹാരം അല്ലെങ്കില്‍ പോഷകസപ്ലിമെന്റുകള്‍ ഉപയോഗിച്ച് അത് പരിഹരിക്കുകയും ചെയ്യുക എന്നതാണ്. പ്രതിരോധശേഷി കുറവായതിനാല്‍ ദുര്‍ബലമായ ശരീരത്തില്‍ ഭാവിയില്‍ ധാരാളം അണുബാധകള്‍ക്കും രോഗങ്ങളും വരാനുള്ള സാധ്യത കൂടുതലാണ്. നിങ്ങളുടെ ശരീരത്തിന്റെ പ്രതിരോധകവചം പുനര്‍നിര്‍മ്മിക്കുന്നതിന് ശരിയായ പോഷകാഹാരം ഉപയോഗിച്ച് ശരീരത്തിനുള്ളില്‍ നിന്ന് ശക്തി പ്പെടുത്തുന്നത് അത്യന്താപേക്ഷിതമാണ്. ഉയര്‍ന്ന ജലാംശം നിലനിര്‍ത്തുക. ജലാംശം അല്ലെങ്കില്‍ ദ്രാവകത്തിന്റെ അഭാവം, വൈജ്ഞാനിക ജോലികളില്‍ ശ്രദ്ധകേന്ദ്രീകരിക്കുന്നതില്‍ ബുദ്ധിമുട്ട്, അലസത എന്നി അനുഭവപ്പെടാം. ചെറുതും ആയാസംകുറഞ്ഞതുമായ വ്യായാമങ്ങള്‍ ചെയ്ത്, നിങ്ങളുടെ ശാരീരികാവസ്ഥ മനസ്സിലാക്കി ശരീരത്തെ അറിഞ്ഞ് പ്രവര്‍ത്തിക്കുക.
ഇന്നത്തെ വിനിമയ നിരക്ക്
ഡോളര്‍ - 75.03, പൗണ്ട് - 101.97, യൂറോ - 85.37, സ്വിസ് ഫ്രാങ്ക് - 81.35, ഓസ്‌ട്രേലിയന്‍ ഡോളര്‍ - 54.10, ബഹറിന്‍ ദിനാര്‍ - 199.02, കുവൈത്ത് ദിനാര്‍ -248.05, ഒമാനി റിയാല്‍ - 195.17, സൗദി റിയാല്‍ - 20.00, യു.എ.ഇ ദിര്‍ഹം - 20.43, ഖത്തര്‍ റിയാല്‍ - 20.61, കനേഡിയന്‍ ഡോളര്‍ - 59.09.
കൂടുതൽ വാർത്തകൾക്കായി വാട്‌സാപ്പ് ഗ്രൂപ്പിൽ അംഗമാവുക. ഗ്രൂപ്പ്
സന്ദർശിക്കുക. www.honesty.news
