പ്രഭാത വാർത്തകൾ ഒറ്റനോട്ടത്തിൽ
2022 | മാർച്ച് 21 | തിങ്കൾ | 1197 | മീനം 7 | ചോതി
ഫറ്റോര്‍ഡയിലെ മഞ്ഞക്കടലിനെ സാക്ഷിയാക്കി ഇന്ത്യന്‍ സൂപ്പര്‍ലീഗിന്റെ കലാശപ്പോരിലെ പെനാല്‍റ്റി ഷൂട്ടൗട്ടില്‍ ഹൈദരാബാദിനോട് പൊരുതിക്കീഴടങ്ങി കേരള ബ്ലാസ്റ്റേഴ്‌സ്. 120 മിനുറ്റുകളും വിയര്‍ത്ത് കളിച്ച ശേഷം ഷൂട്ടൗട്ടില്‍ 3-1നാണ് ബ്ലാസ്റ്റേഴ്‌സ് തോല്‍വി സമ്മതിച്ചത്. വിസ്മയ സീസണിനൊടുവില്‍ കിരീടത്തോളം പോന്ന റണ്ണറപ്പുമായാണ് മഞ്ഞപ്പടയുടെ മടക്കം. ബ്ലാസ്റ്റേഴ്‌സ് താരങ്ങളുടെ മൂന്ന് കിക്കുകള്‍ രക്ഷപ്പെടുത്തിയ ലക്ഷ്മികാന്ത് കട്ടിമണിയാണ് ഹൈദരാബാദിന്റെ വിജയശില്‍പി. നേരത്തെ നിശ്ചിത സമയത്തും അധിക സമയത്തും ഇരു ടീമും ഓരോ ഗോള്‍ വീതം നേടി സമനില പാലിച്ചതോടെയാണ് മത്സരം ഷൂട്ടൗട്ടിലേക്ക് നീണ്ടത്. 68-ാം മിനിറ്റില്‍ മലയാളി താരം രാഹുല്‍ കെ.പി നേടിയ ഗോളിലാണ് ബ്ലാസ്റ്റേഴ്‌സ് ലീഡെടുത്തത്. എന്നാല്‍ 88-ാം മിനിറ്റില്‍ സഹില്‍ ടവോരയിലൂടെ ഹൈദരാബാദ് ഒപ്പമെത്തുകയായിരുന്നു.
യുക്രെയിനില്‍ ജനവാസ കേന്ദ്രങ്ങളില്‍ റഷ്യന്‍ ആക്രമണം. നാന്നൂറു പേര്‍ അഭയം തേടിയ സ്‌കൂളിനുനേരെ റോക്കറ്റാക്രമണം നടത്തി. സ്‌കൂള്‍ തകര്‍ന്നു. നിരവധി പേര്‍ കൊല്ലപ്പെട്ടു. പരിക്കുകളോടെ രക്ഷപ്പെട്ട അനേകം പേര്‍ കെട്ടിടാവശിഷ്ടങ്ങളില്‍ക്കിടയില്‍ കുടുങ്ങിക്കിടന്നു. മരിയുപോളില്‍ 1,200 പേര്‍ അഭയം തേടിയിരുന്ന ഡ്രാമാ സ്‌കൂള്‍ കഴിഞ്ഞ ദിവസം റഷ്യ റോക്കറ്റാക്രമണത്തില്‍ തകര്‍ത്തിരുന്നു. മരിയുപോളിലെ അയ്യായിരത്തോളം ജനങ്ങളെ സൈന്യം കസ്റ്റഡിയിലെടുത്ത് റഷ്യയിലേക്കു കൊണ്ടുപോയി. ഒരു കോടി ജനങ്ങള്‍ യുക്രെയിനില്‍നിന്നു പലായനം ചെയ്തതായി ഐക്യരാഷ്ട്രസഭ വെളിപ്പെടുത്തി. ഇതേസമയം, റഷ്യയുടെ 14,700 സൈനികര്‍ കൊല്ലപ്പെട്ടെന്ന് യുക്രെയിന്‍ അവകാശപ്പെട്ടു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
മുഖ്യമന്ത്രി പിണറായി വിജയന് മനുഷ്യരുടെ കരച്ചില്‍ കേള്‍ക്കാന്‍ കഴിയുന്നില്ലെന്ന് കെപിസിസി അധ്യക്ഷന്‍ കെ സുധാകരന്‍. കെ റെയിലിലൂടെ സിപിഎം അനുകൂലികളെപോലും ദ്രോഹിക്കുന്നു. ജനങ്ങളെ വഴിയാധാരമാക്കാന്‍ അനുവദിക്കില്ല. ജനരോഷം മൂലം പദ്ധതി ഉപേക്ഷിക്കേണ്ടി വരും. നാളെ സമര മുഖത്തേക്ക് കോണ്‍ഗ്രസ് കടക്കുമെന്നും അദ്ദേഹം കൂട്ടിച്ചേര്‍ത്തു.
പൊലീസ് ജീപ്പില്‍നിന്ന് ചാടിയ യുവാവ് മരിച്ചു. കസ്റ്റഡിയില്‍ മര്‍ദനമേറ്റതിനാലാണു ചാടിയതെന്ന് ആരോപിച്ച് ഭാര്യയും ബന്ധുക്കളും രംഗത്ത്. പാപ്പനംകോട് സ്വദേശി സനോഫറാണ് മരിച്ചത്. മദ്യപിച്ച് വീട്ടുകാരെ ഉപദ്രവിച്ചതിന് വീട്ടുകാരുടെ പരാതിയുടെ അടിസ്ഥാനത്തില്‍ സനോഫറിനെ പോലീസ് വിളിപ്പിച്ച് താക്കീതു നല്‍കി വിട്ടയച്ചിരുന്നു. ഒരു ദിവസം കസ്റ്റഡിയില്‍ വയ്ക്കണമെന്ന വീട്ടുകാരുടെ അഭ്യര്‍ഥനയനുസരിച്ച് ജീപ്പില്‍ കൊണ്ടുപോകുമ്പോഴാണ് ചാടിയതെന്നാണു പോലീസ് പറയുന്നത്. എന്നാല്‍ പൊലീസ് മര്‍ദ്ദിച്ചെന്നു ഭാര്യ തസ്ലിമ ആരോപിച്ചു.
സിപിഎം പാര്‍ട്ടി കോണ്‍ഗ്രസിനോടനുബന്ധിച്ചുള്ള സെമിനാറില്‍ പ്രസംഗിക്കണോയെന്ന് കോണ്‍ഗ്രസ് ഹൈക്കമാന്‍ഡ് തീരുമാനിക്കുമെന്ന് പ്രഫ. കെ.വി. തോമസ്. ശശി തരൂര്‍ എംപിയേയും കെ.വി. തോമസിനേയും സിപിഎം പ്രഭാഷകരായി ക്ഷണിച്ചിരുന്നു. പോകരുതെന്ന് കെപിസിസി പ്രസിഡന്റ് കെ. സുധാകരന്‍ വിലക്കിയിരിക്കേ, ഹൈക്കമാന്‍ഡ് തീരുമാനിക്കുമെന്ന് ശശി തരൂര്‍ എംപി നേരത്തെ സ്വീകരിച്ച നിലപാടാണ് പ്രഫ.കെ.വി. തോമസും ഇപ്പോള്‍ കൊക്കൊണ്ടത്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
എല്ലാ കാരുണ്യ ഫാര്‍മസികളിലും പരിശോധന നടത്തി 10 ദിവസത്തിനകം അവശ്യ മരുന്നുകളുടെ ലഭ്യത ഉറപ്പാക്കണമെന്ന് ആരോഗ്യ വകുപ്പ് മന്ത്രി വീണാ ജോര്‍ജ് കെ.എം.എസ്.സി.എല്‍ മാനേജിംഗ് ഡയറക്ടര്‍ക്ക് നിര്‍ദേശം നല്‍കി.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ദിലീപിന്റെ ഫോണിലെ വിവരങ്ങള്‍ മായ്ച്ചെന്നു പോലീസ് ആരോപിക്കുന്ന സൈബര്‍ വിദഗ്ധന്‍ സായ് ശങ്കറിനെതിരേ തട്ടിപ്പു കേസ്. ഇലക്ട്രോണിക്സ് ഉപകരണങ്ങള്‍ വാങ്ങിത്തരാമെന്നു വിശ്വസിപ്പിച്ച് 45 ലക്ഷം രൂപ തട്ടിയെടുത്തെന്നാണു കേസ്. കോഴിക്കോട് സ്വദേശി മിന്‍ഹാജ് നല്‍കിയ പരാതിയില്‍ കോഴിക്കോട് നടക്കാവ് പോലീസാണ് കേസെടുത്തത്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
വണ്ടിപ്പെരിയാറിലെ സര്‍ക്കാര്‍ ആശുപത്രിയില്‍ അര്‍ധരാത്രി മദ്യപസംഘത്തിന്റെ അതിക്രമം. ആശുപത്രി ഉപകരണങ്ങള്‍ നശിപ്പിക്കുകയും ജീവനക്കാരെ മര്‍ദ്ദിക്കുകയും ചെയ്തു. മൂന്നു പേരെ വണ്ടിപ്പെരിയാര്‍ പൊലീസ് അറസ്റ്റ് ചെയ്തു. തലയ്ക്കു പരിക്കേറ്റ ഒരാളെയുമായി അഞ്ചു പേര്‍ പന്ത്രണ്ടരയോടെയാണ് ആശുപത്രിയിലെത്തിയത്. ഡോക്ടര്‍ ഇല്ലെന്ന് ജീവനക്കാര്‍ അറിയിച്ചതോടെയാണ് വാക്കു തര്‍ക്കവും അക്രമവും തുടങ്ങിയത്.
ഐഎസ്എലില്‍ പരാജയപ്പെട്ടെങ്കിലും മികച്ച പ്രകടനം കാഴ്ചവച്ച കേരള ബ്ലാസ്റ്റേഴ്സിനു മുഖ്യമന്ത്രി പിണറായി വിജയന്റെ അഭിനന്ദനം. കേരളത്തിന്റെ അഭിമാനമായി മാറാന്‍ ബ്ലാസ്റ്റേഴ്സിനു സാധിച്ചെന്നും അടുത്ത തവണ കിരീടം നേടാന്‍ സാധിക്കട്ടെയെന്നും മുഖ്യമന്ത്രി പറഞ്ഞു.
ലക്ഷദ്വീപില്‍ നിരോധനാജ്ഞ. ഇന്ന് പ്രതിഷേധദിനമായി ആചരിക്കുമെന്ന് എന്‍സിപി പ്രഖ്യാപിച്ചതിനു പിറകേയാണ് നിരോധനാജ്ഞ പ്രഖ്യാപിച്ചത്.
എന്‍ ബിരേന്‍ സിംഗ് മണിപ്പൂര്‍ മുഖ്യമന്ത്രിയായി തുടരും. ബിജെപി നിയമസഭാ കക്ഷി യോഗമാണ് ബിരേന്‍ സിംഗിനെ തെരഞ്ഞെടുത്തത്. കേന്ദ്ര നിരീക്ഷകരില്‍ ഒരാളായ കേന്ദ്ര മന്ത്രി നിര്‍മല സീതാരാമന്‍ ആണ് തീരുമാനം പ്രഖ്യാപിച്ചത്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ബിഹാറിലെ നാലു ജില്ലകളില്‍ വിഷമദ്യദുരന്തം. 17 പേര്‍ മരിച്ചു. മധേപുര, ഭഗല്‍പൂര്‍, ബങ്ക, മുര്‍ളിഗഞ്ച് എന്നീ ജില്ലകളിലാണ് മദ്യദുരന്തമുണ്ടായത്.
ഇസ്രയേല്‍ പ്രധാനമന്ത്രി നഫ്താലി ബെന്നറ്റ് അടുത്ത മാസം ഇന്ത്യ സന്ദര്‍ശിക്കും. ഏപ്രില്‍ രണ്ടിന് എത്തുന്ന അദ്ദേഹം നാലു ദിവസം ഇന്ത്യയില്‍ തുടരും. പ്രധാനമന്ത്രി നരേന്ദ്രമോദിയുടെ ക്ഷണമനുസരിച്ചാണ് സന്ദര്‍ശനം.
ഫേസ്ബുക്ക് പ്രൊട്ടക്ട് ആക്ടീവ് ആക്കാത്തവരുടെ അക്കൗണ്ട് ഫേസ്ബുക്ക് മരവിപ്പിച്ചേക്കാം. മനുഷ്യാവകാശ സംരക്ഷകര്‍, പത്രപ്രവര്‍ത്തകര്‍, സര്‍ക്കാര്‍ ഉദ്യോഗസ്ഥര്‍ എന്നിവരുള്‍പ്പെടെ ഹാക്കര്‍മാര്‍ വളരെയധികം ലക്ഷ്യമിടുന്ന ആളുകള്‍ക്ക് സുരക്ഷയുടെ ഒരു അധിക ലെയര്‍ എന്ന നിലയ്ക്കാണ് ഫേസ്ബുക്ക് പ്രൊട്ടക്ട് അവതരിപ്പിച്ചത്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ക്രിപ്റ്റോകറന്‍സികളില്‍ നിക്ഷേപം നടത്തിയവരോട് നഷ്ടം സഹിക്കാന്‍ തയ്യാറായിക്കോളൂവെന്ന് യൂറോപ്യന്‍ യൂണിയന്റെ മുന്നറിയപ്പ്. ക്രിപ്റ്റോ നിക്ഷേപം പൂര്‍ണമായി നഷ്പ്പെടാം എന്നാണ് യൂറോപ്യന്‍ യൂണിയന്‍ ഓഹരി, ബാങ്ക്, ഇന്‍ഷ്വറന്‍സ് നിരീക്ഷണ ഏജന്‍സികള്‍ സംയുക്ത പ്രസ്താവനയില്‍ പറയുന്നത്. ക്രിപ്റ്റോകറന്‍സി ഉപഭോക്താക്കള്‍ക്ക് എന്തെങ്കിലും തരത്തിലുള്ള സംരക്ഷണമോ, നഷ്ടപരിഹാരമോ യൂറോപ്യന്‍ യൂണിയന്റെ നിലവിലുള്ള ധനകാര്യ നിയമങ്ങള്‍ പ്രകാരം ലഭിക്കില്ലെന്നും ഇവര്‍ ഉപഭോക്താക്കള്‍ക്ക് മുന്നറിയിപ്പ് നല്‍കി.
സിജു വില്‍സന്റെ ഇന്നോളം കാണാത്ത ഗെറ്റപ്പിലുള്ള വരയന്റെ ഒഫീഷ്യല്‍ സെക്കന്‍ഡ് ലുക്ക് അണിയറ പ്രവര്‍ത്തകര്‍ പുറത്തുവിട്ടു. വ്യത്യസ്ത ഭാവത്തില്‍ പള്ളീലച്ചന്‍ വേഷത്തില്‍ സൈക്കിളിലിരുന്ന് അഭിവാദ്യം ചെയ്യുന്ന പോസ്റ്റര്‍ സോഷ്യല്‍ മീഡിയയില്‍ തരംഗമാവുകയാണ്. ഫാദര്‍ ഡാനി കപ്പൂച്ചിന്‍ തിരക്കഥ എഴുതി, നവാഗതനായ ജിജോ ജോസഫ് സംവിധാനം ചെയ്യുന്ന ഈ കുടുംബചിത്രം ഹാസ്യത്തിനും ആക്ഷന്‍ രംഗങ്ങള്‍ക്കും പ്രാധാന്യം നല്‍കുന്നു. സിജു വില്‍സനോടൊപ്പം ബെല്‍ജിയന്‍ മലിനോയ്‌സ് ഇനത്തില്‍പ്പെട്ട നാസ് എന്ന നായ, ടൈഗര്‍ എന്ന മുഴുനീള കഥാപാത്രമായി ചിത്രത്തില്‍ പ്രത്യക്ഷപ്പെടുന്നുണ്ട്.
|
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
|
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
