കാമാക്ഷി പഞ്ചായത്തിലെ കൊച്ചു കാമാക്ഷിയിൽ ഇന്നലെ രാത്രിയും കാട്ട് പോത്തിന്റെ സാന്നിധ്യം; വനം വകുപ്പ് ഇന്നലെ മേഖലയിൽ ഡ്രോൺ നിരീക്ഷണം നടത്തി എങ്കിലും കാട്ടുപോത്തിനെ കണ്ടെത്താൻ കഴിഞ്ഞിരുന്നില്ല.

ഒരു മാസം മുൻപ് നെടുങ്കണ്ടം പത്ത് വളവ് മേഖലയിലാണ് കാട്ടുപോത്തിന്റെ സാന്നിധ്യം ആദ്യം തിരിച്ചറിയുന്നത്. റോഡിലൂടെ നടന്ന് പോകുന്ന കാട്ടുപോത്തിന്റെ ദൃശ്യങ്ങൾ പുറത്ത് വന്നിരുന്നു. പിന്നീട് കട്ടപ്പന പുളിയൻമല റോഡിലും റോഡ് മുറിച്ച് കടന്ന് പോകുന്ന കാട്ടുപോത്തിന്റെ ദൃശ്യങ്ങൾ വാഹന യാത്രികർ പകർത്തിയിരുന്നു. 

Also Read:  ഇടുക്കി ചിന്നക്കനാലില്‍ വീണ്ടും കാട്ടാന ആക്രമണം; വീടിന്‍റെ കതകും ഷെഡും തകര്‍ത്തു.

ഇതിന് പിന്നാലെ ഇന്നലെ കാമാക്ഷി പഞ്ചായത്തിലെ പുഷ്പഗിരി കൊച്ചു കാമാക്ഷി മേഖലയിൽ കാട്ടുപോത്തിന്റെ സാനിധ്യം ഉണ്ടായിരിക്കുകയാണ്. വനം വകുപ്പ് ഇവിടെ എത്തി ഡ്രോൺ നിരീക്ഷണം നടത്തി എങ്കിലും കാട്ടുപോത്തിനെ കണ്ടെത്താൻ കഴിഞ്ഞിരുന്നില്ല. എന്നാൽ ഈ പ്രദേശത്ത് തന്നെ റോഡ് മുറിച്ച് കടന്ന് പോകുന്ന കാട്ടുപോത്തിന്റെ ദൃശ്യങ്ങൾ ഇന്നലെ രാത്രിയിൽ  ഇരുചക്ര വാഹന യാത്രികർ മൊബൈൽ ക്യാമറയിൽ പകർത്തിയത് പുറത്ത് വന്നിട്ടുണ്ട്.

 കാട്ടുപോത്തിന്റെ സാന്നിധ്യം മലയോര മേഖലയിൽ റിപ്പോർട്ട് ചെയ്ത് ഒരു മാസം പിന്നിടുമ്പോഴും ജനവാസ കേന്ദ്രങ്ങളിൽ നിന്ന് കാട്ട് പോത്തിനെ വനമേഖലയിലേക്ക് തുരത്തുന്നതിനുള്ള ഒരു നടപടിയും വനം വകുപ്പിന്റെ ഭാഗത്ത് നിന്നും ഉണ്ടായിട്ടില്ലായെന്ന് ആക്ഷേപം ഉയരുന്നുണ്ട്. 

കൂടുതൽ വാർത്തകൾക്കായി വാട്‌സാപ്പ് ഗ്രൂപ്പിൽ അംഗമാവുക.ക്ലിക്ക്