ഇടുക്കി കഞ്ഞിക്കുഴിയിൽ ഹോട്ടലിൽ കുഴഞ്ഞുവീണ വയോധികനെ ആശുപത്രിയിലേക്ക് കൊണ്ടുപോകും വഴി മരണപ്പെട്ടു. കഞ്ഞിക്കുഴി നാലുകമ്പി സ്വദേശി അരീക്കൽ പീറ്ററാണ് (80) മരണപ്പെട്ടത്. ഉച്ചയ്ക്ക് 12 മണിയോടെ ആയിരുന്നു സംഭവം.
കഞ്ഞിക്കുഴിയിലുള്ള ഹോട്ടലിൽ ഭക്ഷണം കഴിക്കാൻ കയറുന്നതിനിടെ പീറ്റർ കുഴഞ്ഞു വീഴുകയായിരുന്നു. ഉടൻ തന്നെ ഹോട്ടൽ ജീവനക്കാർ സമീപത്തെ ആശുപത്രിയിൽ എത്തിച്ചെങ്കിലും വിദഗ്ദ്ചികിത്സക്കായി മറ്റൊരാശുപത്രിയിലേയ്ക്ക് മാറ്റാൻ നിർദേശിച്ചു. തുടർന്ന് ജീവനക്കാർ കഞ്ഞിക്കുഴിയിൽ ഉണ്ടായിരുന്ന ആംബുലൻസ് വിളിച്ചു.
എന്നാൽ ബന്ധുക്കൾ കൂടെയില്ലാത്തതിനാൽ കൊണ്ടുപോകാൻ ഡ്രൈവർ വിസമ്മതിച്ചതായാണ് ഇവർ വ്യക്തമാക്കുന്നത്. തുടർന്ന് ജീവനക്കാർ ഓട്ടോറിക്ഷയിൽ ഇടുക്കി മെഡിക്കൽ കോളജിലേക്ക് പീറ്ററിനെ കൊണ്ടുപോവുകയായിരുന്നു. എന്നാൽ ചേലച്ചുവടിന് സമീപം എത്തിയപ്പോൾ മരണം സംഭവിക്കുകയായിരുന്നു.
.jpeg)
