ഗാഡ്ഗിൽ റിപ്പോർട്ട് നടപ്പിലാക്കണമെങ്കിൽ കോൺഗ്രസിനെ അധികാരത്തിലെത്തിക്കണമെന്ന ആവശ്യം ഉയർത്തി പശ്ചിമഘട്ട സംരക്ഷണ സമിതി ചെയർമാൻ ജോൺ പെരുവന്താനം. പരിസ്ഥിതി സംരക്ഷണത്തിൽ യഥാർത്ഥ പ്രതിബദ്ധത കോൺഗ്രസിനാണെന്നും, പശ്ചിമഘട്ടത്തെ രക്ഷിക്കണമെങ്കിൽ കോൺഗ്രസ് ഭരണമാണ് അനിവാര്യമെന്നും അദ്ദേഹം വ്യക്തമാക്കി.
വയനാട്–കമ്പം തുരങ്കപാത പോലുള്ള പദ്ധതികൾ പരിസ്ഥിതിക്ക് വലിയ ഭീഷണിയാണെന്നും, ഇത്തരം വികസന പദ്ധതികൾ നിയന്ത്രിക്കാൻ പരിസ്ഥിതി ബോധമുള്ള ഭരണകൂടം വേണമെന്നും അദ്ദേഹം ചൂണ്ടിക്കാട്ടി. ഗാഡ്ഗിൽ റിപ്പോർട്ട് നടപ്പിലാക്കാൻ ശ്രമിച്ചത് കോൺഗ്രസ് നേതൃത്വത്തിലാണെന്നും, ജയറാം രമേശിന്റെ ഇടപെടൽ ഇതിൽ നിർണായകമായിരുന്നുവെന്നും അദ്ദേഹം പറഞ്ഞു.
മുൻ പ്രധാനമന്ത്രിമാരായ ഇന്ദിരാഗാന്ധിയും രാജീവ് ഗാന്ധിയും കേരളത്തിലെ വനസംരക്ഷണത്തിന് ശക്തമായ അടിത്തറ ഒരുക്കിയതും കോൺഗ്രസിന്റെ പരിസ്ഥിതി പ്രതിബദ്ധതയുടെ തെളിവാണെന്നും ജോൺ പെരുവന്താനം അഭിപ്രായപ്പെട്ടു. പരിസ്ഥിതി സംരക്ഷണത്തിൽ യാതൊരു ഇളവും കാണിക്കാത്ത സമീപനം കോൺഗ്രസിനാണെന്നും, അതുകൊണ്ടുതന്നെ പരിസ്ഥിതി സ്നേഹികൾ കോൺഗ്രസിന് പിന്തുണ നൽകണമെന്നും അദ്ദേഹം ആവശ്യപ്പെട്ടു. പശ്ചിമഘട്ടം സംരക്ഷിക്കാതെ ഭാവി തലമുറയ്ക്ക് നിലനിൽപ്പ് ഇല്ലെന്നും, കട്ടപ്പന–കമ്പം തുരങ്കപാത പോലുള്ള പദ്ധതികൾ പുനഃപരിശോധിക്കണമെന്നും അദ്ദേഹം ശക്തമായി മുന്നറിയിപ്പ് നൽകി.
കൂടുതൽ വാർത്തകൾക്കായി വാട്സാപ്പ് ഗ്രൂപ്പിൽ അംഗമാവുക...👉👉👉...ക്ലിക്ക്.
