ജില്ലയിലെ ഈ വർഷത്തെ സ്വാതന്ത്ര്യദിനാഘോഷ പരിപാടികൾക്ക് ഇടുക്കി പൈനാവ് ഐഡിഎ ഗ്രൗണ്ട് വേദിയാകും. രാവിലെ 9 മണിക്ക് നടക്കുന്ന ഔദ്യോഗിക ചടങ്ങിൽ ജില്ലയുടെ ചുമതലയുള്ള ഭക്ഷ്യ-സിവിൽ സപ്ലൈസ് വകുപ്പ് മന്ത്രി അനൂപ് ജേക്കബ് ദേശീയ പതാക ഉയർത്തും. ഇതിനായുള്ള എല്ലാ ഒരുക്കങ്ങളും പൂർത്തിയായതായി ജില്ലാ ഭരണകൂടം അറിയിച്ചു.
രാവിലെ 8.40-ന് തന്നെ പരേഡ് ഗ്രൗണ്ടിൽ അണിനിരക്കും. ഇടുക്കി ഹെഡ്ക്വാർട്ടേഴ്സ് റിസർവ് ഇൻസ്പെക്ടർ ജമാൽ പി.എച്ച് ആണ് ഈ വർഷത്തെ പരേഡ് കമാൻഡറായി ചുമതലയേൽക്കുന്നത്. 9 മണിക്ക് പതാക ഉയർത്തുന്നതിനെ തുടർന്ന് മന്ത്രി പരേഡ് പരിശോധിക്കുകയും സ്വാതന്ത്ര്യദിന സന്ദേശം നൽകുകയും ചെയ്യും. മികച്ച പരേഡ് കമാൻഡർമാർക്കുള്ള ട്രോഫികളുടെ വിതരണവും മന്ത്രി നിർവഹിക്കും. വിപുലമായ പരേഡാണ് ഇത്തവണ ക്രമീകരിച്ചിരിക്കുന്നത്. പോലീസ്, എക്സൈസ്, വനംവകുപ്പ് ഉദ്യോഗസ്ഥർക്കൊപ്പം എൻസിസി സീനിയർ-ജൂനിയർ ഡിവിഷനുകൾ, സ്റ്റുഡന്റ് പോലീസ് കേഡറ്റുകൾ, സ്കൗട്ട്സ്, ഗൈഡ്സ്, വിവിധ ബാൻഡ് സംഘങ്ങൾ എന്നിവരും പരേഡിൽ അണിനിരക്കും.
വിദ്യാർത്ഥികളുടെ മികച്ച പങ്കാളിത്തവും ഇത്തവണത്തെ ആഘോഷങ്ങളുടെ പ്രത്യേകതയാണ്. വാഴത്തോപ്പ് സെന്റ് ജോർജ് എച്ച്എസ്എസ്, പാവനാത്മ കോളേജ് മുരിക്കാശേരി, സയൺ പബ്ലിക് സ്കൂൾ, ജവഹർ നവോദയ, പൈനാവ് എംആർഎസ്, നങ്കി സിറ്റി എസ്എൻഎച്ച്എസ്എസ്, കൂമ്പൻപാറ ഫാത്തിമ മാത കോളേജ്, പൈനാവ് കേന്ദ്രീയ വിദ്യാലയ എന്നീ വിദ്യാഭ്യാസ സ്ഥാപനങ്ങളിൽ നിന്നുള്ള വിദ്യാർത്ഥികൾ വിവിധ വിഭാഗങ്ങളിലായി പരേഡിന്റെ ഭാഗമാകും. കുളമാവ് ജവഹർ നവോദയ വിദ്യാലയം, വാഴത്തോപ്പ് സെന്റ് ജോർജ് ഹൈസ്കൂൾ എന്നിവിടങ്ങളിലെ വിദ്യാർത്ഥികൾ ചടങ്ങിൽ ദേശഭക്തിഗാനം ആലപിക്കും. ജനപ്രതിനിധികൾ, വിവിധ വകുപ്പ് ഉദ്യോഗസ്ഥർ, രാഷ്ട്രീയ-സാമൂഹിക രംഗത്തെ പ്രമുഖർ തുടങ്ങിയവർ ചടങ്ങിൽ സംബന്ധിക്കും.
കൂടുതൽ വാർത്തകൾക്കായി വാട്സാപ്പ് ഗ്രൂപ്പിൽ അംഗമാവുക...👉👉👉...ക്ലിക്ക്.
