കോളേജ് ഹോസ്റ്റലിലെ നിയമം മാറ്റണമെന്നാവശ്യപ്പെട്ട് പെൺകുട്ടികളുടെ അനിശ്ചിതകാല സമരം;വൈകിട്ട് 6.30 ന് പെൺകുട്ടികൾ ഹോസ്റ്റലില്‍ കയറണമെന്ന് അധികൃതർ എന്നാൽ ഒമ്പതരയാക്കണമെന്ന് വിദ്യാർത്ഥികൾ.

 പെൺകുട്ടികളുടെ ഹോസ്റ്റലിലെ അനാവശ്യ നിയന്ത്രണങ്ങൾ പിൻവലിക്കണമെന്നാവശ്യപ്പെട്ട് ആലുവ യുസി കോളേജിലാണ് അനിശ്ചിത കാലം സമരം തുടങ്ങിയത്.  

വൈകിട്ട് 6.30 ന് പെൺകുട്ടികൾ ഹോസ്റ്റലിൽ തിരികെ കയറിയിരിക്കണമെന്നാണ് ആലുവ യുസി കോളേജ് ഹോസ്റ്റലിലെ നിയമം. എന്നാൽ അവധി ദിവസങ്ങളിൽ ഉൾപ്പെടെ ഹോസ്റ്റലിൽ തിരികെ കയറുന്ന സമയം ഒമ്പതരയാക്കണമെന്നാണ് വിദ്യാർത്ഥികളുടെ ആവശ്യം. കഴിഞ്ഞ ഡിസംബർ  22 ന് ഇതേ ആവശ്യവുമായി വിദ്യാർത്ഥികൾ അഞ്ച് മണിക്കൂർ കോളേജ് കവാടം  ഉപരോധിച്ചിരുന്നു. തുടർന്ന് ജനുവരി മൂന്നിന് കോളേജ് മാനേജ്മെന്റ് പ്രതിനിധികളുമായി ചർച്ച നടന്നു. എന്നാൽ  പരിഗണിക്കാമെന്ന്  കിട്ടിയ ഉറപ്പ് പാഴായതോടെയാണ് വീണ്ടും സമരത്തിനിറങ്ങിയത്. 

ഹോസ്റ്റലിൽ  കയറേണ്ട  സമയം രാത്രി ഒമ്പതര വരെയാക്കാൻ 2019 ൽ ഹൈക്കോടതി ഉത്തരവ് വന്നിരുന്നു.എന്നാൽ അന്തിമ തീരുമാനം എടുക്കേണ്ടത് പ്രിന്‍സിപ്പളാണെന്നും ഉത്തരവിലുണ്ട്. തുടര്‍ന്ന് നിരവധി തവണ സമയം വര്‍ധിപ്പിക്കണം എന്നാവശ്യപ്പെട്ട് നിവേദനങ്ങള്‍ നല്‍കിയെങ്കിലും നടപടി ഉണ്ടാകാത്ത സാഹചര്യത്തിലാണ് സമരം