പ്രഭാത വാർത്തകൾ ഒറ്റനോട്ടത്തിൽ
ശ്രീലങ്കയില്‍നിന്ന് അഭയാര്‍ത്ഥി പ്രവാഹം. കേരള തീരം അടക്കമുള്ളിടങ്ങളിലേക്ക് അഭയാര്‍ഥികള്‍ എത്തുമെന്നാണു വിവരം. കഴിഞ്ഞ ദിവസം ഏതാനും അഭയാര്‍ഥികളെ പിടികൂടിയിരുന്നു. സാമ്പത്തിക തകര്‍ച്ചയും ഭീമമായ വിലവര്‍ധനയും നേരിടുന്ന ശ്രീലങ്കയില്‍ ഭക്ഷണംപോലും കിട്ടില്ലെന്ന ഭീതിയോടെയാണ് ജനങ്ങള്‍ രാജ്യം വിടുന്നത്.
മാസ്‌ക് ഒഴിവാക്കാന്‍ തീരുമാനിച്ചിട്ടില്ലെന്ന് കേന്ദ്രം. മാസ്‌ക് ധരിക്കുന്നതു തുടരണം. മാസ്‌ക് ധരിക്കാത്തതിന്റെ പേരില്‍ ദുരന്ത നിവാരണ നിയമപ്രകാരം കേസെടുക്കുന്നത് അവസാനിപ്പിക്കാനാണു സംസ്ഥാനങ്ങള്‍ക്കു നിര്‍ദേശം നല്‍കിയത്. രോഗവ്യാപനം തടയാന്‍ മാസ്‌ക് ധരിക്കണമെന്നും കൈകഴുകുകയും അകലം പാലിക്കുകയും ചെയ്യണമെന്നും കേന്ദ്ര ആരോഗ്യമന്ത്രാലയം നിര്‍ദേശിച്ചു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
സ്വകാര്യ ബസ് സമരം ആരംഭിച്ചു. ബസ് ചാര്‍ജ് വര്‍ധിപ്പിക്കണമെന്ന് ആവശ്യപ്പെട്ടാണ് സമരം. ഡീസല്‍ വിലവര്‍ധന അടക്കം ഭീമമായ ചെലവുകള്‍ നേരിടാനാകാത്ത സാഹചര്യമാണുള്ളതെന്നു ബസുടമകള്‍ പലതവണ സര്‍ക്കാരിനെ ബോധ്യപ്പെടുത്തിയിരുന്നു. ഉടനേ വര്‍ധിപ്പിക്കുമെന്നു സര്‍ക്കാര്‍ വാഗ്ദാനം നല്‍കിയെങ്കിലും വര്‍ധന പ്രഖ്യാപനം സര്‍ക്കാര്‍ മാറ്റിവച്ചിരിക്കേയാണ് സമരം. ഇതേസമയം, യാത്രക്കാര്‍ക്കു ബുദ്ധിമുട്ട് ഉണ്ടാകാതിരിക്കാന്‍ കെഎസ്ആര്‍ടിസി കൂടുതല്‍ സര്‍വീസ് നടത്തും.
വാഹനങ്ങളുടെ രജിസ്ട്രേഷന്‍ പുതുക്കാനുള്ള നിരക്ക് കേന്ദ്ര സര്‍ക്കാര്‍ ഏപ്രില്‍ ഒന്നുമുതല്‍ ഭീമമായി വര്‍ധിപ്പിച്ചു. മോട്ടോര്‍ സൈക്കളിനു മുന്നൂറു രൂപയില്‍നിന്ന് ആയിരം രൂപയാക്കി വര്‍ധിപ്പിച്ചു. മുച്ചക്ര വാഹനങ്ങള്‍ക്ക് 600 രൂപയില്‍നിന്ന് 2,500 രൂപയാക്കി. കാറിന് 600 രൂപയില്‍നിന്ന് അയ്യായിരം രൂപയാക്കി. ഇറക്കുമതി ചെയ്ത ബൈക്കിന് പതിനായിരം രൂപയാണ്. ഇറക്കുമതി ചെയ്ത കാറിന് അയ്യായിരം രൂപയില്‍നിന്ന് നാല്‍പതിനായിരം രൂപയാക്കി വര്‍ധിപ്പിച്ചു.
തിരുവനന്തപുരത്ത് ഹോം സ്റ്റേ ലൈസന്‍സ് പുതുക്കാന്‍ 10,000 രൂപ കൈക്കൂലി വാങ്ങുന്നതിനിടെ പഞ്ചായത്ത് ജീവനക്കാരന്‍ അറസ്റ്റില്‍. കോട്ടുകാല്‍ ഗ്രാമപഞ്ചായത്ത് ക്ലാര്‍ക്ക് ശ്രീകുമാറിനെയാണ് വിജിലന്‍സ് പിടികൂടിയത്.
ഒരുത്തീ സിനിമയുടെ വാര്‍ത്താസമ്മേളനത്തില്‍ നടന്‍ വിനായകന്‍ നടത്തിയ സ്ത്രീവിരുദ്ധ പരാമര്‍ശങ്ങള്‍ക്കെതിരേ പരക്കേ പ്രതിഷേധം. വിനായകന്‍ അപമാനമാണെന്ന് ഡോ. എസ് ശാരദക്കുട്ടി. വികലമെന്ന് കോണ്‍ഗ്രസ് നേതാവ് ഷാനിമോള്‍ ഉസ്മാന്‍. മീ ടൂ എന്താണെന്ന് അറിയില്ലെന്നും ഒരാളോട് സെക്സ് വേണമെന്നു തോന്നിയാല്‍ അതു നേരിട്ടു ചോദിക്കുമെന്നുമാണ് കഴിഞ്ഞ ദിവസം വിനായകന്‍ വാര്‍ത്താസമ്മേളനത്തില്‍ പറഞ്ഞത്. വിനായകന്റെ പ്രസ്താവനയ്ക്കെതിരെ എന്തുകൊണ്ടാണ് ഡബ്ല്യുസിസി അടക്കമുള്ളവര്‍ പ്രതികരിക്കാത്തത് എന്ന് നടന്‍ ഹരീഷ് പേരടി.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
തിരുവനന്തപുരം അന്താരാഷ്ട്ര വിമാനത്താവളത്തിലും അടുത്തയാഴ്ച മുതല്‍ സര്‍വീസുകളുടെ എണ്ണം വര്‍ദ്ധിപ്പിക്കുന്നു. പ്രതിവാര വിമാന സര്‍വീസുകളുടെ എണ്ണം 348 ല്‍നിന്ന് 540 ആയി വര്‍ധിപ്പിക്കും. അന്താരാഷ്ട്ര പ്രതിവാര ഫ്ളൈറ്റ് സര്‍വീസുകള്‍ 95 ല്‍നിന്ന് 138 ആകും.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
പുരാവസ്തു തട്ടിപ്പുകാരന്‍ മോന്‍സന്‍ മാവുങ്കലില്‍നിന്ന് ലക്ഷങ്ങള്‍ കൈപ്പറ്റിയ പൊലീസ് ഉദ്യോഗസ്ഥര്‍ക്കെതിരേ അന്വേഷണം. മെട്രോ ഇന്‍സ്പെക്ടര്‍ അനന്തലാല്‍, മേപ്പാടി എസ്ഐ എബി വിപിന്‍ എന്നിവര്‍ വന്‍തുക കൈപ്പറ്റിയെന്നാണ് കണ്ടെത്തല്‍. ഇവര്‍ക്കെതിരെ വകുപ്പുതല അന്വേഷണത്തിന് ഡിജിപി അനില്‍കാന്ത് ഉത്തരവിട്ടു.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
തിരുവനന്തപുരം ആക്കുളത്തെ ദക്ഷിണ വ്യോമസേനാ ആസ്ഥാനത്തിനു സമീപം തീപിടിത്തം. ദേശീയ യുദ്ധ സ്മാരകത്തിനായി നല്‍കിയ സ്ഥലത്താണ് തീപിടിച്ചത്.
തിരുവനന്തപുരത്തുനിന്ന് കടത്തിയ മയക്കുമരുന്ന് മാലിയില്‍ പിടികൂട. ഹാഷിഷ് ഓയിലാണ് പിടിച്ചത്. ജൈവവളം എന്ന പേരിലാണ് വിമാനത്തില്‍ മയക്കുമരുന്ന് കടത്തിയത്.
ആലപ്പുഴയില്‍ ഏഴു വയസുകാരിയെ ലൈംഗികമായി പീഡിപ്പിക്കാന്‍ ശ്രമിച്ച കേസില്‍ പാസ്റ്റര്‍ അറസ്റ്റില്‍. കാപ്പില്‍ സ്വദേശിനിയായ കുട്ടിയാണ് പീഡനത്തിന് ഇരയായത്. ഭരണിക്കാവ് തെക്കേ മങ്കുഴിമുറിയില്‍ പനയ്ക്കാട്ട് കോട്ടയില്‍ വാടകവീട്ടില്‍ താമസിക്കുന്ന ഇടിക്കുള തമ്പി (67) ആണ് അറസ്റ്റിലായത്.
ആര്‍ദ്രതയുള്ള നേതാക്കളെയാണ് ലോകത്തിന് ഇന്നാവശ്യമെന്ന് കേരള സാഹിത്യ അക്കാദമി പസിഡന്റ് സച്ചിദാനന്ദന്‍. ശക്തനായ ഒരു നേതാവിനെ കാത്തിരിക്കുന്ന ജനത ഫാസിസത്തിനു വളക്കൂറുള്ള മണ്ണാണെന്നും അദ്ദേഹം പറഞ്ഞു. കേരള സാഹിത്യ അക്കാദമിയും കുടുംബശ്രീ സംസ്ഥാന മിഷനും സംയുക്തമായി സംഘടിപ്പിച്ച ത്രിദിന സാഹിത്യ ശില്പശാല സര്‍ഗ്ഗം-2022 ഉദ്ഘാടനം ചെയ്യുകയായിരുന്നു അദ്ദേഹം.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ഒമാന്‍ വിദേശകാര്യ മന്ത്രി സയ്യിദ് ബദര്‍ ഹമദ് അല്‍ ബുസൈദി ഇന്ത്യയിലെത്തി. കേന്ദ്ര വിദേശകാര്യ മന്ത്രി എസ്. ജയ്ശങ്കറുമായി നടത്തിയ ചര്‍ച്ചകള്‍ക്കുശേഷം ഇന്ത്യയും ഒമാനും ധാരണാപത്രത്തില്‍ ഒപ്പുവച്ചു.
കര്‍ണാടകയിലെ തീരമേഖലകളിലുള്ള ക്ഷേത്രോല്‍സവങ്ങളില്‍ അന്യമതസ്ഥരായ കച്ചവടക്കാര്‍ക്കു വിലക്ക്. ഹിന്ദു സംഘടനകളുടെ സമ്മര്‍ദത്തെത്തുടര്‍ന്നാണ് ക്ഷേത്രം ഭരണസമിതികള്‍ ഇങ്ങനെ തീരുമാനമെടുത്തത്.
തെക്കന്‍ ചൈനയില്‍ തകര്‍ന്നു വീണ വിമാനത്തിന്റെ ബ്ളാക് ബോക്സ് കണ്ടെത്തി. 132 പേരുണ്ടായിരുന്ന വിമാനമാണ് തകര്‍ന്നുവീണത്.
ജയിലില്‍ കഴിയുന്ന വിക്കിലീക്സ് സ്ഥാപകന്‍ ജൂലിയന്‍ അസാന്‍ജ് വിവാഹിതനാകുന്നു. കാമുകി സ്റ്റെല്ല മോറിസിനെ ലണ്ടന്‍ ജയിലില്‍ വച്ചാണ് അദ്ദേഹം വിവാഹം ചെയ്യുക. ജൂലിയന്‍ അസാന്‍ജിന്റെ പങ്കാളിയാണ് സ്റ്റെല്ല. വളരെ ചെറിയ ചടങ്ങില്‍ നാല് അതിഥികളും രണ്ട് ഔദ്യോഗിക സാക്ഷികളും രണ്ട് സുരക്ഷാ ഗാര്‍ഡുകളും മാത്രമാണ് പങ്കെടുക്കുക. അമേരിക്കന്‍ സൈനിക രഹസ്യങ്ങളും നയതന്ത്ര രേഖകളും പുറത്തുവിട്ടതിന് 18 കേസുകളിലാണു ജയില്‍ശിക്ഷ. ലണ്ടനിലെ ഇക്വഡോര്‍ എംബസിയില്‍ ഏഴു വര്‍ഷം അഭയം തേടിയിരുന്നു. അക്കാലത്ത് സ്റ്റെല്ലയുമായി ബന്ധം തുടങ്ങിയത്. ഇരുവര്‍ക്കും രണ്ടു മക്കളുണ്ട്.
 |
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
ഖത്തറില്‍ സ്വദേശിവത്കരണ നടപടികളില്‍ കൃത്രിമം കാണിച്ചതായി കണ്ടെത്തിയ രണ്ട് കമ്പനികള്‍ക്കെതിരെ നടപടി. ഇന്‍ഷുറന്‍സ് മേഖലയില്‍ പ്രവര്‍ത്തിക്കുന്ന ഒരു സ്ഥാപനത്തിനെതിരെയും കമ്മ്യൂണിക്കേഷന്‍സ് ഐ.ടി രംഗത്തുള്ള മറ്റൊരു സ്ഥാപനത്തിനെതിരെയുമാണ് നടപടി.
യുക്രെയിനില്‍ റഷ്യന്‍ പട്ടാളത്തിന്റെ അധിനിവേശം ഒരു മാസം പിന്നിട്ടു. യുക്രെയിന്‍ നഗരങ്ങളിലെ കെട്ടിടങ്ങളെല്ലാം തകര്‍ത്ത് സൈന്യം മുന്നേറിയെങ്കിലും യുക്രെയിന്‍ ജനതയെ കീഴടക്കാനാകാതെ റഷ്യ വിയര്‍ക്കുകയാണ്. നാലര കോടി യുക്രെയിന്‍ ജനങ്ങളില്‍ ഒരു കോടി പേര്‍ പലായനം ചെയ്തു. പതിനാറായിരത്തോളം റഷ്യന്‍ സൈന്യത്തെ വധിച്ചെന്നാണ് യുക്രെയിന്‍ അവകാശപ്പെടുന്നത്. യുക്രെയിനിലെ അയ്യായിരത്തോളം പേര്‍ കൊല്ലപ്പെട്ടെന്നാണു സ്ഥിരീകരിക്കപ്പെടാത്ത വിവരം.
ബ്രിട്ടീഷ് പണപ്പെരുപ്പം കഴിഞ്ഞ മാസം 30 വര്‍ഷത്തെ ഏറ്റവും ഉയര്‍ന്ന നിരക്കായ 6.2 ശതമാനത്തിലെത്തി. വിശകലന വിദഗ്ധര്‍ക്കിടയിലെ പ്രതീക്ഷകളുടെ ഏറ്റവും ഉയര്‍ന്ന നിലയാണിത്. സാമ്പത്തിക വിദഗ്ധരുടെ റോയിട്ടേഴ്സ് വോട്ടെടുപ്പിലെ ശരാശരി പ്രവചനം 5.9 ശതമാനമാണ്. ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്സ് (ഒഎന്‍എസ്) ഫെബ്രുവരിയിലെ പണപ്പെരുപ്പത്തിന്റെ ഏറ്റവും വലിയ ചാലകങ്ങളായി ഗാര്‍ഹിക ഊര്‍ജ്ജ ബില്ലുകളും പെട്രോളും ചൂണ്ടിക്കാണിച്ചു. ഉപഭോക്തൃ വില പ്രതിമാസം 0.8 ശതമാനം വര്‍ദ്ധിച്ചതായി ഒഎന്‍എസ് പറഞ്ഞു. ഇത് 2009 ന് ശേഷമുള്ള ഫെബ്രുവരിയിലെ ഏറ്റവും വലിയ വര്‍ദ്ധനയാണ്. കഴിഞ്ഞ ആഴ്ച, ബാങ്ക് ഓഫ് ഇംഗ്ലണ്ട് ഏപ്രില്‍-ജൂണ്‍ കാലയളവില്‍ പണപ്പെരുപ്പം 8 ശതമാനത്തിന് മുകളില്‍ ഉയരുമെന്ന പ്രവചനം അതിന്റെ നാലിരട്ടിയിലധികമായി ഉയര്‍ത്തിയിരുന്നു.
|
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
|
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
തമിഴ് സൂപ്പര്‍ ഹിറ്റ് ചിത്രം ജെന്റില്‍മാന്റെ രണ്ടാം ഭാഗത്തില്‍ മലയാളികളുടെ പ്രിയ താരം നയന്‍താര ചക്രവര്‍ത്തി ആകും നായിക. നയന്‍താര ചക്രവര്‍ത്തി തന്നെയാണ് ഈ വിവരം സമൂഹമാധ്യമങ്ങളിലൂടെ അറിയിച്ചത്. നിര്‍മാതാവ് കെ.ടി കുഞ്ഞുമോനൊപ്പമുള്ള ചിത്രം പങ്കുവച്ചായിരുന്നു നയന്‍താര ചക്രവര്‍ത്തിയുടെ അറിയിപ്പ്. ബാലതാരമായി മലയാളികളുടെ മനസ്സില്‍ ഇടംനേടിയ നയന്‍താരയുടെ നായികയായുള്ള ആദ്യ അരങ്ങേറ്റം കൂടിയാണ് ജെന്റില്‍മാന്‍ 2. എം. എം. കീരവാണിയാണ് ജെന്റില്‍മാന്‍ 2 ന്റെ സംഗീത സംവിധായകന്‍. ജെന്റില്‍മാന്‍ ആദ്യഭാഗത്തിന് എ.ആര്‍ റഹ്‌മാനായിരുന്നു സംഗീതം നല്‍കിയിരുന്നത്.
|
| കൂടുതൽ വിവരങ്ങൾക്കായി പരസ്യത്തിൽ ക്ലിക് ചെയുക |
.png)
