ദീപാവലി അടുത്തതോടെ പ്രാദേശിക വിപണികള്ക്ക് ആശ്വാസമായി സ്വര്ണ്ണവിലയില് ഇടിവ്. പവന് 440 രൂപ കുറഞ്ഞ് 58,280 രൂപയിലും, ഗ്രാമിന് 55 രൂപ താഴ്ന്ന് 7,285 രൂപയിലുമാണ് ഇന്നു വ്യാപാരം നടക്കുന്നത്. ഇന്നലെ പ്രാദേശിക വിപണികളില് പവന് ചരിത്രത്തിലെ ഏറ്റവും മികച്ച നിലവാരമായ 58,720 രൂപ രേഖപ്പെടുത്തിയിരുന്നു. ഉത്സവകാലത്ത് സ്വര്ണവില കുതിച്ചുയരുന്നത് വ്യാപാരത്തെ പ്രതികൂലമായി ബാധിക്കുമെന്ന ആശങ്കയിലായിരുന്നു പ്രാദേശിക വിപണികള്. ഇന്നത്തെ വിലക്കുറവ് വ്യാപാരികള്ക്കും, ഉപയോക്താക്കള്ക്കും നേരിയ ആശ്വാസമാകും.
അതേസമയം ആഗോളവിപണിയില് സ്വര്ണവിപണിയില് സ്വര്ണവിലയില് യാതൊരു ആശ്വാസവുമില്ല. 24 മണിക്കൂറിനിടെ സ്വര്ണം ഔണ്സിന് 0.24% (6.50 ഡോളര്) വില വര്ധിച്ചു. 30 ദിവസത്തിനിടെ ആഗോള സ്വര്ണവിലയിലെ വര്ധന 2.26% (60.14 ഡോളര്) ആണ്. 6 മാസത്തിനിടെ ഔണ്സിന് 16.58% (386.45 ഡോളര്) കൂടി. പ്രാദേശിക വിപണികളിലും ഈ മാസം സ്വര്ണ്ണം കത്തികയറുന്നതാണ് കണ്ടത്.
56,400 രൂപയായിരുന്നു മാസാദ്യ സ്വര്ണ്ണവില. ഈ മാസം 10 ന് രേഖപ്പെടുത്തിയ 56,200 രൂപയാണ് മാസത്തെ സ്വര്ണത്തിന്റെ താഴ്ന്ന നിലവാരം. ഇന്നലെ രേഖപ്പെടുത്തിയ 58,720 രൂപയാണ് ഉയര്ന്ന നിലവാരം. അതായത് ഈ മാസം മാത്രം പവന് 2,520 രൂപയോളം വിലമാറ്റമുണ്ടായി. ആഗോള വിപണികളിലെ വിലമാറ്റങ്ങള് ഡോളറിലായതിനാല് തന്നെ നേരിയ ചലനങ്ങള് പോലും പ്രാദേശിക വിലയെ സ്വാധീനിക്കും. ഡോളര്- രൂപ വിനിമയ നിരക്കും ഇവിടെ പ്രധാനമാണ്.
ആഗോള വിപണികള് സ്വര്ണ്ണവില വര്ധിക്കുമെന്ന സൂചനയാണ് നല്കുന്നത്. ആഗോളതലത്തില് പണപ്പെരുപ്പം വീണ്ടും ചര്ച്ചയാകുന്നു. യുഎസ് ഫെഡ് റിസര്വ് പ്രഖ്യാപിത നിരക്കു കുറയ്ക്കല് നയത്തില് നിന്നു പിന്മാറിയേക്കുമെന്ന സൂചന സ്വര്ണത്തിന് കരുത്തു നല്കുന്നു. ഓഹരി വിപണികളുടെ തളര്ച്ചയില് നിക്ഷേപം സ്വര്ണത്തിലേയ്ക്ക് ഒഴുകുന്നു. യുദ്ധവും, പണപ്പെരുപ്പവും സ്വര്ണത്തിന്റെ സുരക്ഷിത നിക്ഷേപമെന്ന ഖ്യാതി ഉയര്ത്തുന്നു.
നിലവിലെ സാഹചര്യങ്ങളും, ആഗോള സൂചകങ്ങളും സ്വര്ണം കരുത്താര്ജിക്കുമെന്ന സൂചന നല്കുന്നു. സ്വര്ണത്തിന്റെ ദീര്ഘകാല ഭാവി സുരക്ഷിതമാണെന്നു വിദഗ്ധരും വിശ്വസിക്കുന്നു. അതിനാല് നിലവിലെ ഇറക്കങ്ങള് നിക്ഷേപര്ക്കും, ആഭരണപ്രിയര്ക്കും ഉപയോഗിക്കാവുന്നതാണ്. നിക്ഷേപകര് ആവറേജിംഗിനുള്ള തുക കരുതി നിക്ഷേപങ്ങള് തുടരുക. ആഭരണപ്രിയര് ഇറക്കങ്ങളില് ബുക്കിംഗ് അവസരങ്ങള് പ്രയോജനപ്പെടുത്തുക.
ബുക്കിംഗുകള്ക്കു ശേഷം വില കുതിച്ചാല് ബുക്കിംഗ് നിരക്കിലും, വില കുറഞ്ഞാല് വിപണി നിരക്കിലും സ്വര്ണത്തിലേയ്ക്കു പ്രവേശനം ലഭിക്കും. മുന്കൂട്ടി ബുക്ക് ചെയ്യുന്നവര്ക്ക് പണിക്കൂലിയില് അടക്കം ജുവലറികള് ഇളവുകളും നല്കുന്നുണ്ട്. അതിനാല് നിലവിലെ അവസരം ഉപയോഗപ്പെടുത്താവുന്നതാണ്.
സംസ്ഥാനത്ത നിലവില് വെള്ളി വിലയില് മാറ്റമില്ല. സ്വര്ണ്ണവില കുറഞ്ഞ സാഹചര്യത്തില് വരും മണിക്കൂറുകളില് വെള്ളി വിലയും കുറഞ്ഞേക്കാം. നിലവില് വെള്ളി ഗ്രാമിന് 112.10 രൂപയാണ്. 8 ഗ്രാം വെള്ളിക്ക് 896.80 രൂപയും, 10 ഗ്രാമിന് 1,121 രൂപയുമാണ്. വെള്ളി കിലോയ്ക്ക് 1,12,100 രൂപയാണ്.
