ഇടുക്കി മാങ്കുളത്ത് ഓട്ടോറിക്ഷയില് അനധികൃതമായി കടത്തിയ വിദേശമദ്യം പിടികൂടി. മാങ്കുളം പാമ്പുംകയം സ്വദേശി പാറശ്ശേരിയില് ജോബിൻ തോമസിനെ എക്സൈസ് സംഘം അറസ്റ്റ് ചെയ്തു. ഇയാളുടെ ഓട്ടോയില് നിന്നും 25 ലിറ്റര് വിദേശ മദ്യമാണ് കണ്ടെത്തിയത്.
മദ്യം കടത്താൻ ഉപയോഗിച്ച ഓട്ടോറിക്ഷയും എക്സൈസ് സംഘം കസ്റ്റഡിയിലെടുത്തു. മൂന്നാർ എക്സൈസ് സർക്കിൾ ഓഫീസിലെ പ്രിവന്റീവ് ഓഫിസർ പി.ആർ സുനിൽകുമാറിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. ചില്ലറ വില്പന നടത്തുന്നതിന് വേണ്ടിയാണ് ജോബിൻ മദ്യം വാഹനത്തിൽ സൂക്ഷിച്ചിരുന്നത്.
മാങ്കുളം കേന്ദ്രീകരിച്ച് വൻതോതിൽ മദ്യ വില്പന നടത്തുന്നതായും മദ്യം കടത്തുന്നതായും എക്സൈസിന് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തിൽ നടത്തിയ പരിശോധനയിലാണ് മദ്യം പിടികൂടിയത്. മൂന്നാർ എക്സൈസ് സർക്കിൾ ഓഫീസിലെ പ്രിവന്റീവ് ഓഫിസറുടെ നേതൃത്വത്തിൽ സിഇഓ മാരായ സുജിത്ത് , ഷോബിൻ മാത്യു, ഡ്രൈവർ അനിൽകുമാർ കെ പി എന്നിവരടങ്ങുന്ന സംഘമാണ് പ്രതിയെ പിടികൂടിയത്. അറസ്റ്റിലായ പ്രതിയെ ഇന്ന് കോടതിയിൽ ഹാജരാക്കി റിമാൻഡ് ചെയ്തു.
കൂടുതൽ വാർത്തകൾക്കായി വാട്സാപ്പ് ഗ്രൂപ്പിൽ അംഗമാവുക.ക്ലിക്ക്
