അരിക്കൊമ്പനെ മാറ്റിയിട്ടും തുടരുന്ന വിലക്ക്; സഞ്ചാരികളെ നിരാശരാക്കിയ ആനയിറങ്കൽ ഡാമിലെ ബോട്ടിങ് നിരോധനം നീക്കിയേക്കും! വനംവകുപ്പിന്റെ റിപ്പോർട്ട് നിർണ്ണായകം; കാത്തിരിപ്പോടെ സഞ്ചാരികളും നാട്ടുകാരും

ഇടുക്കി ജില്ലയിലെ മൂന്നാറിനോട് ചേർന്നുള്ള പ്രധാന വിനോദസഞ്ചാര കേന്ദ്രമായ ആനയിറങ്കൽ ഡാമിൽ ബോട്ടിങ്ങിന് ഏർപ്പെടുത്തിയിരുന്ന നിയന്ത്രണങ്ങൾ നീക്കാൻ സാധ്യത. ആനയിറങ്കൽ ജലാശയത്തിൽ ഹൈഡൽ ടൂറിസം വകുപ്പിന്റെ നേതൃത്വത്തിൽ ബോട്ടിങ് പുനരാരംഭിക്കുന്നത് സംബന്ധിച്ച് വനം വകുപ്പ് ഒരാഴ്ചയ്ക്കകം വിശദമായ റിപ്പോർട്ട് നൽകും.

ചിന്നക്കനാൽ, ശാന്തൻപാറ മേഖലകളിലെ ജനവാസ കേന്ദ്രങ്ങളിൽ ജനജീവിതം ദുസ്സഹമാക്കിയ 'അരിക്കൊമ്പൻ' എന്ന കാട്ടാനയുടെ ശല്യത്തെ തുടർന്ന് ഒരു പരിസ്ഥിതി പ്രവർത്തകൻ ഹൈക്കോടതിയെ സമീപിച്ചതോടെയാണ് ആനയിറങ്കൽ ഡാമിലെ ബോട്ടിങ് താൽക്കാലികമായി നിർത്തിവെച്ചത്. നിലവിൽ ഈ മേഖലയിലെ ആനകളുടെ സഞ്ചാരം സംബന്ധിച്ച് കൃത്യമായ റിപ്പോർട്ട് നൽകാൻ വനം വകുപ്പിന് നിർദേശം ലഭിച്ചിട്ടുണ്ട്.

ജനവാസ കേന്ദ്രങ്ങളിലടക്കം അക്രമം തുടർന്നതോടെ 2023 ഏപ്രിൽ 29-ന് മയക്കുവെടിവെച്ച് അരിക്കൊമ്പനെ പിടികൂടി തമിഴ്നാട് അതിർത്തിയിലേക്ക് മാറ്റിയിരുന്നു. എന്നാൽ, ഇതിന് ശേഷം വർഷങ്ങൾ കഴിഞ്ഞിട്ടും ഇവിടെ ബോട്ടിങ് പുനരാരംഭിക്കാത്തത് പ്രദേശവാസികളുടെയും സഞ്ചാരികളുടെയും വലിയ പ്രതിഷേധത്തിന് കാരണമായിട്ടുണ്ട്. മുൻപ് ഏഴ് ബോട്ടുകളായിരുന്നു ആനയിറങ്കൽ ഡാമിൽ സഞ്ചാരികൾക്കായി സർവീസ് നടത്തിയിരുന്നത്. ബോട്ടിങ് നിർത്തിവച്ച വിവരം അറിയാതെ എത്തുന്ന വിനോദസഞ്ചാരികൾ ഇപ്പോൾ നിരാശയോടെ മടങ്ങേണ്ടി വരുന്ന അവസ്ഥയാണ്.

ബോട്ടിങ് നിരോധിച്ചതിന് പിന്നിൽ

അരിക്കൊമ്പനെ പിടികൂടുന്നതുമായി ബന്ധപ്പെട്ട് ഹൈക്കോടതി നിയോഗിച്ച വിദഗ്ധ സമിതിയുടെ ശുപാർശ പ്രകാരം 2023 ജൂലൈ 14-നാണ് ആനയിറങ്കൽ ഡാമിലെ ബോട്ടിങ് കോടതി നിരോധിച്ചത്. വന്യജീവി-മനുഷ്യ സംഘർഷം ഒഴിവാക്കാൻ ബോട്ടിങ് നിർത്തിവെക്കണമെന്നായിരുന്നു വനം വകുപ്പിലെ ഉന്നത ഉദ്യോഗസ്ഥർ ഉൾപ്പെട്ട സമിതിയുടെ റിപ്പോർട്ട്. ഡീസൽ ബോട്ടുകളുടെ ശബ്ദം വന്യജീവികളെ പ്രകോപിപ്പിക്കുമെന്നും, ഇവ വലിയ തോതിൽ പരിസ്ഥിതി മലിനീകരണം ഉണ്ടാക്കുന്നുണ്ടെന്നുമായിരുന്നു വിദഗ്ധ സമിതിയുടെ പ്രധാന കണ്ടെത്തൽ.

പുതിയ പ്രതീക്ഷയായി ഇലക്ട്രിക് ബോട്ടുകൾ

ഡീസൽ ബോട്ടുകൾക്ക് പകരം പരിസ്ഥിതി സൗഹൃദമായ ഇലക്ട്രിക് ബോട്ടുകൾ ഉപയോഗിച്ച് സർവീസ് നടത്താൻ ഹൈഡൽ ടൂറിസം വകുപ്പ് ആലോചിക്കുന്നുണ്ട്. ഇതിന്റെ അടിസ്ഥാനത്തിൽ ആനയിറങ്കൽ അണക്കെട്ടിൽ ബോട്ടിങ് പുനരാരംഭിക്കുന്നതിന് അനുമതി നൽകണമെന്ന ആവശ്യവുമായി ഹൈഡൽ ടൂറിസം കോടതിയെ സമീപിച്ചിട്ടുണ്ട്. കോടതിയുടെ നിലപാടും വനംവകുപ്പിന്റെ റിപ്പോർട്ടുമാകും ഇനി നിർണ്ണായകമാവുക.

കൂടുതൽ വാർത്തകൾക്കായി വാട്‌സാപ്പ് ഗ്രൂപ്പിൽ അംഗമാവുക...👉👉👉...ക്ലിക്ക്.