ആഴ്ചകളായി മുടങ്ങിക്കിടന്ന ഇടുക്കി ഗവൺമെന്റ് മെഡിക്കൽ കോളേജിലെ സിടി സ്കാനിംഗ് സൗകര്യം ഒടുവിൽ പൂർണ്ണതോതിൽ പ്രവർത്തനക്ഷമമായി. സാധാരണക്കാരായ രോഗികളുടെ ദുരിതം ചൂണ്ടിക്കാട്ടി വാർത്ത നൽകിയതിന് പിന്നാലെയാണ് ആരോഗ്യവകുപ്പും ആശുപത്രി അധികൃതരും അടിയന്തര ഇടപെടൽ നടത്തിയത്.
യന്ത്രത്തകരാർ കാരണം സിടി സ്കാനിംഗ് നിലച്ചത് മൂലം അത്യാഹിത വിഭാഗത്തിൽ എത്തുന്നവർ ഉൾപ്പെടെയുള്ള രോഗികൾ നേരിട്ട ബുദ്ധിമുട്ടുകൾ ഏറെ ചർച്ചയായിരുന്നു. നിർധനരായ രോഗികൾ കട്ടപ്പന, അടിമാലി എന്നിവിടങ്ങളിലെ സ്വകാര്യ ലാബുകളെയോ കോട്ടയം മെഡിക്കൽ കോളേജിനെയോ വൻ തുക നൽകി ആശ്രയിക്കേണ്ട അവസ്ഥയിലായിരുന്നു. ഇത് സംബന്ധിച്ച് ഹോണസ്റ്റി ന്യൂസ് നൽകിയ വാർത്ത ശ്രദ്ധയിൽപ്പെട്ടതിനെ തുടർന്ന് സാങ്കേതിക വിദഗ്ദ്ധരെ എത്തിച്ച് യുദ്ധകാലാടിസ്ഥാനത്തിൽ അറ്റകുറ്റപ്പണികൾ പൂർത്തിയാക്കുകയായിരുന്നു.
പരീക്ഷണ നിരീക്ഷണങ്ങൾക്ക് ശേഷം സിടി സ്കാനിംഗ് മെഷീൻ രോഗികൾക്കായി തുറന്നു നൽകിയതോടെ ഹൈറേഞ്ചിലെ നൂറുകണക്കിന് പാവപ്പെട്ട രോഗികൾക്ക് വലിയ ആശ്വാസമാണ് ലഭിച്ചിരിക്കുന്നത്. വരും ദിവസങ്ങളിലും യന്ത്രത്തകരാറുകൾ ഉണ്ടാകാതിരിക്കാൻ കൃത്യമായ നിരീക്ഷണം ഉറപ്പാക്കുമെന്ന് ആശുപത്രി അധികൃതർ അറിയിച്ചു.
🔔 വാർത്തകൾ വേഗത്തിൽ അറിയാൻ ഹോണസ്റ്റി ന്യൂസ് ഫോളോ ചെയ്യൂ:👇👇👇
📲 WhatsApp: https://tinyurl.com/mnevzkkc
👥 Facebook: https://tinyurl.com/33pj6xt9
📸 Instagram: https://tinyurl.com/2z3cpaab
